| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. ཨབྷིསམཡསཾཡུཏྟཾ
2. Abhisamayasaṃyuttaṃ
༡. ནཁསིཁཱསུཏྟཾ
1. Nakhasikhāsuttaṃ
༧༤. ཨེཝཾ མེ སུཏཾ – ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཨཐ ཁོ བྷགཝཱ པརིཏྟཾ ནཁསིཁཱཡཾ པཾསུཾ ཨཱརོཔེཏྭཱ བྷིཀྑཱུ ཨཱམནྟེསི – ‘‘ཏཾ ཀིཾ མཉྙཐ, བྷིཀྑཝེ, ཀཏམཾ ནུ ཁོ བཧུཏརཾ, ཡོ ཝཱཡཾ 1 མཡཱ པརིཏྟོ ནཁསིཁཱཡཾ པཾསུ ཨཱརོཔིཏོ, ཨཡཾ ཝཱ མཧཱཔཐཝཱི’’ཏི?
74. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Atha kho bhagavā parittaṃ nakhasikhāyaṃ paṃsuṃ āropetvā bhikkhū āmantesi – ‘‘taṃ kiṃ maññatha, bhikkhave, katamaṃ nu kho bahutaraṃ, yo vāyaṃ 2 mayā paritto nakhasikhāyaṃ paṃsu āropito, ayaṃ vā mahāpathavī’’ti?
‘‘ཨེཏདེཝ, བྷནྟེ, བཧུཏརཾ, ཡདིདཾ མཧཱཔཐཝཱི། ཨཔྤམཏྟཀོ བྷགཝཏཱ པརིཏྟོ ནཁསིཁཱཡཾ པཾསུ ཨཱརོཔིཏོ། ནེཝ སཏིམཾ ཀལཾ ཨུཔེཏི ན སཧསྶིམཾ ཀལཾ ཨུཔེཏི ན སཏསཧསྶིམཾ ཀལཾ ཨུཔེཏི མཧཱཔཐཝིཾ ཨུཔནིདྷཱཡ བྷགཝཏཱ པརིཏྟོ ནཁསིཁཱཡཾ པཾསུ ཨཱརོཔིཏོ’’ཏི། ‘‘ཨེཝམེཝ ཁོ, བྷིཀྑཝེ, ཨརིཡསཱཝཀསྶ དིཊྛིསམྤནྣསྶ པུགྒལསྶ ཨབྷིསམེཏཱཝིནོ ཨེཏདེཝ བཧུཏརཾ དུཀྑཾ ཡདིདཾ པརིཀྑཱིཎཾ པརིཡཱདིཎྞཾ; ཨཔྤམཏྟཀཾ ཨཝསིཊྛཾ། ནེཝ སཏིམཾ ཀལཾ ཨུཔེཏི ན སཧསྶིམཾ ཀལཾ ཨུཔེཏི ན སཏསཧསྶིམཾ ཀལཾ ཨུཔེཏི པུརིམཾ དུཀྑཀྑནྡྷཾ པརིཀྑཱིཎཾ པརིཡཱདིཎྞཾ ཨུཔནིདྷཱཡ ཡདིདཾ སཏྟཀྑཏྟུཾཔརམཏཱ། ཨེཝཾ མཧཏྠིཡོ ཁོ, བྷིཀྑཝེ, དྷམྨཱབྷིསམཡོ; ཨེཝཾ མཧཏྠིཡོ དྷམྨཙཀྑུཔཊིལཱབྷོ’’ཏི། པཋམཾ།
‘‘Etadeva, bhante, bahutaraṃ, yadidaṃ mahāpathavī. Appamattako bhagavatā paritto nakhasikhāyaṃ paṃsu āropito. Neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti mahāpathaviṃ upanidhāya bhagavatā paritto nakhasikhāyaṃ paṃsu āropito’’ti. ‘‘Evameva kho, bhikkhave, ariyasāvakassa diṭṭhisampannassa puggalassa abhisametāvino etadeva bahutaraṃ dukkhaṃ yadidaṃ parikkhīṇaṃ pariyādiṇṇaṃ; appamattakaṃ avasiṭṭhaṃ. Neva satimaṃ kalaṃ upeti na sahassimaṃ kalaṃ upeti na satasahassimaṃ kalaṃ upeti purimaṃ dukkhakkhandhaṃ parikkhīṇaṃ pariyādiṇṇaṃ upanidhāya yadidaṃ sattakkhattuṃparamatā. Evaṃ mahatthiyo kho, bhikkhave, dhammābhisamayo; evaṃ mahatthiyo dhammacakkhupaṭilābho’’ti. Paṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. ནཁསིཁཱསུཏྟཝཎྞནཱ • 1. Nakhasikhāsuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡. ནཁསིཁཱསུཏྟཝཎྞནཱ • 1. Nakhasikhāsuttavaṇṇanā
