| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৭. নল়মালিযত্থেরঅপদানৰণ্ণনা
7. Naḷamāliyattheraapadānavaṇṇanā
পদুমুত্তরবুদ্ধস্সাতিআদিকং আযস্মতো নল়মালিযত্থেরস্স অপদানং। এসোপি পুরিমজিনৰরেসু কতাধিকারো অনেকাসু জাতীসু ৰিৰট্টূপনিস্সযানি কুসলকম্মানি উপচিনন্তো পদুমুত্তরস্স ভগৰতো কালে কুলগেহে নিব্বত্তো ৰুদ্ধিমন্ৰায ঘরাৰাসং সণ্ঠপেত্ৰা কামে আদীনৰং দিস্ৰা গেহং পহায তাপসপব্বজ্জং পব্বজিত্ৰা হিমৰন্তে ৰসন্তো তত্থাগতং ভগৰন্তং দিস্ৰা পসন্নো ৰন্দিত্ৰা তিণসন্থরং সন্থরিত্ৰা তত্থ নিসিন্নস্স ভগৰতো নল়মালেহি বীজনিং কত্ৰা বীজেত্ৰা অদাসি। পটিগ্গহেসি ভগৰা তস্সানুকম্পায, অনুমোদনঞ্চ অকাসি। সো তেন পুঞ্ঞেন দেৰমনুস্সেসু সংসরন্তো উপ্পন্নুপ্পন্নভৰে পরিল়াহসন্তাপৰিৰজ্জিতো কাযচিত্তচেতসিকসুখপ্পত্তো অনেকসুখমনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰুদ্ধিমন্ৰায পুব্বৰাসনাবলেন সত্থরি পসন্নো পব্বজিত্ৰা নচিরস্সেৰ অরহা অহোসি।
Padumuttarabuddhassātiādikaṃ āyasmato naḷamāliyattherassa apadānaṃ. Esopi purimajinavaresu katādhikāro anekāsu jātīsu vivaṭṭūpanissayāni kusalakammāni upacinanto padumuttarassa bhagavato kāle kulagehe nibbatto vuddhimanvāya gharāvāsaṃ saṇṭhapetvā kāme ādīnavaṃ disvā gehaṃ pahāya tāpasapabbajjaṃ pabbajitvā himavante vasanto tatthāgataṃ bhagavantaṃ disvā pasanno vanditvā tiṇasantharaṃ santharitvā tattha nisinnassa bhagavato naḷamālehi bījaniṃ katvā bījetvā adāsi. Paṭiggahesi bhagavā tassānukampāya, anumodanañca akāsi. So tena puññena devamanussesu saṃsaranto uppannuppannabhave pariḷāhasantāpavivajjito kāyacittacetasikasukhappatto anekasukhamanubhavitvā imasmiṃ buddhuppāde ekasmiṃ kulagehe nibbatto vuddhimanvāya pubbavāsanābalena satthari pasanno pabbajitvā nacirasseva arahā ahosi.
৩৬. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পদুমুত্তরবুদ্ধস্সাতিআদিমাহ। তং হেট্ঠা ৰুত্তমেৰ।
36. So aparabhāge attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ heṭṭhā vuttameva.
৩৭. নল়মালং গহেত্ৰানাতি নল়তি অসারো নিস্সারো হুত্ৰা ৰেল়ুৰংসতোপি তনুকো সল্লহুকো জাতোতি নল়ো, নল়স্স মালা পুপ্ফং নল়মালং, তেন নল়মালেন বীজনিং কারেসিন্তি সম্বন্ধো । বীজিস্সতি জনিস্সতি ৰাতো অনেনাতি বীজনী, তং বীজনিং বুদ্ধস্স উপনামেসিং, পটিগ্গহেসিন্তি অত্থো। সেসং সব্বত্থ উত্তানমেৰাতি।
37.Naḷamālaṃ gahetvānāti naḷati asāro nissāro hutvā veḷuvaṃsatopi tanuko sallahuko jātoti naḷo, naḷassa mālā pupphaṃ naḷamālaṃ, tena naḷamālena bījaniṃ kāresinti sambandho . Bījissati janissati vāto anenāti bījanī, taṃ bījaniṃ buddhassa upanāmesiṃ, paṭiggahesinti attho. Sesaṃ sabbattha uttānamevāti.
নল়মালিযত্থেরঅপদানৰণ্ণনা সমত্তা।
Naḷamāliyattheraapadānavaṇṇanā samattā.
সত্তমভাণৰারৰণ্ণনা সমত্তা।
Sattamabhāṇavāravaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৭. নল়মালিযত্থেরঅপদানং • 7. Naḷamāliyattheraapadānaṃ
