| Library / Tipiṭaka / തിപിടക • Tipiṭaka / അങ്ഗുത്തരനികായ (ടീകാ) • Aṅguttaranikāya (ṭīkā) |
൬. നകുലപിതുസുത്തവണ്ണനാ
6. Nakulapitusuttavaṇṇanā
൧൬. ഛട്ഠേ വിസഭാഗവേദനുപ്പത്തിയാ കകചേനേവ ചതുഇരിയാപഥം ഛിന്ദന്തോ ആബാധയതീതി ആബാധോ, സോ യസ്സ അത്ഥീതി ആബാധികോ. തംസമുട്ഠാനദുക്ഖേന ദുക്ഖിതോ. അധിമത്തഗിലാനോതി ധാതുസങ്ഖയേന പരിക്ഖീണസരീരോ.
16. Chaṭṭhe visabhāgavedanuppattiyā kakaceneva catuiriyāpathaṃ chindanto ābādhayatīti ābādho, so yassa atthīti ābādhiko. Taṃsamuṭṭhānadukkhena dukkhito. Adhimattagilānoti dhātusaṅkhayena parikkhīṇasarīro.
സപ്പടിഭയകന്താരസദിസാ സോളസവത്ഥുകാ അട്ഠവത്ഥുകാ ച വിചികിച്ഛാ തിണ്ണാ ഇമായാതി തിണ്ണവിചികിച്ഛാ. വിഗതാ സമുച്ഛിന്നാ പവത്തിആദീസു ‘‘ഏവം നു ഖോ ന നു ഖോ’’തി ഏവം പവത്തികാ കഥംകഥാ അസ്സാതി വിഗതകഥംകഥാ. സാരജ്ജകരാനം പാപധമ്മാനം പഹീനത്താ രാഗവിക്ഖേപേസു സീലാദിഗുണേസു ച തിട്ഠകത്താ വേസാരജ്ജം, വിസാരദഭാവം വേയ്യത്തിയം പത്താതി വേസാരജ്ജപ്പത്താ. അത്തനാ ഏവ പച്ചക്ഖതോ ദിട്ഠത്താ ന പരം പച്ചേതി, നസ്സ പരോ പച്ചേതബ്ബോ അത്ഥീതി അപരപ്പച്ചയാ.
Sappaṭibhayakantārasadisā soḷasavatthukā aṭṭhavatthukā ca vicikicchā tiṇṇā imāyāti tiṇṇavicikicchā. Vigatā samucchinnā pavattiādīsu ‘‘evaṃ nu kho na nu kho’’ti evaṃ pavattikā kathaṃkathā assāti vigatakathaṃkathā. Sārajjakarānaṃ pāpadhammānaṃ pahīnattā rāgavikkhepesu sīlādiguṇesu ca tiṭṭhakattā vesārajjaṃ, visāradabhāvaṃ veyyattiyaṃ pattāti vesārajjappattā. Attanā eva paccakkhato diṭṭhattā na paraṃ pacceti, nassa paro paccetabbo atthīti aparappaccayā.
ഗിലാനാ വുട്ഠിതോതി ഗിലാനഭാവതോ വുട്ഠായ ഠിതോ. ഭാവപ്പധാനോ ഹി അയം നിദ്ദേസോ. ഗിലാനോ ഹുത്വാ വുട്ഠിതോതി ഇദം പന അത്ഥമത്തനിദസ്സനം.
Gilānā vuṭṭhitoti gilānabhāvato vuṭṭhāya ṭhito. Bhāvappadhāno hi ayaṃ niddeso. Gilāno hutvā vuṭṭhitoti idaṃ pana atthamattanidassanaṃ.
നകുലപിതുസുത്തവണ്ണനാ നിട്ഠിതാ.
Nakulapitusuttavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / അങ്ഗുത്തരനികായ • Aṅguttaranikāya / ൬. നകുലപിതുസുത്തം • 6. Nakulapitusuttaṃ
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൬. നകുലപിതുസുത്തവണ്ണനാ • 6. Nakulapitusuttavaṇṇanā
