| Library / Tipiṭaka / තිපිටක • Tipiṭaka / අපදානපාළි • Apadānapāḷi |
48. නළමාලිවග්‌ගො
48. Naḷamālivaggo
1. නළමාලියත්‌ථෙරඅපදානං
1. Naḷamāliyattheraapadānaṃ
1.
1.
‘‘සුවණ්‌ණවණ්‌ණං සම්‌බුද්‌ධං, ආහුතීනං පටිග්‌ගහං;
‘‘Suvaṇṇavaṇṇaṃ sambuddhaṃ, āhutīnaṃ paṭiggahaṃ;
විපිනග්‌ගෙන ගච්‌ඡන්‌තං, අද්‌දසං ලොකනායකං.
Vipinaggena gacchantaṃ, addasaṃ lokanāyakaṃ.
2.
2.
‘‘නළමාලං ගහෙත්‌වාන, නික්‌ඛමන්‌තො ච තාවදෙ;
‘‘Naḷamālaṃ gahetvāna, nikkhamanto ca tāvade;
තත්‌ථද්‌දසාසිං සම්‌බුද්‌ධං, ඔඝතිණ්‌ණමනාසවං.
Tatthaddasāsiṃ sambuddhaṃ, oghatiṇṇamanāsavaṃ.
3.
3.
‘‘පසන්‌නචිත්‌තො සුමනො, නළමාලමපූජයිං;
‘‘Pasannacitto sumano, naḷamālamapūjayiṃ;
දක්‌ඛිණෙය්‍යං මහාවීරං, සබ්‌බලොකානුකම්‌පකං.
Dakkhiṇeyyaṃ mahāvīraṃ, sabbalokānukampakaṃ.
4.
4.
දුග්‌ගතිං නාභිජානාමි, බුද්‌ධපූජායිදං ඵලං.
Duggatiṃ nābhijānāmi, buddhapūjāyidaṃ phalaṃ.
5.
5.
‘‘කිලෙසා ඣාපිතා මය්‌හං, භවා සබ්‌බෙ සමූහතා;
‘‘Kilesā jhāpitā mayhaṃ, bhavā sabbe samūhatā;
නාගොව බන්‌ධනං ඡෙත්‌වා, විහරාමි අනාසවො.
Nāgova bandhanaṃ chetvā, viharāmi anāsavo.
6.
6.
‘‘ස්‌වාගතං වත මෙ ආසි, මම බුද්‌ධස්‌ස සන්‌තිකෙ;
‘‘Svāgataṃ vata me āsi, mama buddhassa santike;
තිස්‌සො විජ්‌ජා අනුප්‌පත්‌තා, කතං බුද්‌ධස්‌ස සාසනං.
Tisso vijjā anuppattā, kataṃ buddhassa sāsanaṃ.
7.
7.
‘‘පටිසම්‌භිදා චතස්‌සො, විමොක්‌ඛාපි ච අට්‌ඨිමෙ;
‘‘Paṭisambhidā catasso, vimokkhāpi ca aṭṭhime;
ඡළභිඤ්‌ඤා සච්‌ඡිකතා, කතං බුද්‌ධස්‌ස සාසනං’’.
Chaḷabhiññā sacchikatā, kataṃ buddhassa sāsanaṃ’’.
ඉත්‌ථං සුදං ආයස්‌මා නළමාලියො ථෙරො ඉමා ගාථායො
Itthaṃ sudaṃ āyasmā naḷamāliyo thero imā gāthāyo
අභාසිත්‌ථාති.
Abhāsitthāti.
නළමාලියත්‌ථෙරස්‌සාපදානං පඨමං.
Naḷamāliyattherassāpadānaṃ paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / අපදාන-අට්‌ඨකථා • Apadāna-aṭṭhakathā / 1-60. සකිංසම්‌මජ්‌ජකත්‌ථෙරඅපදානාදිවණ්‌ණනා • 1-60. Sakiṃsammajjakattheraapadānādivaṇṇanā
