| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೬. ನಕುಲಪಿತುಸುತ್ತವಣ್ಣನಾ
6. Nakulapitusuttavaṇṇanā
೧೬. ಛಟ್ಠೇ ಬಾಳ್ಹಗಿಲಾನೋತಿ ಅಧಿಮತ್ತಗಿಲಾನೋ। ಏತದವೋಚಾತಿ ಸಾಮಿಕಸ್ಸ ಭೇಸಜ್ಜಂ ಕತ್ವಾ ಬ್ಯಾಧಿಂ ವೂಪಸಮೇತುಂ ಅಸಕ್ಕೋನ್ತೀ ಇದಾನಿ ಸೀಹನಾದಂ ನದಿತ್ವಾ ಸಚ್ಚಕಿರಿಯಾಯ ಬ್ಯಾಧಿಂ ವೂಪಸಮೇತುಂ ಸನ್ತಿಕೇ ನಿಸೀದಿತ್ವಾ ಏತಂ ‘‘ಮಾ ಖೋ ತ್ವ’’ನ್ತಿಆದಿವಚನಂ ಅವೋಚ। ಸಾಪೇಕ್ಖೋತಿ ಸತಣ್ಹೋ। ನ ನಕುಲಮಾತಾತಿ ಏತ್ಥ ನ-ಕಾರೋ ನ ಸಕ್ಖತೀತಿ ಏವಂ ಪರಪದೇನ ಯೋಜೇತಬ್ಬೋ। ಸನ್ಥರಿತುನ್ತಿ ನಿಚ್ಛಿದ್ದಂ ಕಾತುಂ, ಸಣ್ಠಪೇತುನ್ತಿ ಅತ್ಥೋ। ವೇಣಿಂ ಓಲಿಖಿತುನ್ತಿ ಏಳಕಲೋಮಾನಿ ಕಪ್ಪೇತ್ವಾ ವಿಜಟೇತ್ವಾ ವೇಣಿಂ ಕಾತುಂ।
16. Chaṭṭhe bāḷhagilānoti adhimattagilāno. Etadavocāti sāmikassa bhesajjaṃ katvā byādhiṃ vūpasametuṃ asakkontī idāni sīhanādaṃ naditvā saccakiriyāya byādhiṃ vūpasametuṃ santike nisīditvā etaṃ ‘‘mā kho tva’’ntiādivacanaṃ avoca. Sāpekkhoti sataṇho. Na nakulamātāti ettha na-kāro na sakkhatīti evaṃ parapadena yojetabbo. Santharitunti nicchiddaṃ kātuṃ, saṇṭhapetunti attho. Veṇiṃ olikhitunti eḷakalomāni kappetvā vijaṭetvā veṇiṃ kātuṃ.
ಅಞ್ಞಂ ಘರಂ ಗಮಿಸ್ಸತೀತಿ ಅಞ್ಞಂ ಸಾಮಿಕಂ ಗಣ್ಹಿಸ್ಸತಿ। ಸೋಳಸ ವಸ್ಸಾನಿ ಗಹಟ್ಠಕಂ ಬ್ರಹ್ಮಚರಿಯಂ ಸಮಾಚಿಣ್ಣನ್ತಿ ಇತೋ ಸೋಳಸವಸ್ಸಮತ್ಥಕೇ ಗಹಟ್ಠಬ್ರಹ್ಮಚರಿಯವಾಸೋ ಸಮಾಚಿಣ್ಣೋ। ದಸ್ಸನಕಾಮತರಾತಿ ಅತಿರೇಕೇನ ದಸ್ಸನಕಾಮಾ। ಇಮೇಹಿ ತೀಹಿ ಅಙ್ಗೇಹಿ ಸೀಹನಾದಂ ನದಿತ್ವಾ ‘‘ಇಮಿನಾ ಸಚ್ಚೇನ ತವ ಸರೀರೇ ಬ್ಯಾಧಿ ಫಾಸು ಹೋತೂ’’ತಿ ಸಚ್ಚಕಿರಿಯಂ ಅಕಾಸಿ।
Aññaṃ gharaṃ gamissatīti aññaṃ sāmikaṃ gaṇhissati. Soḷasa vassāni gahaṭṭhakaṃ brahmacariyaṃ samāciṇṇanti ito soḷasavassamatthake gahaṭṭhabrahmacariyavāso samāciṇṇo. Dassanakāmatarāti atirekena dassanakāmā. Imehi tīhi aṅgehi sīhanādaṃ naditvā ‘‘iminā saccena tava sarīre byādhi phāsu hotū’’ti saccakiriyaṃ akāsi.
ಇದಾನಿ ಭಗವನ್ತಂ ಸಕ್ಖಿಂ ಕತ್ವಾ ಅತ್ತನೋ ಸೀಲಾದಿಗುಣೇಹಿಪಿ ಸಚ್ಚಕಿರಿಯಂ ಕಾತುಂ ಸಿಯಾ ಖೋ ಪನ ತೇತಿಆದಿಮಾಹ। ತತ್ಥ ಪರಿಪೂರಕಾರಿನೀತಿ ಸಮತ್ತಕಾರಿನೀ। ಚೇತೋಸಮಥಸ್ಸಾತಿ ಸಮಾಧಿಕಮ್ಮಟ್ಠಾನಸ್ಸ। ಓಗಾಧಪ್ಪತ್ತಾತಿ ಓಗಾಧಂ ಅನುಪ್ಪವೇಸಂ ಪತ್ತಾ। ಪತಿಗಾಧಪ್ಪತ್ತಾತಿ ಪತಿಗಾಧಂ ಪತಿಟ್ಠಂ ಪತ್ತಾ। ಅಸ್ಸಾಸಪ್ಪತ್ತಾತಿ ಅಸ್ಸಾಸಂ ಅವಸ್ಸಯಂ ಪತ್ತಾ। ವೇಸಾರಜ್ಜಪ್ಪತ್ತಾತಿ ಸೋಮನಸ್ಸಞಾಣಂ ಪತ್ತಾ। ಅಪರಪ್ಪಚ್ಚಯಾತಿ ಪರಪ್ಪಚ್ಚಯೋ ವುಚ್ಚತಿ ಪರಸದ್ಧಾ ಪರಪತ್ತಿಯಾಯನಾ, ತಾಯ ವಿರಹಿತಾತಿ ಅತ್ಥೋ। ಇಮೇಹಿ ತೀಹಿ ಅಙ್ಗೇಹಿ ಅತ್ತನೋ ಗುಣೇ ಆರಬ್ಭ ಸಚ್ಚಕಿರಿಯಂ ಅಕಾಸಿ। ಗಿಲಾನಾ ವುಟ್ಠಿತೋತಿ ಗಿಲಾನೋ ಹುತ್ವಾ ವುಟ್ಠಿತೋ। ಯಾವತಾತಿ ಯತ್ತಿಕಾಯೋ। ತಾಸಂ ಅಞ್ಞತರಾತಿ ತಾಸಂ ಅನ್ತರೇ ಏಕಾ। ಅನುಕಮ್ಪಿಕಾತಿ ಹಿತಾನುಕಮ್ಪಿಕಾ। ಓವಾದಿಕಾತಿ ಓವಾದದಾಯಿಕಾ। ಅನುಸಾಸಿಕಾತಿ ಅನುಸಿಟ್ಠಿದಾಯಿಕಾ।
Idāni bhagavantaṃ sakkhiṃ katvā attano sīlādiguṇehipi saccakiriyaṃ kātuṃ siyā khopana tetiādimāha. Tattha paripūrakārinīti samattakārinī. Cetosamathassāti samādhikammaṭṭhānassa. Ogādhappattāti ogādhaṃ anuppavesaṃ pattā. Patigādhappattāti patigādhaṃ patiṭṭhaṃ pattā. Assāsappattāti assāsaṃ avassayaṃ pattā. Vesārajjappattāti somanassañāṇaṃ pattā. Aparappaccayāti parappaccayo vuccati parasaddhā parapattiyāyanā, tāya virahitāti attho. Imehi tīhi aṅgehi attano guṇe ārabbha saccakiriyaṃ akāsi. Gilānā vuṭṭhitoti gilāno hutvā vuṭṭhito. Yāvatāti yattikāyo. Tāsaṃ aññatarāti tāsaṃ antare ekā. Anukampikāti hitānukampikā. Ovādikāti ovādadāyikā. Anusāsikāti anusiṭṭhidāyikā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೬. ನಕುಲಪಿತುಸುತ್ತಂ • 6. Nakulapitusuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೬. ನಕುಲಪಿತುಸುತ್ತವಣ್ಣನಾ • 6. Nakulapitusuttavaṇṇanā
