| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၇. နဠမာလိယတ္ထေရအပဒာနဝဏ္ဏနာ
7. Naḷamāliyattheraapadānavaṇṇanā
ပဒုမုတ္တရဗုဒ္ဓသ္သာတိအာဒိကံ အာယသ္မတော နဠမာလိယတ္ထေရသ္သ အပဒာနံ။ ဧသောပိ ပုရိမဇိနဝရေသု ကတာဓိကာရော အနေကာသု ဇာတီသု ဝိဝဋ္ဋူပနိသ္သယာနိ ကုသလကမ္မာနိ ဥပစိနန္တော ပဒုမုတ္တရသ္သ ဘဂဝတော ကာလေ ကုလဂေဟေ နိဗ္ဗတ္တော ဝုဒ္ဓိမန္ဝာယ ဃရာဝာသံ သဏ္ဌပေတ္ဝာ ကာမေ အာဒီနဝံ ဒိသ္ဝာ ဂေဟံ ပဟာယ တာပသပဗ္ဗဇ္ဇံ ပဗ္ဗဇိတ္ဝာ ဟိမဝန္တေ ဝသန္တော တတ္ထာဂတံ ဘဂဝန္တံ ဒိသ္ဝာ ပသန္နော ဝန္ဒိတ္ဝာ တိဏသန္ထရံ သန္ထရိတ္ဝာ တတ္ထ နိသိန္နသ္သ ဘဂဝတော နဠမာလေဟိ ဗီဇနိံ ကတ္ဝာ ဗီဇေတ္ဝာ အဒာသိ။ ပဋိဂ္ဂဟေသိ ဘဂဝာ တသ္သာနုကမ္ပာယ, အနုမောဒနဉ္စ အကာသိ။ သော တေန ပုညေန ဒေဝမနုသ္သေသု သံသရန္တော ဥပ္ပန္နုပ္ပန္နဘဝေ ပရိဠာဟသန္တာပဝိဝဇ္ဇိတော ကာယစိတ္တစေတသိကသုခပ္ပတ္တော အနေကသုခမနုဘဝိတ္ဝာ ဣမသ္မိံ ဗုဒ္ဓုပ္ပာဒေ ဧကသ္မိံ ကုလဂေဟေ နိဗ္ဗတ္တော ဝုဒ္ဓိမန္ဝာယ ပုဗ္ဗဝာသနာဗလေန သတ္ထရိ ပသန္နော ပဗ္ဗဇိတ္ဝာ နစိရသ္သေဝ အရဟာ အဟောသိ။
Padumuttarabuddhassātiādikaṃ āyasmato naḷamāliyattherassa apadānaṃ. Esopi purimajinavaresu katādhikāro anekāsu jātīsu vivaṭṭūpanissayāni kusalakammāni upacinanto padumuttarassa bhagavato kāle kulagehe nibbatto vuddhimanvāya gharāvāsaṃ saṇṭhapetvā kāme ādīnavaṃ disvā gehaṃ pahāya tāpasapabbajjaṃ pabbajitvā himavante vasanto tatthāgataṃ bhagavantaṃ disvā pasanno vanditvā tiṇasantharaṃ santharitvā tattha nisinnassa bhagavato naḷamālehi bījaniṃ katvā bījetvā adāsi. Paṭiggahesi bhagavā tassānukampāya, anumodanañca akāsi. So tena puññena devamanussesu saṃsaranto uppannuppannabhave pariḷāhasantāpavivajjito kāyacittacetasikasukhappatto anekasukhamanubhavitvā imasmiṃ buddhuppāde ekasmiṃ kulagehe nibbatto vuddhimanvāya pubbavāsanābalena satthari pasanno pabbajitvā nacirasseva arahā ahosi.
၃၆. သော အပရဘာဂေ အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ပဒုမုတ္တရဗုဒ္ဓသ္သာတိအာဒိမာဟ။ တံ ဟေဋ္ဌာ ဝုတ္တမေဝ။
36. So aparabhāge attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ heṭṭhā vuttameva.
၃၇. နဠမာလံ ဂဟေတ္ဝာနာတိ နဠတိ အသာရော နိသ္သာရော ဟုတ္ဝာ ဝေဠုဝံသတောပိ တနုကော သလ္လဟုကော ဇာတောတိ နဠော, နဠသ္သ မာလာ ပုပ္ဖံ နဠမာလံ, တေန နဠမာလေန ဗီဇနိံ ကာရေသိန္တိ သမ္ဗန္ဓော ။ ဗီဇိသ္သတိ ဇနိသ္သတိ ဝာတော အနေနာတိ ဗီဇနီ, တံ ဗီဇနိံ ဗုဒ္ဓသ္သ ဥပနာမေသိံ, ပဋိဂ္ဂဟေသိန္တိ အတ္ထော။ သေသံ သဗ္ဗတ္ထ ဥတ္တာနမေဝာတိ။
37.Naḷamālaṃ gahetvānāti naḷati asāro nissāro hutvā veḷuvaṃsatopi tanuko sallahuko jātoti naḷo, naḷassa mālā pupphaṃ naḷamālaṃ, tena naḷamālena bījaniṃ kāresinti sambandho . Bījissati janissati vāto anenāti bījanī, taṃ bījaniṃ buddhassa upanāmesiṃ, paṭiggahesinti attho. Sesaṃ sabbattha uttānamevāti.
နဠမာလိယတ္ထေရအပဒာနဝဏ္ဏနာ သမတ္တာ။
Naḷamāliyattheraapadānavaṇṇanā samattā.
သတ္တမဘာဏဝာရဝဏ္ဏနာ သမတ္တာ။
Sattamabhāṇavāravaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၇. နဠမာလိယတ္ထေရအပဒာနံ • 7. Naḷamāliyattheraapadānaṃ
