| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. அபி⁴ஸமயஸங்யுத்தங்
2. Abhisamayasaṃyuttaṃ
1. நக²ஸிகா²ஸுத்தவண்ணனா
1. Nakhasikhāsuttavaṇṇanā
74. அபி⁴ஸமயஸங்யுத்தஸ்ஸ பட²மே நக²ஸிகா²யந்தி மங்ஸட்டா²னேன விமுத்தே நக²க்³கே³. நக²ஸிகா² ச நாம லோகியானங் மஹதீபி ஹோதி, ஸத்து² பன ரத்துப்பலபத்தகோடி விய ஸுகு²மா. கத²ங் பனெத்த² பங்ஸு பதிட்டி²தோதி? அதி⁴ட்டா²னப³லேன. ப⁴க³வதா ஹி அத்த²ங் ஞாபேதுகாமேன அதி⁴ட்டா²னப³லேன தத்த² பதிட்டா²பிதோ. ஸதிமங் கலந்தி மஹாபத²வியா பங்ஸுங் ஸதகொட்டா²ஸே கத்வா ததோ ஏககொட்டா²ஸங். பரதோபி ஏஸேவ நயோ. அபி⁴ஸமேதாவினோதி பஞ்ஞாய அரியஸச்சானி அபி⁴ஸமெத்வா டி²தஸ்ஸ. புரிமங் து³க்க²க்க²ந்த⁴ங் பரிக்கீ²ணங் பரியாதி³ண்ணங் உபனிதா⁴யாதி ஏததே³வ ப³ஹுதரங் து³க்க²ங், யதி³த³ங் பரிக்கீ²ணந்தி ஏவங் பட²மங் வுத்தங் து³க்க²க்க²ந்த⁴ங் உபனிதா⁴ய, ஞாணேன தங் தஸ்ஸ ஸந்திகே ட²பெத்வா உபபரிக்கி²யமானேதி அத்தோ². கதமங் பனெத்த² புரிமது³க்க²ங் நாம? யங் பரிக்கீ²ணங். கதமங் பன பரிக்கீ²ணங்? யங் பட²மமக்³க³ஸ்ஸ அபா⁴விதத்தா உப்பஜ்ஜெய்ய. கதமங் பன உபனிதா⁴ய? யங் ஸத்தஸு அத்தபா⁴வேஸு அபாயே அட்ட²மஞ்ச படிஸந்தி⁴ங் ஆதி³ங் கத்வா யத்த² கத்த²சி உப்பஜ்ஜெய்ய, ஸப்³ப³ங் தங் பரிக்கீ²ணந்தி வேதி³தப்³ப³ங். ஸத்தக்க²த்துந்தி ஸத்த வாரே, ஸத்தஸு அத்தபா⁴வேஸூதி அத்தோ². பரமதாதி இத³மஸ்ஸ பரங் பமாணந்தி த³ஸ்ஸேதி. மஹத்தி²யோதி மஹதோ அத்த²ஸ்ஸ நிப்பா²த³கோ. பட²மங்.
74. Abhisamayasaṃyuttassa paṭhame nakhasikhāyanti maṃsaṭṭhānena vimutte nakhagge. Nakhasikhā ca nāma lokiyānaṃ mahatīpi hoti, satthu pana rattuppalapattakoṭi viya sukhumā. Kathaṃ panettha paṃsu patiṭṭhitoti? Adhiṭṭhānabalena. Bhagavatā hi atthaṃ ñāpetukāmena adhiṭṭhānabalena tattha patiṭṭhāpito. Satimaṃ kalanti mahāpathaviyā paṃsuṃ satakoṭṭhāse katvā tato ekakoṭṭhāsaṃ. Paratopi eseva nayo. Abhisametāvinoti paññāya ariyasaccāni abhisametvā ṭhitassa. Purimaṃ dukkhakkhandhaṃ parikkhīṇaṃ pariyādiṇṇaṃ upanidhāyāti etadeva bahutaraṃ dukkhaṃ, yadidaṃ parikkhīṇanti evaṃ paṭhamaṃ vuttaṃ dukkhakkhandhaṃ upanidhāya, ñāṇena taṃ tassa santike ṭhapetvā upaparikkhiyamāneti attho. Katamaṃ panettha purimadukkhaṃ nāma? Yaṃ parikkhīṇaṃ. Katamaṃ pana parikkhīṇaṃ? Yaṃ paṭhamamaggassa abhāvitattā uppajjeyya. Katamaṃ pana upanidhāya? Yaṃ sattasu attabhāvesu apāye aṭṭhamañca paṭisandhiṃ ādiṃ katvā yattha katthaci uppajjeyya, sabbaṃ taṃ parikkhīṇanti veditabbaṃ. Sattakkhattunti satta vāre, sattasu attabhāvesūti attho. Paramatāti idamassa paraṃ pamāṇanti dasseti. Mahatthiyoti mahato atthassa nipphādako. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. நக²ஸிகா²ஸுத்தங் • 1. Nakhasikhāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. நக²ஸிகா²ஸுத்தவண்ணனா • 1. Nakhasikhāsuttavaṇṇanā
