| Library / Tipiṭaka / तिपिटक • Tipiṭaka / अपदानपाळि • Apadānapāḷi |
४८. नळमालिवग्गो
48. Naḷamālivaggo
१. नळमालियत्थेरअपदानं
1. Naḷamāliyattheraapadānaṃ
१.
1.
‘‘सुवण्णवण्णं सम्बुद्धं, आहुतीनं पटिग्गहं।
‘‘Suvaṇṇavaṇṇaṃ sambuddhaṃ, āhutīnaṃ paṭiggahaṃ;
विपिनग्गेन गच्छन्तं, अद्दसं लोकनायकं॥
Vipinaggena gacchantaṃ, addasaṃ lokanāyakaṃ.
२.
2.
‘‘नळमालं गहेत्वान, निक्खमन्तो च तावदे।
‘‘Naḷamālaṃ gahetvāna, nikkhamanto ca tāvade;
तत्थद्दसासिं सम्बुद्धं, ओघतिण्णमनासवं॥
Tatthaddasāsiṃ sambuddhaṃ, oghatiṇṇamanāsavaṃ.
३.
3.
‘‘पसन्नचित्तो सुमनो, नळमालमपूजयिं।
‘‘Pasannacitto sumano, naḷamālamapūjayiṃ;
दक्खिणेय्यं महावीरं, सब्बलोकानुकम्पकं॥
Dakkhiṇeyyaṃ mahāvīraṃ, sabbalokānukampakaṃ.
४.
4.
दुग्गतिं नाभिजानामि, बुद्धपूजायिदं फलं॥
Duggatiṃ nābhijānāmi, buddhapūjāyidaṃ phalaṃ.
५.
5.
‘‘किलेसा झापिता मय्हं, भवा सब्बे समूहता।
‘‘Kilesā jhāpitā mayhaṃ, bhavā sabbe samūhatā;
नागोव बन्धनं छेत्वा, विहरामि अनासवो॥
Nāgova bandhanaṃ chetvā, viharāmi anāsavo.
६.
6.
‘‘स्वागतं वत मे आसि, मम बुद्धस्स सन्तिके।
‘‘Svāgataṃ vata me āsi, mama buddhassa santike;
तिस्सो विज्जा अनुप्पत्ता, कतं बुद्धस्स सासनं॥
Tisso vijjā anuppattā, kataṃ buddhassa sāsanaṃ.
७.
7.
‘‘पटिसम्भिदा चतस्सो, विमोक्खापि च अट्ठिमे।
‘‘Paṭisambhidā catasso, vimokkhāpi ca aṭṭhime;
छळभिञ्ञा सच्छिकता, कतं बुद्धस्स सासनं’’॥
Chaḷabhiññā sacchikatā, kataṃ buddhassa sāsanaṃ’’.
इत्थं सुदं आयस्मा नळमालियो थेरो इमा गाथायो
Itthaṃ sudaṃ āyasmā naḷamāliyo thero imā gāthāyo
अभासित्थाति।
Abhāsitthāti.
नळमालियत्थेरस्सापदानं पठमं।
Naḷamāliyattherassāpadānaṃ paṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १-६०. सकिंसम्मज्जकत्थेरअपदानादिवण्णना • 1-60. Sakiṃsammajjakattheraapadānādivaṇṇanā
