| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৮. নকুলমাতাসুত্তং
8. Nakulamātāsuttaṃ
৪৮. একং সমযং ভগৰা ভগ্গেসু ৰিহরতি সুংসুমারগিরে 1 ভেসকল়াৰনে মিগদাযে। অথ খো নকুলমাতা গহপতানী যেন ভগৰা তেনুপসঙ্কমি; উপসঙ্কমিত্ৰা…পে॰…। একমন্তং নিসিন্নং খো নকুলমাতরং গহপতানিং ভগৰা এতদৰোচ –
48. Ekaṃ samayaṃ bhagavā bhaggesu viharati suṃsumāragire 2 bhesakaḷāvane migadāye. Atha kho nakulamātā gahapatānī yena bhagavā tenupasaṅkami; upasaṅkamitvā…pe…. Ekamantaṃ nisinnaṃ kho nakulamātaraṃ gahapatāniṃ bhagavā etadavoca –
‘‘অট্ঠহি খো, নকুলমাতে, ধম্মেহি সমন্নাগতো মাতুগামো কাযস্স ভেদা পরং মরণা মনাপকাযিকানং দেৰানং সহব্যতং উপপজ্জতি। কতমেহি অট্ঠহি? ইধ, নকুলমাতে, মাতুগামো যস্স মাতাপিতরো ভত্তুনো দেন্তি অত্থকামা হিতেসিনো অনুকম্পকা অনুকম্পং উপাদায তস্স হোতি পুব্বুট্ঠাযিনী পচ্ছানিপাতিনী কিঙ্কারপটিস্সাৰিনী মনাপচারিনী পিযৰাদিনী।
‘‘Aṭṭhahi kho, nakulamāte, dhammehi samannāgato mātugāmo kāyassa bhedā paraṃ maraṇā manāpakāyikānaṃ devānaṃ sahabyataṃ upapajjati. Katamehi aṭṭhahi? Idha, nakulamāte, mātugāmo yassa mātāpitaro bhattuno denti atthakāmā hitesino anukampakā anukampaṃ upādāya tassa hoti pubbuṭṭhāyinī pacchānipātinī kiṅkārapaṭissāvinī manāpacārinī piyavādinī.
‘‘যে তে ভত্তু গরুনো হোন্তি – মাতাতি ৰা পিতাতি ৰা সমণব্রাহ্মণাতি ৰা – তে সক্করোতি গরুং করোতি মানেতি পূজেতি, অব্ভাগতে চ আসনোদকেন পটিপূজেতি।
‘‘Ye te bhattu garuno honti – mātāti vā pitāti vā samaṇabrāhmaṇāti vā – te sakkaroti garuṃ karoti māneti pūjeti, abbhāgate ca āsanodakena paṭipūjeti.
‘‘যে তে ভত্তু অব্ভন্তরা কম্মন্তা – উণ্ণাতি ৰা কপ্পাসাতি ৰা – তত্থ দক্খা হোতি অনলসা তত্রুপাযায ৰীমংসায সমন্নাগতা অলং কাতুং অলং সংৰিধাতুং।
‘‘Ye te bhattu abbhantarā kammantā – uṇṇāti vā kappāsāti vā – tattha dakkhā hoti analasā tatrupāyāya vīmaṃsāya samannāgatā alaṃ kātuṃ alaṃ saṃvidhātuṃ.
‘‘যো সো ভত্তু অব্ভন্তরো অন্তোজনো – দাসাতি ৰা পেস্সাতি ৰা কম্মকরাতি ৰা – তেসং কতঞ্চ কততো জানাতি অকতঞ্চ অকততো জানাতি, গিলানকানঞ্চ বলাবলং জানাতি খাদনীযং ভোজনীযঞ্চস্স পচ্চংসেন সংৰিভজতি।
‘‘Yo so bhattu abbhantaro antojano – dāsāti vā pessāti vā kammakarāti vā – tesaṃ katañca katato jānāti akatañca akatato jānāti, gilānakānañca balābalaṃ jānāti khādanīyaṃ bhojanīyañcassa paccaṃsena saṃvibhajati.
‘‘যং ভত্তা আহরতি ধনং ৰা ধঞ্ঞং ৰা রজতং ৰা জাতরূপং ৰা তং আরক্খেন গুত্তিযা সম্পাদেতি, তত্থ চ হোতি অধুত্তী অথেনী অসোণ্ডী অৰিনাসিকা।
‘‘Yaṃ bhattā āharati dhanaṃ vā dhaññaṃ vā rajataṃ vā jātarūpaṃ vā taṃ ārakkhena guttiyā sampādeti, tattha ca hoti adhuttī athenī asoṇḍī avināsikā.
‘‘উপাসিকা খো পন হোতি বুদ্ধং সরণং গতা ধম্মং সরণং গতা সঙ্ঘং সরণং গতা।
‘‘Upāsikā kho pana hoti buddhaṃ saraṇaṃ gatā dhammaṃ saraṇaṃ gatā saṅghaṃ saraṇaṃ gatā.
‘‘সীলৰতী খো পন হোতি – পাণাতিপাতা পটিৰিরতা…পে॰… সুরামেরযমজ্জপমাদট্ঠানা পটিৰিরতা…পে॰…।
‘‘Sīlavatī kho pana hoti – pāṇātipātā paṭiviratā…pe… surāmerayamajjapamādaṭṭhānā paṭiviratā…pe….
‘‘চাগৰতী খো পন হোতি ৰিগতমলমচ্ছেরেন চেতসা অগারং অজ্ঝাৰসতি মুত্তচাগা পযতপাণিনী ৰোস্সগ্গরতা যাচযোগা দানসংৰিভাগরতা।
‘‘Cāgavatī kho pana hoti vigatamalamaccherena cetasā agāraṃ ajjhāvasati muttacāgā payatapāṇinī vossaggaratā yācayogā dānasaṃvibhāgaratā.
‘‘ইমেহি খো, নকুলমাতে, অট্ঠহি ধম্মেহি সমন্নাগতো মাতুগামো কাযস্স ভেদা পরং মরণা মনাপকাযিকানং দেৰানং সহব্যতং উপপজ্জতী’’তি।
‘‘Imehi kho, nakulamāte, aṭṭhahi dhammehi samannāgato mātugāmo kāyassa bhedā paraṃ maraṇā manāpakāyikānaṃ devānaṃ sahabyataṃ upapajjatī’’ti.
‘‘যো নং ভরতি সব্বদা, নিচ্চং আতাপি উস্সুকো।
‘‘Yo naṃ bharati sabbadā, niccaṃ ātāpi ussuko;
তং সব্বকামদং পোসং, ভত্তারং নাতিমঞ্ঞতি॥
Taṃ sabbakāmadaṃ posaṃ, bhattāraṃ nātimaññati.
‘‘ন চাপি সোত্থি ভত্তারং, ইস্সাৰাদেন রোসযে।
‘‘Na cāpi sotthi bhattāraṃ, issāvādena rosaye;
ভত্তু চ গরুনো সব্বে, পটিপূজেতি পণ্ডিতা॥
Bhattu ca garuno sabbe, paṭipūjeti paṇḍitā.
‘‘উট্ঠাহিকা অনলসা, সঙ্গহিতপরিজ্জনা।
‘‘Uṭṭhāhikā analasā, saṅgahitaparijjanā;
ভত্তু মনাপং চরতি, সম্ভতং অনুরক্খতি॥
Bhattu manāpaṃ carati, sambhataṃ anurakkhati.
‘‘যা এৰং ৰত্ততি নারী, ভত্তু ছন্দৰসানুগা।
‘‘Yā evaṃ vattati nārī, bhattu chandavasānugā;
Footnotes:
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৮. সংখিত্তূপোসথসুত্তাদিৰণ্ণনা • 1-8. Saṃkhittūposathasuttādivaṇṇanā
