| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. நகுலபிதுஸுத்தவண்ணனா
6. Nakulapitusuttavaṇṇanā
16. ச²ட்டே² பா³ள்ஹகி³லானோதி அதி⁴மத்தகி³லானோ. ஏதத³வோசாதி ஸாமிகஸ்ஸ பே⁴ஸஜ்ஜங் கத்வா ப்³யாதி⁴ங் வூபஸமேதுங் அஸக்கொந்தீ இதா³னி ஸீஹனாத³ங் நதி³த்வா ஸச்சகிரியாய ப்³யாதி⁴ங் வூபஸமேதுங் ஸந்திகே நிஸீதி³த்வா ஏதங் ‘‘மா கோ² த்வ’’ந்திஆதி³வசனங் அவோச. ஸாபெக்கோ²தி ஸதண்ஹோ. ந நகுலமாதாதி எத்த² ந-காரோ ந ஸக்க²தீதி ஏவங் பரபதே³ன யோஜேதப்³போ³. ஸந்த²ரிதுந்தி நிச்சி²த்³த³ங் காதுங், ஸண்ட²பேதுந்தி அத்தோ². வேணிங் ஓலிகி²துந்தி ஏளகலோமானி கப்பெத்வா விஜடெத்வா வேணிங் காதுங்.
16. Chaṭṭhe bāḷhagilānoti adhimattagilāno. Etadavocāti sāmikassa bhesajjaṃ katvā byādhiṃ vūpasametuṃ asakkontī idāni sīhanādaṃ naditvā saccakiriyāya byādhiṃ vūpasametuṃ santike nisīditvā etaṃ ‘‘mā kho tva’’ntiādivacanaṃ avoca. Sāpekkhoti sataṇho. Na nakulamātāti ettha na-kāro na sakkhatīti evaṃ parapadena yojetabbo. Santharitunti nicchiddaṃ kātuṃ, saṇṭhapetunti attho. Veṇiṃ olikhitunti eḷakalomāni kappetvā vijaṭetvā veṇiṃ kātuṃ.
அஞ்ஞங் க⁴ரங் க³மிஸ்ஸதீதி அஞ்ஞங் ஸாமிகங் க³ண்ஹிஸ்ஸதி. ஸோளஸ வஸ்ஸானி க³ஹட்ட²கங் ப்³ரஹ்மசரியங் ஸமாசிண்ணந்தி இதோ ஸோளஸவஸ்ஸமத்த²கே க³ஹட்ட²ப்³ரஹ்மசரியவாஸோ ஸமாசிண்ணோ. த³ஸ்ஸனகாமதராதி அதிரேகேன த³ஸ்ஸனகாமா. இமேஹி தீஹி அங்கே³ஹி ஸீஹனாத³ங் நதி³த்வா ‘‘இமினா ஸச்சேன தவ ஸரீரே ப்³யாதி⁴ பா²ஸு ஹோதூ’’தி ஸச்சகிரியங் அகாஸி.
Aññaṃ gharaṃ gamissatīti aññaṃ sāmikaṃ gaṇhissati. Soḷasa vassāni gahaṭṭhakaṃ brahmacariyaṃ samāciṇṇanti ito soḷasavassamatthake gahaṭṭhabrahmacariyavāso samāciṇṇo. Dassanakāmatarāti atirekena dassanakāmā. Imehi tīhi aṅgehi sīhanādaṃ naditvā ‘‘iminā saccena tava sarīre byādhi phāsu hotū’’ti saccakiriyaṃ akāsi.
இதா³னி ப⁴க³வந்தங் ஸக்கி²ங் கத்வா அத்தனோ ஸீலாதி³கு³ணேஹிபி ஸச்சகிரியங் காதுங் ஸியா கோ² பன தேதிஆதி³மாஹ. தத்த² பரிபூரகாரினீதி ஸமத்தகாரினீ. சேதோஸமத²ஸ்ஸாதி ஸமாதி⁴கம்மட்டா²னஸ்ஸ. ஓகா³த⁴ப்பத்தாதி ஓகா³த⁴ங் அனுப்பவேஸங் பத்தா. பதிகா³த⁴ப்பத்தாதி பதிகா³த⁴ங் பதிட்ட²ங் பத்தா. அஸ்ஸாஸப்பத்தாதி அஸ்ஸாஸங் அவஸ்ஸயங் பத்தா. வேஸாரஜ்ஜப்பத்தாதி ஸோமனஸ்ஸஞாணங் பத்தா. அபரப்பச்சயாதி பரப்பச்சயோ வுச்சதி பரஸத்³தா⁴ பரபத்தியாயனா, தாய விரஹிதாதி அத்தோ². இமேஹி தீஹி அங்கே³ஹி அத்தனோ கு³ணே ஆரப்³ப⁴ ஸச்சகிரியங் அகாஸி. கி³லானா வுட்டி²தோதி கி³லானோ ஹுத்வா வுட்டி²தோ. யாவதாதி யத்திகாயோ. தாஸங் அஞ்ஞதராதி தாஸங் அந்தரே ஏகா. அனுகம்பிகாதி ஹிதானுகம்பிகா. ஓவாதி³காதி ஓவாத³தா³யிகா. அனுஸாஸிகாதி அனுஸிட்டி²தா³யிகா.
Idāni bhagavantaṃ sakkhiṃ katvā attano sīlādiguṇehipi saccakiriyaṃ kātuṃ siyā khopana tetiādimāha. Tattha paripūrakārinīti samattakārinī. Cetosamathassāti samādhikammaṭṭhānassa. Ogādhappattāti ogādhaṃ anuppavesaṃ pattā. Patigādhappattāti patigādhaṃ patiṭṭhaṃ pattā. Assāsappattāti assāsaṃ avassayaṃ pattā. Vesārajjappattāti somanassañāṇaṃ pattā. Aparappaccayāti parappaccayo vuccati parasaddhā parapattiyāyanā, tāya virahitāti attho. Imehi tīhi aṅgehi attano guṇe ārabbha saccakiriyaṃ akāsi. Gilānā vuṭṭhitoti gilāno hutvā vuṭṭhito. Yāvatāti yattikāyo. Tāsaṃ aññatarāti tāsaṃ antare ekā. Anukampikāti hitānukampikā. Ovādikāti ovādadāyikā. Anusāsikāti anusiṭṭhidāyikā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. நகுலபிதுஸுத்தங் • 6. Nakulapitusuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. நகுலபிதுஸுத்தவண்ணனா • 6. Nakulapitusuttavaṇṇanā
