| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
২. অভিসমযসংযুত্তং
2. Abhisamayasaṃyuttaṃ
১. নখসিখাসুত্তৰণ্ণনা
1. Nakhasikhāsuttavaṇṇanā
৭৪. অভিসমযসংযুত্তস্স পঠমে নখসিখাযন্তি মংসট্ঠানেন ৰিমুত্তে নখগ্গে। নখসিখা চ নাম লোকিযানং মহতীপি হোতি, সত্থু পন রত্তুপ্পলপত্তকোটি ৰিয সুখুমা। কথং পনেত্থ পংসু পতিট্ঠিতোতি? অধিট্ঠানবলেন। ভগৰতা হি অত্থং ঞাপেতুকামেন অধিট্ঠানবলেন তত্থ পতিট্ঠাপিতো। সতিমং কলন্তি মহাপথৰিযা পংসুং সতকোট্ঠাসে কত্ৰা ততো এককোট্ঠাসং। পরতোপি এসেৰ নযো। অভিসমেতাৰিনোতি পঞ্ঞায অরিযসচ্চানি অভিসমেত্ৰা ঠিতস্স। পুরিমং দুক্খক্খন্ধং পরিক্খীণং পরিযাদিণ্ণং উপনিধাযাতি এতদেৰ বহুতরং দুক্খং, যদিদং পরিক্খীণন্তি এৰং পঠমং ৰুত্তং দুক্খক্খন্ধং উপনিধায, ঞাণেন তং তস্স সন্তিকে ঠপেত্ৰা উপপরিক্খিযমানেতি অত্থো। কতমং পনেত্থ পুরিমদুক্খং নাম? যং পরিক্খীণং। কতমং পন পরিক্খীণং? যং পঠমমগ্গস্স অভাৰিতত্তা উপ্পজ্জেয্য। কতমং পন উপনিধায? যং সত্তসু অত্তভাৰেসু অপাযে অট্ঠমঞ্চ পটিসন্ধিং আদিং কত্ৰা যত্থ কত্থচি উপ্পজ্জেয্য, সব্বং তং পরিক্খীণন্তি ৰেদিতব্বং। সত্তক্খত্তুন্তি সত্ত ৰারে, সত্তসু অত্তভাৰেসূতি অত্থো। পরমতাতি ইদমস্স পরং পমাণন্তি দস্সেতি। মহত্থিযোতি মহতো অত্থস্স নিপ্ফাদকো। পঠমং।
74. Abhisamayasaṃyuttassa paṭhame nakhasikhāyanti maṃsaṭṭhānena vimutte nakhagge. Nakhasikhā ca nāma lokiyānaṃ mahatīpi hoti, satthu pana rattuppalapattakoṭi viya sukhumā. Kathaṃ panettha paṃsu patiṭṭhitoti? Adhiṭṭhānabalena. Bhagavatā hi atthaṃ ñāpetukāmena adhiṭṭhānabalena tattha patiṭṭhāpito. Satimaṃ kalanti mahāpathaviyā paṃsuṃ satakoṭṭhāse katvā tato ekakoṭṭhāsaṃ. Paratopi eseva nayo. Abhisametāvinoti paññāya ariyasaccāni abhisametvā ṭhitassa. Purimaṃ dukkhakkhandhaṃ parikkhīṇaṃ pariyādiṇṇaṃ upanidhāyāti etadeva bahutaraṃ dukkhaṃ, yadidaṃ parikkhīṇanti evaṃ paṭhamaṃ vuttaṃ dukkhakkhandhaṃ upanidhāya, ñāṇena taṃ tassa santike ṭhapetvā upaparikkhiyamāneti attho. Katamaṃ panettha purimadukkhaṃ nāma? Yaṃ parikkhīṇaṃ. Katamaṃ pana parikkhīṇaṃ? Yaṃ paṭhamamaggassa abhāvitattā uppajjeyya. Katamaṃ pana upanidhāya? Yaṃ sattasu attabhāvesu apāye aṭṭhamañca paṭisandhiṃ ādiṃ katvā yattha katthaci uppajjeyya, sabbaṃ taṃ parikkhīṇanti veditabbaṃ. Sattakkhattunti satta vāre, sattasu attabhāvesūti attho. Paramatāti idamassa paraṃ pamāṇanti dasseti. Mahatthiyoti mahato atthassa nipphādako. Paṭhamaṃ.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. নখসিখাসুত্তং • 1. Nakhasikhāsuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. নখসিখাসুত্তৰণ্ণনা • 1. Nakhasikhāsuttavaṇṇanā
