| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
७. नळमालियत्थेरअपदानवण्णना
7. Naḷamāliyattheraapadānavaṇṇanā
पदुमुत्तरबुद्धस्सातिआदिकं आयस्मतो नळमालियत्थेरस्स अपदानं। एसोपि पुरिमजिनवरेसु कताधिकारो अनेकासु जातीसु विवट्टूपनिस्सयानि कुसलकम्मानि उपचिनन्तो पदुमुत्तरस्स भगवतो काले कुलगेहे निब्बत्तो वुद्धिमन्वाय घरावासं सण्ठपेत्वा कामे आदीनवं दिस्वा गेहं पहाय तापसपब्बज्जं पब्बजित्वा हिमवन्ते वसन्तो तत्थागतं भगवन्तं दिस्वा पसन्नो वन्दित्वा तिणसन्थरं सन्थरित्वा तत्थ निसिन्नस्स भगवतो नळमालेहि बीजनिं कत्वा बीजेत्वा अदासि। पटिग्गहेसि भगवा तस्सानुकम्पाय, अनुमोदनञ्च अकासि। सो तेन पुञ्ञेन देवमनुस्सेसु संसरन्तो उप्पन्नुप्पन्नभवे परिळाहसन्तापविवज्जितो कायचित्तचेतसिकसुखप्पत्तो अनेकसुखमनुभवित्वा इमस्मिं बुद्धुप्पादे एकस्मिं कुलगेहे निब्बत्तो वुद्धिमन्वाय पुब्बवासनाबलेन सत्थरि पसन्नो पब्बजित्वा नचिरस्सेव अरहा अहोसि।
Padumuttarabuddhassātiādikaṃ āyasmato naḷamāliyattherassa apadānaṃ. Esopi purimajinavaresu katādhikāro anekāsu jātīsu vivaṭṭūpanissayāni kusalakammāni upacinanto padumuttarassa bhagavato kāle kulagehe nibbatto vuddhimanvāya gharāvāsaṃ saṇṭhapetvā kāme ādīnavaṃ disvā gehaṃ pahāya tāpasapabbajjaṃ pabbajitvā himavante vasanto tatthāgataṃ bhagavantaṃ disvā pasanno vanditvā tiṇasantharaṃ santharitvā tattha nisinnassa bhagavato naḷamālehi bījaniṃ katvā bījetvā adāsi. Paṭiggahesi bhagavā tassānukampāya, anumodanañca akāsi. So tena puññena devamanussesu saṃsaranto uppannuppannabhave pariḷāhasantāpavivajjito kāyacittacetasikasukhappatto anekasukhamanubhavitvā imasmiṃ buddhuppāde ekasmiṃ kulagehe nibbatto vuddhimanvāya pubbavāsanābalena satthari pasanno pabbajitvā nacirasseva arahā ahosi.
३६. सो अपरभागे अत्तनो पुब्बकम्मं सरित्वा सोमनस्सजातो पुब्बचरितापदानं पकासेन्तो पदुमुत्तरबुद्धस्सातिआदिमाह। तं हेट्ठा वुत्तमेव।
36. So aparabhāge attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ heṭṭhā vuttameva.
३७. नळमालं गहेत्वानाति नळति असारो निस्सारो हुत्वा वेळुवंसतोपि तनुको सल्लहुको जातोति नळो, नळस्स माला पुप्फं नळमालं, तेन नळमालेन बीजनिं कारेसिन्ति सम्बन्धो । बीजिस्सति जनिस्सति वातो अनेनाति बीजनी, तं बीजनिं बुद्धस्स उपनामेसिं, पटिग्गहेसिन्ति अत्थो। सेसं सब्बत्थ उत्तानमेवाति।
37.Naḷamālaṃ gahetvānāti naḷati asāro nissāro hutvā veḷuvaṃsatopi tanuko sallahuko jātoti naḷo, naḷassa mālā pupphaṃ naḷamālaṃ, tena naḷamālena bījaniṃ kāresinti sambandho . Bījissati janissati vāto anenāti bījanī, taṃ bījaniṃ buddhassa upanāmesiṃ, paṭiggahesinti attho. Sesaṃ sabbattha uttānamevāti.
नळमालियत्थेरअपदानवण्णना समत्ता।
Naḷamāliyattheraapadānavaṇṇanā samattā.
सत्तमभाणवारवण्णना समत्ता।
Sattamabhāṇavāravaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / ७. नळमालियत्थेरअपदानं • 7. Naḷamāliyattheraapadānaṃ
