| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (ටීකා) • Aṅguttaranikāya (ṭīkā) |
6. නකුලපිතුසුත්‌තවණ්‌ණනා
6. Nakulapitusuttavaṇṇanā
16. ඡට්‌ඨෙ විසභාගවෙදනුප්‌පත්‌තියා කකචෙනෙව චතුඉරියාපථං ඡින්‌දන්‌තො ආබාධයතීති ආබාධො, සො යස්‌ස අත්‌ථීති ආබාධිකො. තංසමුට්‌ඨානදුක්‌ඛෙන දුක්‌ඛිතො. අධිමත්‌තගිලානොති ධාතුසඞ්‌ඛයෙන පරික්‌ඛීණසරීරො.
16. Chaṭṭhe visabhāgavedanuppattiyā kakaceneva catuiriyāpathaṃ chindanto ābādhayatīti ābādho, so yassa atthīti ābādhiko. Taṃsamuṭṭhānadukkhena dukkhito. Adhimattagilānoti dhātusaṅkhayena parikkhīṇasarīro.
සප්‌පටිභයකන්‌තාරසදිසා සොළසවත්‌ථුකා අට්‌ඨවත්‌ථුකා ච විචිකිච්‌ඡා තිණ්‌ණා ඉමායාති තිණ්‌ණවිචිකිච්‌ඡා. විගතා සමුච්‌ඡින්‌නා පවත්‌තිආදීසු ‘‘එවං නු ඛො න නු ඛො’’ති එවං පවත්‌තිකා කථංකථා අස්‌සාති විගතකථංකථා. සාරජ්‌ජකරානං පාපධම්‌මානං පහීනත්‌තා රාගවික්‌ඛෙපෙසු සීලාදිගුණෙසු ච තිට්‌ඨකත්‌තා වෙසාරජ්‌ජං, විසාරදභාවං වෙය්‍යත්‌තියං පත්‌තාති වෙසාරජ්‌ජප්‌පත්‌තා. අත්‌තනා එව පච්‌චක්‌ඛතො දිට්‌ඨත්‌තා න පරං පච්‌චෙති, නස්‌ස පරො පච්‌චෙතබ්‌බො අත්‌ථීති අපරප්‌පච්‌චයා.
Sappaṭibhayakantārasadisā soḷasavatthukā aṭṭhavatthukā ca vicikicchā tiṇṇā imāyāti tiṇṇavicikicchā. Vigatā samucchinnā pavattiādīsu ‘‘evaṃ nu kho na nu kho’’ti evaṃ pavattikā kathaṃkathā assāti vigatakathaṃkathā. Sārajjakarānaṃ pāpadhammānaṃ pahīnattā rāgavikkhepesu sīlādiguṇesu ca tiṭṭhakattā vesārajjaṃ, visāradabhāvaṃ veyyattiyaṃ pattāti vesārajjappattā. Attanā eva paccakkhato diṭṭhattā na paraṃ pacceti, nassa paro paccetabbo atthīti aparappaccayā.
ගිලානා වුට්‌ඨිතොති ගිලානභාවතො වුට්‌ඨාය ඨිතො. භාවප්‌පධානො හි අයං නිද්‌දෙසො. ගිලානො හුත්‌වා වුට්‌ඨිතොති ඉදං පන අත්‌ථමත්‌තනිදස්‌සනං.
Gilānā vuṭṭhitoti gilānabhāvato vuṭṭhāya ṭhito. Bhāvappadhāno hi ayaṃ niddeso. Gilāno hutvā vuṭṭhitoti idaṃ pana atthamattanidassanaṃ.
නකුලපිතුසුත්‌තවණ්‌ණනා නිට්‌ඨිතා.
Nakulapitusuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 6. නකුලපිතුසුත්‌තං • 6. Nakulapitusuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 6. නකුලපිතුසුත්‌තවණ්‌ණනා • 6. Nakulapitusuttavaṇṇanā
