| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৭. নল়কলাপীসুত্তৰণ্ণনা
7. Naḷakalāpīsuttavaṇṇanā
৬৭. সত্তমে কস্মা পুচ্ছতীতি মহাকোট্ঠিকত্থেরো সযং তত্থ নিক্কঙ্খো সমানো কস্মা পুচ্ছতীতি অধিপ্পাযো। অজ্ঝাসযজাননত্থন্তি ইদম্পি তস্স মহাসাৰকস্স পরচিত্তজাননেন অপ্পাটিহীরং সিযা, তেন তং অপরিতুস্সন্তো ‘‘অপিচা’’তিআদিমাহ। তত্থ দ্ৰে অগ্গসাৰকাতি সীলাদিগুণেহি উত্তমসাৰকাতি অত্থো, ন হি মহাকোট্ঠিকত্থেরো অগ্গসাৰকলক্খণপ্পত্তো, অথ খো মহাসাৰকলক্খণপ্পত্তো। ইদানেৰ খো মযন্তিআদি হেট্ঠা পচ্চযুপ্পন্নং অনালোল়েন্তেন দস্সেত্ৰা দেসনা আহটা, ন অঞ্ঞমঞ্ঞপচ্চযতাৰসেন, ইধ পন যেনাধিপ্পাযেন তং আলোল়েত্ৰা নিৰত্তেত্ৰা কথিতং মহাথেরেন, তমেৰস্স অধিপ্পাযং তেনেৰ পকাসেতুকামো মহাকোট্ঠিকত্থেরো আহ ‘‘ইদানেৰ খো ময’’ন্তিআদি। তেনাহ ‘‘ইদং থেরো’’তিআদি।
67. Sattame kasmā pucchatīti mahākoṭṭhikatthero sayaṃ tattha nikkaṅkho samāno kasmā pucchatīti adhippāyo. Ajjhāsayajānanatthanti idampi tassa mahāsāvakassa paracittajānanena appāṭihīraṃ siyā, tena taṃ aparitussanto ‘‘apicā’’tiādimāha. Tattha dve aggasāvakāti sīlādiguṇehi uttamasāvakāti attho, na hi mahākoṭṭhikatthero aggasāvakalakkhaṇappatto, atha kho mahāsāvakalakkhaṇappatto. Idāneva kho mayantiādi heṭṭhā paccayuppannaṃ anāloḷentena dassetvā desanā āhaṭā, na aññamaññapaccayatāvasena, idha pana yenādhippāyena taṃ āloḷetvā nivattetvā kathitaṃ mahātherena, tamevassa adhippāyaṃ teneva pakāsetukāmo mahākoṭṭhikatthero āha ‘‘idāneva kho maya’’ntiādi. Tenāha ‘‘idaṃ thero’’tiādi.
এত্তকে ঠানেতি ‘‘কিং নু খো আৰুসো’’তিআদিনা পঠমারম্ভতো পট্ঠায যাৰ ‘‘নিরোধো হোতী’’তি পদং, এত্তকে ঠানে। অৰিজ্জাসঙ্খারে অগ্গহেত্ৰা ‘‘নামরূপপচ্চযা ৰিঞ্ঞাণ’’ন্তি দেসনায পৰত্তত্তা ‘‘পচ্চযুপ্পন্নপঞ্চৰোকারভৰৰসেন দেসনা কথিতা’’তি ৰুত্তং। ‘‘ফলে গহিতে কারণং গহিতমেৰা’’তি ৰিঞ্ঞাণে গহিতে সঙ্খারা, তেসঞ্চ কারণভূতা অৰিজ্জা গহিতা এৰ হোতীতি ৰুত্তং ‘‘হেট্ঠা ৰিস্সজ্জিতেসু দ্ৰাদসসু পদেসূ’’তি। একেকস্মিন্তি একেকস্মিং পদে। তিণ্ণং তিণ্ণং ৰসেনাতি ‘‘নিরোধায ধম্মং দেসেসি, নিরোধায পটিপন্নো হোতি, নিরোধা অনুপাদাৰিনিমুত্তো হোতী’’তি এৰমাগতানং তিণ্ণং তিণ্ণং ৰারানং ৰসেন। ‘‘অট্ঠারসহি ৰত্থূহী’’তিআদীসু (মহাৰ॰ ৪৬৮) ৰিয ইধ ৰত্থুসদ্দো কারণপরিযাযোতি আহ ‘‘ছত্তিংসায কারণেহী’’তি। পঠমো অনুমোদনাৰিধি। ধম্মকথিকগুণোতি ৰিপস্সনাৰিসযো অভেদোপচারেন ৰুত্তো। সেসদ্ৰযেসুপি এসেৰ নযো। দুতিযো অনুমোদনা, ততিযং অনুমোদনন্তি অভিধেয্যানুরূপং ৰত্তব্বং। দেসনাসম্পত্তি কথিতা ‘‘নিব্বিদায…পে॰… ধম্মং দেসেতী’’তি ৰুত্তত্তা। সেক্খভূমি কথিতা ‘‘নিব্বিদায…পে॰… পটিপন্নো হোতী’’তি ৰুত্তত্তা। অসেক্খভূমি কথিতা ‘‘নিব্বিদা …পে॰… অনুপাদাৰিমুত্তো হোতী’’তি ৰুত্তত্তা।
Ettake ṭhāneti ‘‘kiṃ nu kho āvuso’’tiādinā paṭhamārambhato paṭṭhāya yāva ‘‘nirodho hotī’’ti padaṃ, ettake ṭhāne. Avijjāsaṅkhāre aggahetvā ‘‘nāmarūpapaccayā viññāṇa’’nti desanāya pavattattā ‘‘paccayuppannapañcavokārabhavavasena desanā kathitā’’ti vuttaṃ. ‘‘Phale gahite kāraṇaṃ gahitamevā’’ti viññāṇe gahite saṅkhārā, tesañca kāraṇabhūtā avijjā gahitā eva hotīti vuttaṃ ‘‘heṭṭhā vissajjitesu dvādasasu padesū’’ti. Ekekasminti ekekasmiṃ pade. Tiṇṇaṃ tiṇṇaṃ vasenāti ‘‘nirodhāya dhammaṃ desesi, nirodhāya paṭipanno hoti, nirodhā anupādāvinimutto hotī’’ti evamāgatānaṃ tiṇṇaṃ tiṇṇaṃ vārānaṃ vasena. ‘‘Aṭṭhārasahi vatthūhī’’tiādīsu (mahāva. 468) viya idha vatthusaddo kāraṇapariyāyoti āha ‘‘chattiṃsāya kāraṇehī’’ti. Paṭhamo anumodanāvidhi. Dhammakathikaguṇoti vipassanāvisayo abhedopacārena vutto. Sesadvayesupi eseva nayo. Dutiyo anumodanā, tatiyaṃ anumodananti abhidheyyānurūpaṃ vattabbaṃ. Desanāsampatti kathitā ‘‘nibbidāya…pe… dhammaṃ desetī’’ti vuttattā. Sekkhabhūmi kathitā ‘‘nibbidāya…pe… paṭipanno hotī’’ti vuttattā. Asekkhabhūmi kathitā ‘‘nibbidā …pe… anupādāvimutto hotī’’ti vuttattā.
নল়কলাপীসুত্তৰণ্ণনা নিট্ঠিতা।
Naḷakalāpīsuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৭. নল়কলাপীসুত্তং • 7. Naḷakalāpīsuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. নল়কলাপীসুত্তৰণ্ণনা • 7. Naḷakalāpīsuttavaṇṇanā
