| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೨. ಅಭಿಸಮಯಸಂಯುತ್ತಂ
2. Abhisamayasaṃyuttaṃ
೧. ನಖಸಿಖಾಸುತ್ತವಣ್ಣನಾ
1. Nakhasikhāsuttavaṇṇanā
೭೪. ಅಭಿಸಮಯಸಂಯುತ್ತಸ್ಸ ಪಠಮೇ ನಖಸಿಖಾಯನ್ತಿ ಮಂಸಟ್ಠಾನೇನ ವಿಮುತ್ತೇ ನಖಗ್ಗೇ। ನಖಸಿಖಾ ಚ ನಾಮ ಲೋಕಿಯಾನಂ ಮಹತೀಪಿ ಹೋತಿ, ಸತ್ಥು ಪನ ರತ್ತುಪ್ಪಲಪತ್ತಕೋಟಿ ವಿಯ ಸುಖುಮಾ। ಕಥಂ ಪನೇತ್ಥ ಪಂಸು ಪತಿಟ್ಠಿತೋತಿ? ಅಧಿಟ್ಠಾನಬಲೇನ। ಭಗವತಾ ಹಿ ಅತ್ಥಂ ಞಾಪೇತುಕಾಮೇನ ಅಧಿಟ್ಠಾನಬಲೇನ ತತ್ಥ ಪತಿಟ್ಠಾಪಿತೋ। ಸತಿಮಂ ಕಲನ್ತಿ ಮಹಾಪಥವಿಯಾ ಪಂಸುಂ ಸತಕೋಟ್ಠಾಸೇ ಕತ್ವಾ ತತೋ ಏಕಕೋಟ್ಠಾಸಂ। ಪರತೋಪಿ ಏಸೇವ ನಯೋ। ಅಭಿಸಮೇತಾವಿನೋತಿ ಪಞ್ಞಾಯ ಅರಿಯಸಚ್ಚಾನಿ ಅಭಿಸಮೇತ್ವಾ ಠಿತಸ್ಸ। ಪುರಿಮಂ ದುಕ್ಖಕ್ಖನ್ಧಂ ಪರಿಕ್ಖೀಣಂ ಪರಿಯಾದಿಣ್ಣಂ ಉಪನಿಧಾಯಾತಿ ಏತದೇವ ಬಹುತರಂ ದುಕ್ಖಂ, ಯದಿದಂ ಪರಿಕ್ಖೀಣನ್ತಿ ಏವಂ ಪಠಮಂ ವುತ್ತಂ ದುಕ್ಖಕ್ಖನ್ಧಂ ಉಪನಿಧಾಯ, ಞಾಣೇನ ತಂ ತಸ್ಸ ಸನ್ತಿಕೇ ಠಪೇತ್ವಾ ಉಪಪರಿಕ್ಖಿಯಮಾನೇತಿ ಅತ್ಥೋ। ಕತಮಂ ಪನೇತ್ಥ ಪುರಿಮದುಕ್ಖಂ ನಾಮ? ಯಂ ಪರಿಕ್ಖೀಣಂ। ಕತಮಂ ಪನ ಪರಿಕ್ಖೀಣಂ? ಯಂ ಪಠಮಮಗ್ಗಸ್ಸ ಅಭಾವಿತತ್ತಾ ಉಪ್ಪಜ್ಜೇಯ್ಯ। ಕತಮಂ ಪನ ಉಪನಿಧಾಯ? ಯಂ ಸತ್ತಸು ಅತ್ತಭಾವೇಸು ಅಪಾಯೇ ಅಟ್ಠಮಞ್ಚ ಪಟಿಸನ್ಧಿಂ ಆದಿಂ ಕತ್ವಾ ಯತ್ಥ ಕತ್ಥಚಿ ಉಪ್ಪಜ್ಜೇಯ್ಯ, ಸಬ್ಬಂ ತಂ ಪರಿಕ್ಖೀಣನ್ತಿ ವೇದಿತಬ್ಬಂ। ಸತ್ತಕ್ಖತ್ತುನ್ತಿ ಸತ್ತ ವಾರೇ, ಸತ್ತಸು ಅತ್ತಭಾವೇಸೂತಿ ಅತ್ಥೋ। ಪರಮತಾತಿ ಇದಮಸ್ಸ ಪರಂ ಪಮಾಣನ್ತಿ ದಸ್ಸೇತಿ। ಮಹತ್ಥಿಯೋತಿ ಮಹತೋ ಅತ್ಥಸ್ಸ ನಿಪ್ಫಾದಕೋ। ಪಠಮಂ।
74. Abhisamayasaṃyuttassa paṭhame nakhasikhāyanti maṃsaṭṭhānena vimutte nakhagge. Nakhasikhā ca nāma lokiyānaṃ mahatīpi hoti, satthu pana rattuppalapattakoṭi viya sukhumā. Kathaṃ panettha paṃsu patiṭṭhitoti? Adhiṭṭhānabalena. Bhagavatā hi atthaṃ ñāpetukāmena adhiṭṭhānabalena tattha patiṭṭhāpito. Satimaṃ kalanti mahāpathaviyā paṃsuṃ satakoṭṭhāse katvā tato ekakoṭṭhāsaṃ. Paratopi eseva nayo. Abhisametāvinoti paññāya ariyasaccāni abhisametvā ṭhitassa. Purimaṃ dukkhakkhandhaṃ parikkhīṇaṃ pariyādiṇṇaṃ upanidhāyāti etadeva bahutaraṃ dukkhaṃ, yadidaṃ parikkhīṇanti evaṃ paṭhamaṃ vuttaṃ dukkhakkhandhaṃ upanidhāya, ñāṇena taṃ tassa santike ṭhapetvā upaparikkhiyamāneti attho. Katamaṃ panettha purimadukkhaṃ nāma? Yaṃ parikkhīṇaṃ. Katamaṃ pana parikkhīṇaṃ? Yaṃ paṭhamamaggassa abhāvitattā uppajjeyya. Katamaṃ pana upanidhāya? Yaṃ sattasu attabhāvesu apāye aṭṭhamañca paṭisandhiṃ ādiṃ katvā yattha katthaci uppajjeyya, sabbaṃ taṃ parikkhīṇanti veditabbaṃ. Sattakkhattunti satta vāre, sattasu attabhāvesūti attho. Paramatāti idamassa paraṃ pamāṇanti dasseti. Mahatthiyoti mahato atthassa nipphādako. Paṭhamaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧. ನಖಸಿಖಾಸುತ್ತಂ • 1. Nakhasikhāsuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೧. ನಖಸಿಖಾಸುತ್ತವಣ್ಣನಾ • 1. Nakhasikhāsuttavaṇṇanā
