| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. අභිසමයසංයුත්‌තං
2. Abhisamayasaṃyuttaṃ
1. නඛසිඛාසුත්‌තං
1. Nakhasikhāsuttaṃ
74. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. අථ ඛො භගවා පරිත්‌තං නඛසිඛායං පංසුං ආරොපෙත්‌වා භික්‌ඛූ ආමන්‌තෙසි – ‘‘තං කිං මඤ්‌ඤථ, භික්‌ඛවෙ, කතමං නු ඛො බහුතරං, යො වායං 1 මයා පරිත්‌තො නඛසිඛායං පංසු ආරොපිතො, අයං වා මහාපථවී’’ති?
74. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho bhagavā parittaṃ nakhasikhāyaṃ paṃsuṃ āropetvā bhikkhū āmantesi – ‘‘taṃ kiṃ maññatha, bhikkhave, katamaṃ nu kho bahutaraṃ, yo vāyaṃ 2 mayā paritto nakhasikhāyaṃ paṃsu āropito, ayaṃ vā mahāpathavī’’ti?
‘‘එතදෙව, භන්‌තෙ, බහුතරං, යදිදං මහාපථවී. අප්‌පමත්‌තකො භගවතා පරිත්‌තො නඛසිඛායං පංසු ආරොපිතො. නෙව සතිමං කලං උපෙති න සහස්‌සිමං කලං උපෙති න සතසහස්‌සිමං කලං උපෙති මහාපථවිං උපනිධාය භගවතා පරිත්‌තො නඛසිඛායං පංසු ආරොපිතො’’ති. ‘‘එවමෙව ඛො, භික්‌ඛවෙ, අරියසාවකස්‌ස දිට්‌ඨිසම්‌පන්‌නස්‌ස පුග්‌ගලස්‌ස අභිසමෙතාවිනො එතදෙව බහුතරං දුක්‌ඛං යදිදං පරික්‌ඛීණං පරියාදිණ්‌ණං; අප්‌පමත්‌තකං අවසිට්‌ඨං. නෙව සතිමං කලං උපෙති න සහස්‌සිමං කලං උපෙති න සතසහස්‌සිමං කලං උපෙති පුරිමං දුක්‌ඛක්‌ඛන්‌ධං පරික්‌ඛීණං පරියාදිණ්‌ණං උපනිධාය යදිදං සත්‌තක්‌ඛත්‌තුංපරමතා. එවං මහත්‌ථියො ඛො, භික්‌ඛවෙ, ධම්‌මාභිසමයො; එවං මහත්‌ථියො ධම්‌මචක්‌ඛුපටිලාභො’’ති. පඨමං.
‘‘Etadeva, bhante, bahutaraṃ, yadidaṃ mahāpathavī. Appamattako bhagavatā paritto nakhasikhāyaṃ paṃsu āropito. Neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti mahāpathaviṃ upanidhāya bhagavatā paritto nakhasikhāyaṃ paṃsu āropito’’ti. ‘‘Evameva kho, bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādiṇṇaṃ; appamattakaṃ avasiṭṭhaṃ. Neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti purimaṃ dukkhakkhandhaṃ parikkhīṇaṃ pariyādiṇṇaṃ upanidhāya yadidaṃ sattakkhattuṃparamatā. Evaṃ mahatthiyo kho, bhikkhave, dhammābhisamayo; evaṃ mahatthiyo dhammacakkhupaṭilābho’’ti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. නඛසිඛාසුත්‌තවණ්‌ණනා • 1. Nakhasikhāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. නඛසිඛාසුත්‌තවණ්‌ණනා • 1. Nakhasikhāsuttavaṇṇanā
