| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੬. ਨਕੁਲਪਿਤੁਸੁਤ੍ਤવਣ੍ਣਨਾ
6. Nakulapitusuttavaṇṇanā
੧੬. ਛਟ੍ਠੇ ਬਾਲ਼੍ਹਗਿਲਾਨੋਤਿ ਅਧਿਮਤ੍ਤਗਿਲਾਨੋ। ਏਤਦવੋਚਾਤਿ ਸਾਮਿਕਸ੍ਸ ਭੇਸਜ੍ਜਂ ਕਤ੍વਾ ਬ੍ਯਾਧਿਂ વੂਪਸਮੇਤੁਂ ਅਸਕ੍ਕੋਨ੍ਤੀ ਇਦਾਨਿ ਸੀਹਨਾਦਂ ਨਦਿਤ੍વਾ ਸਚ੍ਚਕਿਰਿਯਾਯ ਬ੍ਯਾਧਿਂ વੂਪਸਮੇਤੁਂ ਸਨ੍ਤਿਕੇ ਨਿਸੀਦਿਤ੍વਾ ਏਤਂ ‘‘ਮਾ ਖੋ ਤ੍વ’’ਨ੍ਤਿਆਦਿવਚਨਂ ਅવੋਚ। ਸਾਪੇਕ੍ਖੋਤਿ ਸਤਣ੍ਹੋ। ਨ ਨਕੁਲਮਾਤਾਤਿ ਏਤ੍ਥ ਨ-ਕਾਰੋ ਨ ਸਕ੍ਖਤੀਤਿ ਏવਂ ਪਰਪਦੇਨ ਯੋਜੇਤਬ੍ਬੋ। ਸਨ੍ਥਰਿਤੁਨ੍ਤਿ ਨਿਚ੍ਛਿਦ੍ਦਂ ਕਾਤੁਂ, ਸਣ੍ਠਪੇਤੁਨ੍ਤਿ ਅਤ੍ਥੋ। વੇਣਿਂ ਓਲਿਖਿਤੁਨ੍ਤਿ ਏਲ਼ਕਲੋਮਾਨਿ ਕਪ੍ਪੇਤ੍વਾ વਿਜਟੇਤ੍વਾ વੇਣਿਂ ਕਾਤੁਂ।
16. Chaṭṭhe bāḷhagilānoti adhimattagilāno. Etadavocāti sāmikassa bhesajjaṃ katvā byādhiṃ vūpasametuṃ asakkontī idāni sīhanādaṃ naditvā saccakiriyāya byādhiṃ vūpasametuṃ santike nisīditvā etaṃ ‘‘mā kho tva’’ntiādivacanaṃ avoca. Sāpekkhoti sataṇho. Na nakulamātāti ettha na-kāro na sakkhatīti evaṃ parapadena yojetabbo. Santharitunti nicchiddaṃ kātuṃ, saṇṭhapetunti attho. Veṇiṃ olikhitunti eḷakalomāni kappetvā vijaṭetvā veṇiṃ kātuṃ.
ਅਞ੍ਞਂ ਘਰਂ ਗਮਿਸ੍ਸਤੀਤਿ ਅਞ੍ਞਂ ਸਾਮਿਕਂ ਗਣ੍ਹਿਸ੍ਸਤਿ। ਸੋਲ਼ਸ વਸ੍ਸਾਨਿ ਗਹਟ੍ਠਕਂ ਬ੍ਰਹ੍ਮਚਰਿਯਂ ਸਮਾਚਿਣ੍ਣਨ੍ਤਿ ਇਤੋ ਸੋਲ਼ਸવਸ੍ਸਮਤ੍ਥਕੇ ਗਹਟ੍ਠਬ੍ਰਹ੍ਮਚਰਿਯવਾਸੋ ਸਮਾਚਿਣ੍ਣੋ। ਦਸ੍ਸਨਕਾਮਤਰਾਤਿ ਅਤਿਰੇਕੇਨ ਦਸ੍ਸਨਕਾਮਾ। ਇਮੇਹਿ ਤੀਹਿ ਅਙ੍ਗੇਹਿ ਸੀਹਨਾਦਂ ਨਦਿਤ੍વਾ ‘‘ਇਮਿਨਾ ਸਚ੍ਚੇਨ ਤવ ਸਰੀਰੇ ਬ੍ਯਾਧਿ ਫਾਸੁ ਹੋਤੂ’’ਤਿ ਸਚ੍ਚਕਿਰਿਯਂ ਅਕਾਸਿ।
Aññaṃ gharaṃ gamissatīti aññaṃ sāmikaṃ gaṇhissati. Soḷasa vassāni gahaṭṭhakaṃ brahmacariyaṃ samāciṇṇanti ito soḷasavassamatthake gahaṭṭhabrahmacariyavāso samāciṇṇo. Dassanakāmatarāti atirekena dassanakāmā. Imehi tīhi aṅgehi sīhanādaṃ naditvā ‘‘iminā saccena tava sarīre byādhi phāsu hotū’’ti saccakiriyaṃ akāsi.
ਇਦਾਨਿ ਭਗવਨ੍ਤਂ ਸਕ੍ਖਿਂ ਕਤ੍વਾ ਅਤ੍ਤਨੋ ਸੀਲਾਦਿਗੁਣੇਹਿਪਿ ਸਚ੍ਚਕਿਰਿਯਂ ਕਾਤੁਂ ਸਿਯਾ ਖੋ ਪਨ ਤੇਤਿਆਦਿਮਾਹ। ਤਤ੍ਥ ਪਰਿਪੂਰਕਾਰਿਨੀਤਿ ਸਮਤ੍ਤਕਾਰਿਨੀ। ਚੇਤੋਸਮਥਸ੍ਸਾਤਿ ਸਮਾਧਿਕਮ੍ਮਟ੍ਠਾਨਸ੍ਸ। ਓਗਾਧਪ੍ਪਤ੍ਤਾਤਿ ਓਗਾਧਂ ਅਨੁਪ੍ਪવੇਸਂ ਪਤ੍ਤਾ। ਪਤਿਗਾਧਪ੍ਪਤ੍ਤਾਤਿ ਪਤਿਗਾਧਂ ਪਤਿਟ੍ਠਂ ਪਤ੍ਤਾ। ਅਸ੍ਸਾਸਪ੍ਪਤ੍ਤਾਤਿ ਅਸ੍ਸਾਸਂ ਅવਸ੍ਸਯਂ ਪਤ੍ਤਾ। વੇਸਾਰਜ੍ਜਪ੍ਪਤ੍ਤਾਤਿ ਸੋਮਨਸ੍ਸਞਾਣਂ ਪਤ੍ਤਾ। ਅਪਰਪ੍ਪਚ੍ਚਯਾਤਿ ਪਰਪ੍ਪਚ੍ਚਯੋ વੁਚ੍ਚਤਿ ਪਰਸਦ੍ਧਾ ਪਰਪਤ੍ਤਿਯਾਯਨਾ, ਤਾਯ વਿਰਹਿਤਾਤਿ ਅਤ੍ਥੋ। ਇਮੇਹਿ ਤੀਹਿ ਅਙ੍ਗੇਹਿ ਅਤ੍ਤਨੋ ਗੁਣੇ ਆਰਬ੍ਭ ਸਚ੍ਚਕਿਰਿਯਂ ਅਕਾਸਿ। ਗਿਲਾਨਾ વੁਟ੍ਠਿਤੋਤਿ ਗਿਲਾਨੋ ਹੁਤ੍વਾ વੁਟ੍ਠਿਤੋ। ਯਾવਤਾਤਿ ਯਤ੍ਤਿਕਾਯੋ। ਤਾਸਂ ਅਞ੍ਞਤਰਾਤਿ ਤਾਸਂ ਅਨ੍ਤਰੇ ਏਕਾ। ਅਨੁਕਮ੍ਪਿਕਾਤਿ ਹਿਤਾਨੁਕਮ੍ਪਿਕਾ। ਓવਾਦਿਕਾਤਿ ਓવਾਦਦਾਯਿਕਾ। ਅਨੁਸਾਸਿਕਾਤਿ ਅਨੁਸਿਟ੍ਠਿਦਾਯਿਕਾ।
Idāni bhagavantaṃ sakkhiṃ katvā attano sīlādiguṇehipi saccakiriyaṃ kātuṃ siyā khopana tetiādimāha. Tattha paripūrakārinīti samattakārinī. Cetosamathassāti samādhikammaṭṭhānassa. Ogādhappattāti ogādhaṃ anuppavesaṃ pattā. Patigādhappattāti patigādhaṃ patiṭṭhaṃ pattā. Assāsappattāti assāsaṃ avassayaṃ pattā. Vesārajjappattāti somanassañāṇaṃ pattā. Aparappaccayāti parappaccayo vuccati parasaddhā parapattiyāyanā, tāya virahitāti attho. Imehi tīhi aṅgehi attano guṇe ārabbha saccakiriyaṃ akāsi. Gilānā vuṭṭhitoti gilāno hutvā vuṭṭhito. Yāvatāti yattikāyo. Tāsaṃ aññatarāti tāsaṃ antare ekā. Anukampikāti hitānukampikā. Ovādikāti ovādadāyikā. Anusāsikāti anusiṭṭhidāyikā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੬. ਨਕੁਲਪਿਤੁਸੁਤ੍ਤਂ • 6. Nakulapitusuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੬. ਨਕੁਲਪਿਤੁਸੁਤ੍ਤવਣ੍ਣਨਾ • 6. Nakulapitusuttavaṇṇanā
