| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
8. நளகபானஸுத்தவண்ணனா
8. Naḷakapānasuttavaṇṇanā
166. யத்த² போ³தி⁴ஸத்தபமுகோ² வானரோ நளகேன பானீயங் பிவி, ஸா பொக்க²ரணீ, தஸ்ஸாமந்தோ பூ⁴மிப்பதே³ஸோ, தத்த² நிவிட்ட²கா³மோ ச ‘‘நளகபான’’ந்தேவ பஞ்ஞாயித்த², இத⁴ பன கா³மோ அதி⁴ப்பேதோதி ஆஹ ‘‘நளகபானேதி ஏவங்னாமகே கா³மே’’தி. இதா³னி தமத்த²ங் ஆக³மனதோ பட்டா²ய த³ஸ்ஸேதுங் ‘‘புப்³பே³ கிரா’’தி ஆரத்³த⁴ங். பஞ்ஞவாதி இதிகத்தப்³ப³தாய பஞ்ஞாய பஞ்ஞவா.
166. Yattha bodhisattapamukho vānaro naḷakena pānīyaṃ pivi, sā pokkharaṇī, tassāmanto bhūmippadeso, tattha niviṭṭhagāmo ca ‘‘naḷakapāna’’nteva paññāyittha, idha pana gāmo adhippetoti āha ‘‘naḷakapāneti evaṃnāmake gāme’’ti. Idāni tamatthaṃ āgamanato paṭṭhāya dassetuṃ ‘‘pubbe kirā’’ti āraddhaṃ. Paññavāti itikattabbatāya paññāya paññavā.
தூ²லதீ³க⁴ப³ஹுலபா⁴வேன மஹதீஹி தா³டி²காஹி ஸமன்னாக³தத்தா மஹாதா³டி²கோ. ‘‘உத³கரக்க²ஸோ அஹ’’ந்தி வத்வா வானரானங் கஞ்சி அமுஞ்சித்வா ‘‘ஸப்³பே³ தும்ஹே மம ஹத்த²க³தா’’தி த³ஸ்ஸெந்தோ ‘‘தும்ஹே பன ஸப்³பே³ கா²தி³ஸ்ஸாமீ’’தி ஆஹ. த⁴மி…பே॰… பிவிங்ஸூதி போ³தி⁴ஸத்தேன க³ஹிதனளோ அனவஸேஸோ அப்³ப⁴ந்தரே ஸப்³ப³ஸந்தீ⁴னங் நிப்³பா³தே⁴ன ஏகச்சி²த்³தோ³ அஹோஸி. நேவ மங் த்வங் வதி⁴ஸ்ஸஸீதி உத³கரக்க²ஸ த்வங் வதி⁴துகாமோபி மம புரிஸதா²மேன ந வதி⁴ஸ்ஸஸி.
Thūladīghabahulabhāvena mahatīhi dāṭhikāhi samannāgatattā mahādāṭhiko. ‘‘Udakarakkhaso aha’’nti vatvā vānarānaṃ kañci amuñcitvā ‘‘sabbe tumhe mama hatthagatā’’ti dassento ‘‘tumhe pana sabbe khādissāmī’’ti āha. Dhami…pe… piviṃsūti bodhisattena gahitanaḷo anavaseso abbhantare sabbasandhīnaṃ nibbādhena ekacchiddo ahosi. Neva maṃ tvaṃ vadhissasīti udakarakkhasa tvaṃ vadhitukāmopi mama purisathāmena na vadhissasi.
ஏவங் பன வத்வா மஹாஸத்தோ ‘‘அயங் பாபோ எத்த² பானீயங் பிவந்தே அஞ்ஞேபி ஸத்தே மா பா³த⁴யித்தா²’’தி கருணாயமானோ ‘‘எத்த² ஜாயந்தா நளா ஸப்³பே³ அபப்³ப³ப³ந்தா⁴ ஏகச்சி²த்³தா³வ ஹொந்தூ’’தி அதி⁴ட்டா²ய க³தோ. தேனாஹ ‘‘ததோ பட்டா²யா’’திஆதி³.
Evaṃ pana vatvā mahāsatto ‘‘ayaṃ pāpo ettha pānīyaṃ pivante aññepi satte mā bādhayitthā’’ti karuṇāyamāno ‘‘ettha jāyantā naḷā sabbe apabbabandhā ekacchiddāva hontū’’ti adhiṭṭhāya gato. Tenāha ‘‘tato paṭṭhāyā’’tiādi.
167. அனுருத்³த⁴ப்பமுகா² பி⁴க்கூ² ப⁴க³வதா ‘‘கச்சி தும்ஹே அனுருத்³தா⁴’’தி புச்சி²தாதி தே²ரோ ‘‘தக்³க⁴ மயங், ப⁴ந்தே’’தி ஆஹ.
167. Anuruddhappamukhā bhikkhū bhagavatā ‘‘kacci tumhe anuruddhā’’ti pucchitāti thero ‘‘taggha mayaṃ, bhante’’ti āha.
ஸசே பப்³ப³ஜதி, ஜீவிதங் லபி⁴ஸ்ஸதி, நோ அஞ்ஞதா²தி ரஞ்ஞா பப்³ப³ஜ்ஜாய அபி⁴னீதாதி ராஜாபி⁴னீதா. சோராபி⁴னீதாதி எத்தா²பி ஏஸேவ நயோ. சோரானங் மூலங் சி²ந்த³ந்தோ ‘‘கண்டகஸோத⁴னங் கரிஸ்ஸாமீ’’தி. ஆஜீவிகாயாதி ஆஜீவேன ஜீவிதவுத்தியா. இமேஸு பன அனுருத்³த⁴த்தே²ராதீ³ஸு.
Sace pabbajati, jīvitaṃ labhissati, no aññathāti raññā pabbajjāya abhinītāti rājābhinītā. Corābhinītāti etthāpi eseva nayo. Corānaṃ mūlaṃ chindanto ‘‘kaṇṭakasodhanaṃ karissāmī’’ti. Ājīvikāyāti ājīvena jīvitavuttiyā. Imesu pana anuruddhattherādīsu.
விவேகந்தி புப்³ப³காலிககிரியப்பதா⁴னங் ‘‘அப்³யாபஜ்ஜங் உபேத’’ந்திஆதீ³ஸு வியாதி ஆஹ – ‘‘விவிச்சா’’தி, விவிச்சித்வா விவித்தோ ஹுத்வா வினா ஹுத்வாதி அத்தோ². பப்³ப³ஜிதகிச்சந்தி பப்³ப³ஜிதஸ்ஸ ஸாருப்பகிச்சங். ஸமணகிச்சந்தி ஸமணபா⁴வகரணகிச்சங். யத³க்³கே³ன ஹி பப்³ப³ஜிதகிச்சங் காதுங் ந ஸக்கோதி தத³க்³கே³ன ஸமணபா⁴வகரம்பி கிச்சங் காதுங் ந ஸக்கோதி. தேனாஹ ‘‘ஸோ யேவா’’திஆதி³.
Vivekanti pubbakālikakiriyappadhānaṃ ‘‘abyāpajjaṃ upeta’’ntiādīsu viyāti āha – ‘‘viviccā’’ti, viviccitvā vivitto hutvā vinā hutvāti attho. Pabbajitakiccanti pabbajitassa sāruppakiccaṃ. Samaṇakiccanti samaṇabhāvakaraṇakiccaṃ. Yadaggena hi pabbajitakiccaṃ kātuṃ na sakkoti tadaggena samaṇabhāvakarampi kiccaṃ kātuṃ na sakkoti. Tenāha ‘‘so yevā’’tiādi.
168. அப்படிஸந்தி⁴கே தாவ ப்³யாகரொந்தோ பவத்தீஸு டா²னங் அதீதோதி கத்வா உபபத்தீஸு ப்³யாகரோதி நாம தத்த² படிஸந்தி⁴யா அபா⁴வகித்தனதோ. மஹந்ததுட்டி²னோதி விபுலபமோதா³.
168.Appaṭisandhike tāva byākaronto pavattīsu ṭhānaṃ atītoti katvā upapattīsu byākaroti nāma tattha paṭisandhiyā abhāvakittanato. Mahantatuṭṭhinoti vipulapamodā.
169. இமஸ்ஸாதி ‘‘அஸ்ஸா’’தி பத³ஸ்ஸ அத்த²வசனங். இமஸ்ஸ டி²தஸ்ஸ ஆயஸ்மதோ ஸாமங் தி³ட்டோ² வா ஹோதி அனுஸ்ஸவஸுதோ வாதி யோஜனா. ஸமாதி⁴பக்கி²கா த⁴ம்மா த⁴ம்மாதி அதி⁴ப்பேதா, ஸமாதி⁴ பன ஏவங்விஹாரீதி எத்த² விஹாரஸத்³தே³ன க³ஹிதோ. ஏவங்விமுத்தாதி எத்த² பன விமுத்திஸத்³தே³ன ப²லவிமுத்தி க³ஹிதா. சரதோபீதி ஸமத²விபஸ்ஸனாசாரேன சரதோபி விஹரந்தஸ்ஸபி. உபாஸகஉபாஸிகாடா²னேஸு லப்³ப⁴மானம்பி அரஹத்தங் அப்பகபா⁴வதோ பாளியங் அனுத்³த⁴டந்தி த³ட்ட²ப்³ப³ங். ஸேஸங் ஸுவிஞ்ஞெய்யமேவ.
169.Imassāti ‘‘assā’’ti padassa atthavacanaṃ. Imassa ṭhitassa āyasmato sāmaṃ diṭṭho vā hoti anussavasuto vāti yojanā. Samādhipakkhikā dhammā dhammāti adhippetā, samādhi pana evaṃvihārīti ettha vihārasaddena gahito. Evaṃvimuttāti ettha pana vimuttisaddena phalavimutti gahitā. Caratopīti samathavipassanācārena caratopi viharantassapi. Upāsakaupāsikāṭhānesu labbhamānampi arahattaṃ appakabhāvato pāḷiyaṃ anuddhaṭanti daṭṭhabbaṃ. Sesaṃ suviññeyyameva.
நளகபானஸுத்தவண்ணனாய லீனத்த²ப்பகாஸனா ஸமத்தா.
Naḷakapānasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 8. நளகபானஸுத்தங் • 8. Naḷakapānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 8. நளகபானஸுத்தவண்ணனா • 8. Naḷakapānasuttavaṇṇanā
