| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
6. නකුලපිතුසුත්‌තවණ්‌ණනා
6. Nakulapitusuttavaṇṇanā
16. ඡට්‌ඨෙ බාළ්‌හගිලානොති අධිමත්‌තගිලානො. එතදවොචාති සාමිකස්‌ස භෙසජ්‌ජං කත්‌වා බ්‍යාධිං වූපසමෙතුං අසක්‌කොන්‌තී ඉදානි සීහනාදං නදිත්‌වා සච්‌චකිරියාය බ්‍යාධිං වූපසමෙතුං සන්‌තිකෙ නිසීදිත්‌වා එතං ‘‘මා ඛො ත්‌ව’’න්‌තිආදිවචනං අවොච. සාපෙක්‌ඛොති සතණ්‌හො. න නකුලමාතාති එත්‌ථ න-කාරො න සක්‌ඛතීති එවං පරපදෙන යොජෙතබ්‌බො. සන්‌ථරිතුන්‌ති නිච්‌ඡිද්‌දං කාතුං, සණ්‌ඨපෙතුන්‌ති අත්‌ථො. වෙණිං ඔලිඛිතුන්‌ති එළකලොමානි කප්‌පෙත්‌වා විජටෙත්‌වා වෙණිං කාතුං.
16. Chaṭṭhe bāḷhagilānoti adhimattagilāno. Etadavocāti sāmikassa bhesajjaṃ katvā byādhiṃ vūpasametuṃ asakkontī idāni sīhanādaṃ naditvā saccakiriyāya byādhiṃ vūpasametuṃ santike nisīditvā etaṃ ‘‘mā kho tva’’ntiādivacanaṃ avoca. Sāpekkhoti sataṇho. Na nakulamātāti ettha na-kāro na sakkhatīti evaṃ parapadena yojetabbo. Santharitunti nicchiddaṃ kātuṃ, saṇṭhapetunti attho. Veṇiṃ olikhitunti eḷakalomāni kappetvā vijaṭetvā veṇiṃ kātuṃ.
අඤ්‌ඤං ඝරං ගමිස්‌සතීති අඤ්‌ඤං සාමිකං ගණ්‌හිස්‌සති. සොළස වස්‌සානි ගහට්‌ඨකං බ්‍රහ්‌මචරියං සමාචිණ්‌ණන්‌ති ඉතො සොළසවස්‌සමත්‌ථකෙ ගහට්‌ඨබ්‍රහ්‌මචරියවාසො සමාචිණ්‌ණො. දස්‌සනකාමතරාති අතිරෙකෙන දස්‌සනකාමා. ඉමෙහි තීහි අඞ්‌ගෙහි සීහනාදං නදිත්‌වා ‘‘ඉමිනා සච්‌චෙන තව සරීරෙ බ්‍යාධි ඵාසු හොතූ’’ති සච්‌චකිරියං අකාසි.
Aññaṃ gharaṃ gamissatīti aññaṃ sāmikaṃ gaṇhissati. Soḷasa vassāni gahaṭṭhakaṃ brahmacariyaṃ samāciṇṇanti ito soḷasavassamatthake gahaṭṭhabrahmacariyavāso samāciṇṇo. Dassanakāmatarāti atirekena dassanakāmā. Imehi tīhi aṅgehi sīhanādaṃ naditvā ‘‘iminā saccena tava sarīre byādhi phāsu hotū’’ti saccakiriyaṃ akāsi.
ඉදානි භගවන්‌තං සක්‌ඛිං කත්‌වා අත්‌තනො සීලාදිගුණෙහිපි සච්‌චකිරියං කාතුං සියා ඛො පන තෙතිආදිමාහ. තත්‌ථ පරිපූරකාරිනීති සමත්‌තකාරිනී. චෙතොසමථස්‌සාති සමාධිකම්‌මට්‌ඨානස්‌ස. ඔගාධප්‌පත්‌තාති ඔගාධං අනුප්‌පවෙසං පත්‌තා. පතිගාධප්‌පත්‌තාති පතිගාධං පතිට්‌ඨං පත්‌තා. අස්‌සාසප්‌පත්‌තාති අස්‌සාසං අවස්‌සයං පත්‌තා. වෙසාරජ්‌ජප්‌පත්‌තාති සොමනස්‌සඤාණං පත්‌තා. අපරප්‌පච්‌චයාති පරප්‌පච්‌චයො වුච්‌චති පරසද්‌ධා පරපත්‌තියායනා, තාය විරහිතාති අත්‌ථො. ඉමෙහි තීහි අඞ්‌ගෙහි අත්‌තනො ගුණෙ ආරබ්‌භ සච්‌චකිරියං අකාසි. ගිලානා වුට්‌ඨිතොති ගිලානො හුත්‌වා වුට්‌ඨිතො. යාවතාති යත්‌තිකායො. තාසං අඤ්‌ඤතරාති තාසං අන්‌තරෙ එකා. අනුකම්‌පිකාති හිතානුකම්‌පිකා. ඔවාදිකාති ඔවාදදායිකා. අනුසාසිකාති අනුසිට්‌ඨිදායිකා.
Idāni bhagavantaṃ sakkhiṃ katvā attano sīlādiguṇehipi saccakiriyaṃ kātuṃ siyā khopana tetiādimāha. Tattha paripūrakārinīti samattakārinī. Cetosamathassāti samādhikammaṭṭhānassa. Ogādhappattāti ogādhaṃ anuppavesaṃ pattā. Patigādhappattāti patigādhaṃ patiṭṭhaṃ pattā. Assāsappattāti assāsaṃ avassayaṃ pattā. Vesārajjappattāti somanassañāṇaṃ pattā. Aparappaccayāti parappaccayo vuccati parasaddhā parapattiyāyanā, tāya virahitāti attho. Imehi tīhi aṅgehi attano guṇe ārabbha saccakiriyaṃ akāsi. Gilānā vuṭṭhitoti gilāno hutvā vuṭṭhito. Yāvatāti yattikāyo. Tāsaṃ aññatarāti tāsaṃ antare ekā. Anukampikāti hitānukampikā. Ovādikāti ovādadāyikā. Anusāsikāti anusiṭṭhidāyikā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 6. නකුලපිතුසුත්‌තං • 6. Nakulapitusuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6. නකුලපිතුසුත්‌තවණ්‌ණනා • 6. Nakulapitusuttavaṇṇanā
