| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༧. ནལ༹ཀལཱཔཱིསུཏྟཾ
7. Naḷakalāpīsuttaṃ
༦༧. ཨེཀཾ སམཡཾ ཨཱཡསྨཱ ཙ སཱརིཔུཏྟོ ཨཱཡསྨཱ ཙ མཧཱཀོཊྛིཀོ 1 བཱརཱཎསིཡཾ ཝིཧརནྟི ཨིསིཔཏནེ མིགདཱཡེ། ཨཐ ཁོ ཨཱཡསྨཱ མཧཱཀོཊྛིཀོ སཱཡནྷསམཡཾ པཊིསལླཱནཱ ཝུཊྛིཏོ ཡེནཱཡསྨཱ སཱརིཔུཏྟོ ཏེནུཔསངྐམི; ཨུཔསངྐམིཏྭཱ ཨཱཡསྨཏཱ སཱརིཔུཏྟེན སདྡྷིཾ སམྨོདི། སམྨོདནཱིཡཾ ཀཐཾ སཱརཎཱིཡཾ ཝཱིཏིསཱརེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ མཧཱཀོཊྛིཀོ ཨཱཡསྨནྟཾ སཱརིཔུཏྟཾ ཨེཏདཝོཙ – ‘‘ཀིཾ ནུ ཁོ, ཨཱཝུསོ སཱརིཔུཏྟ, སཡཾཀཏཾ ཛརཱམརཎཾ, པརཾཀཏཾ ཛརཱམརཎཾ, སཡཾཀཏཉྩ པརཾཀཏཉྩ ཛརཱམརཎཾ, ཨུདཱཧུ ཨསཡཾཀཱརཾ ཨཔརཾཀཱརཾ ཨདྷིཙྩསམུཔྤནྣཾ ཛརཱམརཎ’’ནྟི? ‘‘ན ཁོ, ཨཱཝུསོ ཀོཊྛིཀ, སཡཾཀཏཾ ཛརཱམརཎཾ, ན པརཾཀཏཾ ཛརཱམརཎཾ, ན སཡཾཀཏཉྩ པརཾཀཏཉྩ ཛརཱམརཎཾ, ནཱཔི ཨསཡཾཀཱརཾ ཨཔརཾཀཱརཾ ཨདྷིཙྩསམུཔྤནྣཾ ཛརཱམརཎཾ། ཨཔི ཙ, ཛཱཏིཔཙྩཡཱ ཛརཱམརཎ’’ནྟི།
67. Ekaṃ samayaṃ āyasmā ca sāriputto āyasmā ca mahākoṭṭhiko 2 bārāṇasiyaṃ viharanti isipatane migadāye. Atha kho āyasmā mahākoṭṭhiko sāyanhasamayaṃ paṭisallānā vuṭṭhito yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā mahākoṭṭhiko āyasmantaṃ sāriputtaṃ etadavoca – ‘‘kiṃ nu kho, āvuso sāriputta, sayaṃkataṃ jarāmaraṇaṃ, paraṃkataṃ jarāmaraṇaṃ, sayaṃkatañca paraṃkatañca jarāmaraṇaṃ, udāhu asayaṃkāraṃ aparaṃkāraṃ adhiccasamuppannaṃ jarāmaraṇa’’nti? ‘‘Na kho, āvuso koṭṭhika, sayaṃkataṃ jarāmaraṇaṃ, na paraṃkataṃ jarāmaraṇaṃ, na sayaṃkatañca paraṃkatañca jarāmaraṇaṃ, nāpi asayaṃkāraṃ aparaṃkāraṃ adhiccasamuppannaṃ jarāmaraṇaṃ. Api ca, jātipaccayā jarāmaraṇa’’nti.
‘‘ཀིཾ ནུ ཁོ, ཨཱཝུསོ སཱརིཔུཏྟ, སཡཾཀཏཱ ཛཱཏི, པརཾཀཏཱ ཛཱཏི, སཡཾཀཏཱ ཙ པརཾཀཏཱ ཙ ཛཱཏི, ཨུདཱཧུ ཨསཡཾཀཱརཱ ཨཔརཾཀཱརཱ ཨདྷིཙྩསམུཔྤནྣཱ ཛཱཏཱི’’ཏི? ‘‘ན ཁོ, ཨཱཝུསོ ཀོཊྛིཀ, སཡཾཀཏཱ ཛཱཏི, ན པརཾཀཏཱ ཛཱཏི, ན སཡཾཀཏཱ ཙ པརཾཀཏཱ ཙ ཛཱཏི, ནཱཔི ཨསཡཾཀཱརཱ ཨཔརཾཀཱརཱ ཨདྷིཙྩསམུཔྤནྣཱ ཛཱཏི། ཨཔི ཙ, བྷཝཔཙྩཡཱ ཛཱཏཱི’’ཏི།
‘‘Kiṃ nu kho, āvuso sāriputta, sayaṃkatā jāti, paraṃkatā jāti, sayaṃkatā ca paraṃkatā ca jāti, udāhu asayaṃkārā aparaṃkārā adhiccasamuppannā jātī’’ti? ‘‘Na kho, āvuso koṭṭhika, sayaṃkatā jāti, na paraṃkatā jāti, na sayaṃkatā ca paraṃkatā ca jāti, nāpi asayaṃkārā aparaṃkārā adhiccasamuppannā jāti. Api ca, bhavapaccayā jātī’’ti.
‘‘ཀིཾ ནུ ཁོ, ཨཱཝུསོ སཱརིཔུཏྟ, སཡཾཀཏོ བྷཝོ…པེ॰… སཡཾཀཏཾ ཨུཔཱདཱནཾ… སཡཾཀཏཱ ཏཎྷཱ… སཡཾཀཏཱ ཝེདནཱ… སཡཾཀཏོ ཕསྶོ… སཡཾཀཏཾ སལཱ༹ཡཏནཾ… སཡཾཀཏཾ ནཱམརཱུཔཾ, པརཾཀཏཾ ནཱམརཱུཔཾ, སཡཾཀཏཉྩ པརཾཀཏཉྩ ནཱམརཱུཔཾ, ཨུདཱཧུ ཨསཡཾཀཱརཾ ཨཔརཾཀཱརཾ ཨདྷིཙྩསམུཔྤནྣཾ ནཱམརཱུཔ’’ནྟི ? ‘‘ན ཁོ, ཨཱཝུསོ ཀོཊྛིཀ, སཡཾཀཏཾ ནཱམརཱུཔཾ, ན པརཾཀཏཾ ནཱམརཱུཔཾ, ན སཡཾཀཏཉྩ པརཾཀཏཉྩ ནཱམརཱུཔཾ, ནཱཔི ཨསཡཾཀཱརཾ ཨཔརཾཀཱརཾ, ཨདྷིཙྩསམུཔྤནྣཾ ནཱམརཱུཔཾ། ཨཔི ཙ, ཝིཉྙཱཎཔཙྩཡཱ ནཱམརཱུཔ’’ནྟི།
‘‘Kiṃ nu kho, āvuso sāriputta, sayaṃkato bhavo…pe… sayaṃkataṃ upādānaṃ… sayaṃkatā taṇhā… sayaṃkatā vedanā… sayaṃkato phasso… sayaṃkataṃ saḷāyatanaṃ… sayaṃkataṃ nāmarūpaṃ, paraṃkataṃ nāmarūpaṃ, sayaṃkatañca paraṃkatañca nāmarūpaṃ, udāhu asayaṃkāraṃ aparaṃkāraṃ adhiccasamuppannaṃ nāmarūpa’’nti ? ‘‘Na kho, āvuso koṭṭhika, sayaṃkataṃ nāmarūpaṃ, na paraṃkataṃ nāmarūpaṃ, na sayaṃkatañca paraṃkatañca nāmarūpaṃ, nāpi asayaṃkāraṃ aparaṃkāraṃ, adhiccasamuppannaṃ nāmarūpaṃ. Api ca, viññāṇapaccayā nāmarūpa’’nti.
‘‘ཀིཾ ནུ ཁོ, ཨཱཝུསོ སཱརིཔུཏྟ, སཡངྐཏཾ ཝིཉྙཱཎཾ, པརངྐཏཾ ཝིཉྙཱཎཾ, སཡཾཀཏཉྩ པརཾཀཏཉྩ ཝིཉྙཱཎཾ, ཨུདཱཧུ ཨསཡཾཀཱརཾ ཨཔརཾཀཱརཾ ཨདྷིཙྩསམུཔྤནྣཾ ཝིཉྙཱཎ’’ནྟི? ‘‘ན ཁོ, ཨཱཝུསོ ཀོཊྛིཀ, སཡཾཀཏཾ ཝིཉྙཱཎཾ, ན པརཾཀཏཾ ཝིཉྙཱཎཾ ན སཡཾཀཏཉྩ པརཾཀཏཉྩ ཝིཉྙཱཎཾ, ནཱཔི ཨསཡཾཀཱརཾ ཨཔརཾཀཱརཾ ཨདྷིཙྩསམུཔྤནྣཾ ཝིཉྙཱཎཾ། ཨཔི ཙ, ནཱམརཱུཔཔཙྩཡཱ ཝིཉྙཱཎ’’ནྟི།
‘‘Kiṃ nu kho, āvuso sāriputta, sayaṅkataṃ viññāṇaṃ, paraṅkataṃ viññāṇaṃ, sayaṃkatañca paraṃkatañca viññāṇaṃ, udāhu asayaṃkāraṃ aparaṃkāraṃ adhiccasamuppannaṃ viññāṇa’’nti? ‘‘Na kho, āvuso koṭṭhika, sayaṃkataṃ viññāṇaṃ, na paraṃkataṃ viññāṇaṃ na sayaṃkatañca paraṃkatañca viññāṇaṃ, nāpi asayaṃkāraṃ aparaṃkāraṃ adhiccasamuppannaṃ viññāṇaṃ. Api ca, nāmarūpapaccayā viññāṇa’’nti.
‘‘ཨིདཱནེཝ ཁོ མཡཾ ཨཱཡསྨཏོ སཱརིཔུཏྟསྶ བྷཱསིཏཾ ཨེཝཾ ཨཱཛཱནཱམ – ‘ན ཁྭཱཝུསོ ཀོཊྛིཀ, སཡཾཀཏཾ ནཱམརཱུཔཾ, ན པརཾཀཏཾ ནཱམརཱུཔཾ, ན སཡཾཀཏཉྩ པརཾཀཏཉྩ ནཱམརཱུཔཾ, ནཱཔི ཨསཡཾཀཱརཾ ཨཔརཾཀཱརཾ ཨདྷིཙྩསམུཔྤནྣཾ ནཱམརཱུཔཾ། ཨཔི ཙ, ཝིཉྙཱཎཔཙྩཡཱ ནཱམརཱུཔ’’’ནྟི།
‘‘Idāneva kho mayaṃ āyasmato sāriputtassa bhāsitaṃ evaṃ ājānāma – ‘na khvāvuso koṭṭhika, sayaṃkataṃ nāmarūpaṃ, na paraṃkataṃ nāmarūpaṃ, na sayaṃkatañca paraṃkatañca nāmarūpaṃ, nāpi asayaṃkāraṃ aparaṃkāraṃ adhiccasamuppannaṃ nāmarūpaṃ. Api ca, viññāṇapaccayā nāmarūpa’’’nti.
‘‘ཨིདཱནེཝ ཙ པན མཡཾ ཨཱཡསྨཏོ སཱརིཔུཏྟསྶ བྷཱསིཏཾ ཨེཝཾ ཨཱཛཱནཱམ – ‘ན ཁྭཱཝུསོ ཀོཊྛིཀ, སཡཾཀཏཾ ཝིཉྙཱཎཾ, ན པརཾཀཏཾ ཝིཉྙཱཎཾ, ན སཡཾཀཏཉྩ པརཾཀཏཉྩ ཝིཉྙཱཎཾ , ནཱཔི ཨསཡཾཀཱརཾ ཨཔརཾཀཱརཾ ཨདྷིཙྩསམུཔྤནྣཾ ཝིཉྙཱཎཾ། ཨཔི ཙ, ནཱམརཱུཔཔཙྩཡཱ ཝིཉྙཱཎ’’’ནྟི།
‘‘Idāneva ca pana mayaṃ āyasmato sāriputtassa bhāsitaṃ evaṃ ājānāma – ‘na khvāvuso koṭṭhika, sayaṃkataṃ viññāṇaṃ, na paraṃkataṃ viññāṇaṃ, na sayaṃkatañca paraṃkatañca viññāṇaṃ , nāpi asayaṃkāraṃ aparaṃkāraṃ adhiccasamuppannaṃ viññāṇaṃ. Api ca, nāmarūpapaccayā viññāṇa’’’nti.
‘‘ཡཐཱ ཀཐཾ པནཱཝུསོ སཱརིཔུཏྟ, ཨིམསྶ བྷཱསིཏསྶ ཨཏྠོ དཊྛབྦོ’’ཏི? ‘‘ཏེནཧཱཝུསོ, ཨུཔམཾ ཏེ ཀརིསྶཱམི། ཨུཔམཱཡཔིདྷེཀཙྩེ ཝིཉྙཱུ པུརིསཱ བྷཱསིཏསྶ ཨཏྠཾ ཛཱནནྟི། སེཡྻཐཱཔི, ཨཱཝུསོ, དྭེ ནལ༹ཀལཱཔིཡོ ཨཉྙམཉྙཾ ནིསྶཱཡ ཏིཊྛེཡྻུཾ། ཨེཝམེཝ ཁོ, ཨཱཝུསོ, ནཱམརཱུཔཔཙྩཡཱ ཝིཉྙཱཎཾ; ཝིཉྙཱཎཔཙྩཡཱ ནཱམརཱུཔཾ; ནཱམརཱུཔཔཙྩཡཱ སལཱ༹ཡཏནཾ; སལཱ༹ཡཏནཔཙྩཡཱ ཕསྶོ…པེ॰… ཨེཝམེཏསྶ ཀེཝལསྶ དུཀྑཀྑནྡྷསྶ སམུདཡོ ཧོཏི། ཏཱསཾ ཙེ, ཨཱཝུསོ , ནལ༹ཀལཱཔཱིནཾ ཨེཀཾ ཨཱཀཌྜྷེཡྻ, ཨེཀཱ པཔཏེཡྻ; ཨཔརཾ ཙེ ཨཱཀཌྜྷེཡྻ, ཨཔརཱ པཔཏེཡྻ། ཨེཝམེཝ ཁོ, ཨཱཝུསོ, ནཱམརཱུཔནིརོདྷཱ ཝིཉྙཱཎནིརོདྷོ; ཝིཉྙཱཎནིརོདྷཱ ནཱམརཱུཔནིརོདྷོ; ནཱམརཱུཔནིརོདྷཱ སལཱ༹ཡཏནནིརོདྷོ; སལཱ༹ཡཏནནིརོདྷཱ ཕསྶནིརོདྷོ…པེ॰… ཨེཝམེཏསྶ ཀེཝལསྶ དུཀྑཀྑནྡྷསྶ ནིརོདྷོ ཧོཏཱི’’ཏི། ‘‘ཨཙྪརིཡཾ , ཨཱཝུསོ སཱརིཔུཏྟ; ཨབྦྷུཏཾ, ཨཱཝུསོ སཱརིཔུཏྟ! ཡཱཝསུབྷཱསིཏཾ ཙིདཾ ཨཱཡསྨཏཱ སཱརིཔུཏྟེན། ཨིདཉྩ པན མཡཾ ཨཱཡསྨཏོ སཱརིཔུཏྟསྶ བྷཱསིཏཾ ཨིམེཧི ཚཏྟིཾསཱཡ ཝཏྠཱུཧི ཨནུམོདཱམ – ‘ཛརཱམརཎསྶ ཙེ, ཨཱཝུསོ, བྷིཀྑུ ནིབྦིདཱཡ ཝིརཱགཱཡ ནིརོདྷཱཡ དྷམྨཾ དེསེཏི, དྷམྨཀཐིཀོ བྷིཀྑཱུཏི ཨལཾ ཝཙནཱཡ། ཛརཱམརཎསྶ ཙེ, ཨཱཝུསོ, བྷིཀྑུ ནིབྦིདཱཡ ཝིརཱགཱཡ ནིརོདྷཱཡ པཊིཔནྣོ ཧོཏི, དྷམྨཱནུདྷམྨཔྤཊིཔནྣོ བྷིཀྑཱུཏི ཨལཾ ཝཙནཱཡ། ཛརཱམརཎསྶ ཙེ, ཨཱཝུསོ, བྷིཀྑུ ནིབྦིདཱ ཝིརཱགཱ ནིརོདྷཱ ཨནུཔཱདཱ ཝིམུཏྟོ ཧོཏི, དིཊྛདྷམྨནིབྦཱནཔྤཏྟོ བྷིཀྑཱུཏི ཨལཾ ཝཙནཱཡ། ཛཱཏིཡཱ ཙེ… བྷཝསྶ ཙེ… ཨུཔཱདཱནསྶ ཙེ… ཏཎྷཱཡ ཙེ… ཝེདནཱཡ ཙེ… ཕསྶསྶ ཙེ… སལཱ༹ཡཏནསྶ ཙེ… ནཱམརཱུཔསྶ ཙེ… ཝིཉྙཱཎསྶ ཙེ… སངྑཱརཱནཾ ཙེ… ཨཝིཛྫཱཡ ཙེ, ཨཱཝུསོ, བྷིཀྑུ ནིབྦིདཱཡ ཝིརཱགཱཡ ནིརོདྷཱཡ དྷམྨཾ དེསེཏི, དྷམྨཀཐིཀོ བྷིཀྑཱུཏི ཨལཾ ཝཙནཱཡ། ཨཝིཛྫཱཡ ཙེ, ཨཱཝུསོ, བྷིཀྑུ ནིབྦིདཱཡ ཝིརཱགཱཡ ནིརོདྷཱཡ པཊིཔནྣོ ཧོཏི, དྷམྨཱནུདྷམྨཔྤཊིཔནྣོ བྷིཀྑཱུཏི ཨལཾ ཝཙནཱཡ ། ཨཝིཛྫཱཡ ཙེ, ཨཱཝུསོ, བྷིཀྑུ ནིབྦིདཱ ཝིརཱགཱ ནིརོདྷཱ ཨནུཔཱདཱ ཝིམུཏྟོ ཧོཏི, དིཊྛདྷམྨནིབྦཱནཔྤཏྟོ བྷིཀྑཱུཏི ཨལཾ ཝཙནཱཡཱ’’’ཏི། སཏྟམཾ།
‘‘Yathā kathaṃ panāvuso sāriputta, imassa bhāsitassa attho daṭṭhabbo’’ti? ‘‘Tenahāvuso, upamaṃ te karissāmi. Upamāyapidhekacce viññū purisā bhāsitassa atthaṃ jānanti. Seyyathāpi, āvuso, dve naḷakalāpiyo aññamaññaṃ nissāya tiṭṭheyyuṃ. Evameva kho, āvuso, nāmarūpapaccayā viññāṇaṃ; viññāṇapaccayā nāmarūpaṃ; nāmarūpapaccayā saḷāyatanaṃ; saḷāyatanapaccayā phasso…pe… evametassa kevalassa dukkhakkhandhassa samudayo hoti. Tāsaṃ ce, āvuso , naḷakalāpīnaṃ ekaṃ ākaḍḍheyya, ekā papateyya; aparaṃ ce ākaḍḍheyya, aparā papateyya. Evameva kho, āvuso, nāmarūpanirodhā viññāṇanirodho; viññāṇanirodhā nāmarūpanirodho; nāmarūpanirodhā saḷāyatananirodho; saḷāyatananirodhā phassanirodho…pe… evametassa kevalassa dukkhakkhandhassa nirodho hotī’’ti. ‘‘Acchariyaṃ , āvuso sāriputta; abbhutaṃ, āvuso sāriputta! Yāvasubhāsitaṃ cidaṃ āyasmatā sāriputtena. Idañca pana mayaṃ āyasmato sāriputtassa bhāsitaṃ imehi chattiṃsāya vatthūhi anumodāma – ‘jarāmaraṇassa ce, āvuso, bhikkhu nibbidāya virāgāya nirodhāya dhammaṃ deseti, dhammakathiko bhikkhūti alaṃ vacanāya. Jarāmaraṇassa ce, āvuso, bhikkhu nibbidāya virāgāya nirodhāya paṭipanno hoti, dhammānudhammappaṭipanno bhikkhūti alaṃ vacanāya. Jarāmaraṇassa ce, āvuso, bhikkhu nibbidā virāgā nirodhā anupādā vimutto hoti, diṭṭhadhammanibbānappatto bhikkhūti alaṃ vacanāya. Jātiyā ce… bhavassa ce… upādānassa ce… taṇhāya ce… vedanāya ce… phassassa ce… saḷāyatanassa ce… nāmarūpassa ce… viññāṇassa ce… saṅkhārānaṃ ce… avijjāya ce, āvuso, bhikkhu nibbidāya virāgāya nirodhāya dhammaṃ deseti, dhammakathiko bhikkhūti alaṃ vacanāya. Avijjāya ce, āvuso, bhikkhu nibbidāya virāgāya nirodhāya paṭipanno hoti, dhammānudhammappaṭipanno bhikkhūti alaṃ vacanāya . Avijjāya ce, āvuso, bhikkhu nibbidā virāgā nirodhā anupādā vimutto hoti, diṭṭhadhammanibbānappatto bhikkhūti alaṃ vacanāyā’’’ti. Sattamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༧. ནལ༹ཀལཱཔཱིསུཏྟཝཎྞནཱ • 7. Naḷakalāpīsuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༧. ནལ༹ཀལཱཔཱིསུཏྟཝཎྞནཱ • 7. Naḷakalāpīsuttavaṇṇanā
