| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[165] 5. நகுலஜாதகவண்ணனா
[165] 5. Nakulajātakavaṇṇanā
ஸத்³தி⁴ங் கத்வா அமித்தேனாதி இத³ங் ஸத்தா² ஜேதவனே விஹரந்தோ ஸேணிப⁴ண்ட³னங் ஆரப்³ப⁴ கதே²ஸி. வத்து² ஹெட்டா² உரக³ஜாதகே (ஜா॰ 1.2.7-8) கதி²தஸதி³ஸமேவ. இதா⁴பி ஸத்தா² ‘‘ந, பி⁴க்க²வே, இமே த்³வே மஹாமத்தா இதா³னேவ மயா ஸமக்³கா³ கதா, புப்³பே³பாஹங் இமே ஸமக்³கே³ அகாஸிங்யேவா’’தி வத்வா அதீதங் ஆஹரி.
Saddhiṃ katvā amittenāti idaṃ satthā jetavane viharanto seṇibhaṇḍanaṃ ārabbha kathesi. Vatthu heṭṭhā uragajātake (jā. 1.2.7-8) kathitasadisameva. Idhāpi satthā ‘‘na, bhikkhave, ime dve mahāmattā idāneva mayā samaggā katā, pubbepāhaṃ ime samagge akāsiṃyevā’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ ஏகஸ்மிங் கா³மகே ப்³ராஹ்மணகுலே நிப்³ப³த்தித்வா வயப்பத்தோ தக்கஸிலாயங் ஸப்³ப³ஸிப்பானி உக்³க³ஹெத்வா க⁴ராவாஸங் பஹாய இஸிபப்³ப³ஜ்ஜங் பப்³ப³ஜித்வா அபி⁴ஞ்ஞா ச ஸமாபத்தியோ ச நிப்³ப³த்தெத்வா உஞ்சா²சரியாய வனமூலப²லாஹாரோ ஹிமவந்தபதே³ஸே வாஸங் கப்பேஸி. தஸ்ஸ சங்கமனகோடியங் ஏகஸ்மிங் வம்மிகே நகுலோ, தஸ்ஸேவ ஸந்திகே ஏகஸ்மிங் ருக்க²பி³லே ஸப்போ ச வாஸங் கப்பேஸி. தே உபோ⁴பி அஹினகுலா நிச்சகாலங் கலஹங் கரொந்தி. போ³தி⁴ஸத்தோ தேஸங் கலஹே ஆதீ³னவஞ்ச மெத்தாபா⁴வனாய ச ஆனிஸங்ஸங் கதெ²த்வா ‘‘கலஹங் நாம அகத்வா ஸமக்³க³வாஸங் வஸிதுங் வட்டதீ’’தி ஓவதி³த்வா உபோ⁴பி தே ஸமக்³கே³ அகாஸி. அத² ஸப்பஸ்ஸ ப³ஹினிக்க²ந்தகாலே நகுலோ சங்கமனகோடியங் வம்மிகஸ்ஸ பி³லத்³வாரே ஸீஸங் நீஹரித்வா முக²ங் விவரித்வா நிபன்னோ அஸ்ஸஸந்தோ பஸ்ஸஸந்தோ நித்³த³ங் உபக³ஞ்சி². போ³தி⁴ஸத்தோ தங் ததா² நித்³தா³யமானங் தி³ஸ்வா ‘‘கிங் நு கோ² தே நிஸ்ஸாய ப⁴யங் உப்பன்ன’’ந்தி புச்ச²ந்தோ பட²மங் கா³த²மாஹ –
Atīte bārāṇasiyaṃ brahmadatte rajjaṃ kārente bodhisatto ekasmiṃ gāmake brāhmaṇakule nibbattitvā vayappatto takkasilāyaṃ sabbasippāni uggahetvā gharāvāsaṃ pahāya isipabbajjaṃ pabbajitvā abhiññā ca samāpattiyo ca nibbattetvā uñchācariyāya vanamūlaphalāhāro himavantapadese vāsaṃ kappesi. Tassa caṅkamanakoṭiyaṃ ekasmiṃ vammike nakulo, tasseva santike ekasmiṃ rukkhabile sappo ca vāsaṃ kappesi. Te ubhopi ahinakulā niccakālaṃ kalahaṃ karonti. Bodhisatto tesaṃ kalahe ādīnavañca mettābhāvanāya ca ānisaṃsaṃ kathetvā ‘‘kalahaṃ nāma akatvā samaggavāsaṃ vasituṃ vaṭṭatī’’ti ovaditvā ubhopi te samagge akāsi. Atha sappassa bahinikkhantakāle nakulo caṅkamanakoṭiyaṃ vammikassa biladvāre sīsaṃ nīharitvā mukhaṃ vivaritvā nipanno assasanto passasanto niddaṃ upagañchi. Bodhisatto taṃ tathā niddāyamānaṃ disvā ‘‘kiṃ nu kho te nissāya bhayaṃ uppanna’’nti pucchanto paṭhamaṃ gāthamāha –
29.
29.
‘‘ஸந்தி⁴ங் கத்வா அமித்தேன, அண்ட³ஜேன ஜலாபு³ஜ;
‘‘Sandhiṃ katvā amittena, aṇḍajena jalābuja;
விவரிய தா³ட²ங் ஸேஸி, குதோ தே ப⁴யமாக³த’’ந்தி.
Vivariya dāṭhaṃ sesi, kuto te bhayamāgata’’nti.
தத்த² ஸந்தி⁴ங் கத்வாதி மித்தபா⁴வங் கரித்வா. அண்ட³ஜேனாதி அண்ட³கோஸே நிப்³ப³த்தேன நாகே³ன. ஜலாபு³ஜாதி நகுலங் ஆலபதி. ஸோ ஹி ஜலாபு³ம்ஹி ஜாதத்தா ‘‘ஜலாபு³ஜோ’’தி வுச்சதி. விவரியாதி விவரித்வா.
Tattha sandhiṃ katvāti mittabhāvaṃ karitvā. Aṇḍajenāti aṇḍakose nibbattena nāgena. Jalābujāti nakulaṃ ālapati. So hi jalābumhi jātattā ‘‘jalābujo’’ti vuccati. Vivariyāti vivaritvā.
ஏவங் போ³தி⁴ஸத்தேன வுத்தோ நகுலோ ‘‘அய்ய, பச்சாமித்தோ நாம ந அவஜானிதப்³போ³ ஆஸங்கிதப்³போ³யேவா’’தி வத்வா து³தியங் கா³த²மாஹ –
Evaṃ bodhisattena vutto nakulo ‘‘ayya, paccāmitto nāma na avajānitabbo āsaṅkitabboyevā’’ti vatvā dutiyaṃ gāthamāha –
30.
30.
‘‘ஸங்கேதே²வ அமித்தஸ்மிங், மித்தஸ்மிம்பி ந விஸ்ஸஸே;
‘‘Saṅketheva amittasmiṃ, mittasmimpi na vissase;
அப⁴யா ப⁴யமுப்பன்னங், அபி மூலானி கந்ததீ’’தி.
Abhayā bhayamuppannaṃ, api mūlāni kantatī’’ti.
தத்த² அப⁴யா ப⁴யமுப்பன்னந்தி ந இதோ தே ப⁴யமுப்பன்னந்தி அப⁴யோ, கோ ஸோ? மித்தோ. யஞ்ஹி மித்தஸ்மிம்பி விஸ்ஸாஸே ஸதி ததோ ப⁴யங் உப்பஜ்ஜதி, தங் மூலானிபி கந்ததி, மித்தஸ்ஸ ஸப்³ப³ரந்தா⁴னங் விதி³தத்தா மூலக⁴ச்சாய ஸங்வத்ததீதி அத்தோ².
Tattha abhayā bhayamuppannanti na ito te bhayamuppannanti abhayo, ko so? Mitto. Yañhi mittasmimpi vissāse sati tato bhayaṃ uppajjati, taṃ mūlānipi kantati, mittassa sabbarandhānaṃ viditattā mūlaghaccāya saṃvattatīti attho.
அத² நங் போ³தி⁴ஸத்தோ ‘‘மா பா⁴யி, யதா² ஸப்போ தயி ந து³ப்³ப⁴தி, ஏவமஹங் கரிஸ்ஸாமி, த்வங் இதோ பட்டா²ய தஸ்மிங் ஆஸங்கங் மா கரீ’’தி ஓவதி³த்வா சத்தாரோ ப்³ரஹ்மவிஹாரே பா⁴வெத்வா ப்³ரஹ்மலோகபராயணோ அஹோஸி. தேபி யதா²கம்மங் க³தா.
Atha naṃ bodhisatto ‘‘mā bhāyi, yathā sappo tayi na dubbhati, evamahaṃ karissāmi, tvaṃ ito paṭṭhāya tasmiṃ āsaṅkaṃ mā karī’’ti ovaditvā cattāro brahmavihāre bhāvetvā brahmalokaparāyaṇo ahosi. Tepi yathākammaṃ gatā.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ ஸப்போ ச நகுலோ ச இமே த்³வே மஹாமத்தா அஹேஸுங், தாபஸோ பன அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā sappo ca nakulo ca ime dve mahāmattā ahesuṃ, tāpaso pana ahameva ahosi’’nti.
நகுலஜாதகவண்ணனா பஞ்சமா.
Nakulajātakavaṇṇanā pañcamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 165. நகுலஜாதகங் • 165. Nakulajātakaṃ
