| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৬. নকুলপিতুসুত্তৰণ্ণনা
6. Nakulapitusuttavaṇṇanā
১৬. ছট্ঠে ৰিসভাগৰেদনুপ্পত্তিযা ককচেনেৰ চতুইরিযাপথং ছিন্দন্তো আবাধযতীতি আবাধো, সো যস্স অত্থীতি আবাধিকো। তংসমুট্ঠানদুক্খেন দুক্খিতো। অধিমত্তগিলানোতি ধাতুসঙ্খযেন পরিক্খীণসরীরো।
16. Chaṭṭhe visabhāgavedanuppattiyā kakaceneva catuiriyāpathaṃ chindanto ābādhayatīti ābādho, so yassa atthīti ābādhiko. Taṃsamuṭṭhānadukkhena dukkhito. Adhimattagilānoti dhātusaṅkhayena parikkhīṇasarīro.
সপ্পটিভযকন্তারসদিসা সোল়সৰত্থুকা অট্ঠৰত্থুকা চ ৰিচিকিচ্ছা তিণ্ণা ইমাযাতি তিণ্ণৰিচিকিচ্ছা। ৰিগতা সমুচ্ছিন্না পৰত্তিআদীসু ‘‘এৰং নু খো ন নু খো’’তি এৰং পৰত্তিকা কথংকথা অস্সাতি ৰিগতকথংকথা। সারজ্জকরানং পাপধম্মানং পহীনত্তা রাগৰিক্খেপেসু সীলাদিগুণেসু চ তিট্ঠকত্তা ৰেসারজ্জং, ৰিসারদভাৰং ৰেয্যত্তিযং পত্তাতি ৰেসারজ্জপ্পত্তা। অত্তনা এৰ পচ্চক্খতো দিট্ঠত্তা ন পরং পচ্চেতি, নস্স পরো পচ্চেতব্বো অত্থীতি অপরপ্পচ্চযা।
Sappaṭibhayakantārasadisā soḷasavatthukā aṭṭhavatthukā ca vicikicchā tiṇṇā imāyāti tiṇṇavicikicchā. Vigatā samucchinnā pavattiādīsu ‘‘evaṃ nu kho na nu kho’’ti evaṃ pavattikā kathaṃkathā assāti vigatakathaṃkathā. Sārajjakarānaṃ pāpadhammānaṃ pahīnattā rāgavikkhepesu sīlādiguṇesu ca tiṭṭhakattā vesārajjaṃ, visāradabhāvaṃ veyyattiyaṃ pattāti vesārajjappattā. Attanā eva paccakkhato diṭṭhattā na paraṃ pacceti, nassa paro paccetabbo atthīti aparappaccayā.
গিলানা ৰুট্ঠিতোতি গিলানভাৰতো ৰুট্ঠায ঠিতো। ভাৰপ্পধানো হি অযং নিদ্দেসো। গিলানো হুত্ৰা ৰুট্ঠিতোতি ইদং পন অত্থমত্তনিদস্সনং।
Gilānā vuṭṭhitoti gilānabhāvato vuṭṭhāya ṭhito. Bhāvappadhāno hi ayaṃ niddeso. Gilāno hutvā vuṭṭhitoti idaṃ pana atthamattanidassanaṃ.
নকুলপিতুসুত্তৰণ্ণনা নিট্ঠিতা।
Nakulapitusuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৬. নকুলপিতুসুত্তং • 6. Nakulapitusuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৬. নকুলপিতুসুত্তৰণ্ণনা • 6. Nakulapitusuttavaṇṇanā
