| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೭. ನಳಮಾಲಿಯತ್ಥೇರಅಪದಾನವಣ್ಣನಾ
7. Naḷamāliyattheraapadānavaṇṇanā
ಪದುಮುತ್ತರಬುದ್ಧಸ್ಸಾತಿಆದಿಕಂ ಆಯಸ್ಮತೋ ನಳಮಾಲಿಯತ್ಥೇರಸ್ಸ ಅಪದಾನಂ। ಏಸೋಪಿ ಪುರಿಮಜಿನವರೇಸು ಕತಾಧಿಕಾರೋ ಅನೇಕಾಸು ಜಾತೀಸು ವಿವಟ್ಟೂಪನಿಸ್ಸಯಾನಿ ಕುಸಲಕಮ್ಮಾನಿ ಉಪಚಿನನ್ತೋ ಪದುಮುತ್ತರಸ್ಸ ಭಗವತೋ ಕಾಲೇ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಘರಾವಾಸಂ ಸಣ್ಠಪೇತ್ವಾ ಕಾಮೇ ಆದೀನವಂ ದಿಸ್ವಾ ಗೇಹಂ ಪಹಾಯ ತಾಪಸಪಬ್ಬಜ್ಜಂ ಪಬ್ಬಜಿತ್ವಾ ಹಿಮವನ್ತೇ ವಸನ್ತೋ ತತ್ಥಾಗತಂ ಭಗವನ್ತಂ ದಿಸ್ವಾ ಪಸನ್ನೋ ವನ್ದಿತ್ವಾ ತಿಣಸನ್ಥರಂ ಸನ್ಥರಿತ್ವಾ ತತ್ಥ ನಿಸಿನ್ನಸ್ಸ ಭಗವತೋ ನಳಮಾಲೇಹಿ ಬೀಜನಿಂ ಕತ್ವಾ ಬೀಜೇತ್ವಾ ಅದಾಸಿ। ಪಟಿಗ್ಗಹೇಸಿ ಭಗವಾ ತಸ್ಸಾನುಕಮ್ಪಾಯ, ಅನುಮೋದನಞ್ಚ ಅಕಾಸಿ। ಸೋ ತೇನ ಪುಞ್ಞೇನ ದೇವಮನುಸ್ಸೇಸು ಸಂಸರನ್ತೋ ಉಪ್ಪನ್ನುಪ್ಪನ್ನಭವೇ ಪರಿಳಾಹಸನ್ತಾಪವಿವಜ್ಜಿತೋ ಕಾಯಚಿತ್ತಚೇತಸಿಕಸುಖಪ್ಪತ್ತೋ ಅನೇಕಸುಖಮನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಪುಬ್ಬವಾಸನಾಬಲೇನ ಸತ್ಥರಿ ಪಸನ್ನೋ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Padumuttarabuddhassātiādikaṃ āyasmato naḷamāliyattherassa apadānaṃ. Esopi purimajinavaresu katādhikāro anekāsu jātīsu vivaṭṭūpanissayāni kusalakammāni upacinanto padumuttarassa bhagavato kāle kulagehe nibbatto vuddhimanvāya gharāvāsaṃ saṇṭhapetvā kāme ādīnavaṃ disvā gehaṃ pahāya tāpasapabbajjaṃ pabbajitvā himavante vasanto tatthāgataṃ bhagavantaṃ disvā pasanno vanditvā tiṇasantharaṃ santharitvā tattha nisinnassa bhagavato naḷamālehi bījaniṃ katvā bījetvā adāsi. Paṭiggahesi bhagavā tassānukampāya, anumodanañca akāsi. So tena puññena devamanussesu saṃsaranto uppannuppannabhave pariḷāhasantāpavivajjito kāyacittacetasikasukhappatto anekasukhamanubhavitvā imasmiṃ buddhuppāde ekasmiṃ kulagehe nibbatto vuddhimanvāya pubbavāsanābalena satthari pasanno pabbajitvā nacirasseva arahā ahosi.
೩೬. ಸೋ ಅಪರಭಾಗೇ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಪದುಮುತ್ತರಬುದ್ಧಸ್ಸಾತಿಆದಿಮಾಹ। ತಂ ಹೇಟ್ಠಾ ವುತ್ತಮೇವ।
36. So aparabhāge attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ heṭṭhā vuttameva.
೩೭. ನಳಮಾಲಂ ಗಹೇತ್ವಾನಾತಿ ನಳತಿ ಅಸಾರೋ ನಿಸ್ಸಾರೋ ಹುತ್ವಾ ವೇಳುವಂಸತೋಪಿ ತನುಕೋ ಸಲ್ಲಹುಕೋ ಜಾತೋತಿ ನಳೋ, ನಳಸ್ಸ ಮಾಲಾ ಪುಪ್ಫಂ ನಳಮಾಲಂ, ತೇನ ನಳಮಾಲೇನ ಬೀಜನಿಂ ಕಾರೇಸಿನ್ತಿ ಸಮ್ಬನ್ಧೋ । ಬೀಜಿಸ್ಸತಿ ಜನಿಸ್ಸತಿ ವಾತೋ ಅನೇನಾತಿ ಬೀಜನೀ, ತಂ ಬೀಜನಿಂ ಬುದ್ಧಸ್ಸ ಉಪನಾಮೇಸಿಂ, ಪಟಿಗ್ಗಹೇಸಿನ್ತಿ ಅತ್ಥೋ। ಸೇಸಂ ಸಬ್ಬತ್ಥ ಉತ್ತಾನಮೇವಾತಿ।
37.Naḷamālaṃ gahetvānāti naḷati asāro nissāro hutvā veḷuvaṃsatopi tanuko sallahuko jātoti naḷo, naḷassa mālā pupphaṃ naḷamālaṃ, tena naḷamālena bījaniṃ kāresinti sambandho . Bījissati janissati vāto anenāti bījanī, taṃ bījaniṃ buddhassa upanāmesiṃ, paṭiggahesinti attho. Sesaṃ sabbattha uttānamevāti.
ನಳಮಾಲಿಯತ್ಥೇರಅಪದಾನವಣ್ಣನಾ ಸಮತ್ತಾ।
Naḷamāliyattheraapadānavaṇṇanā samattā.
ಸತ್ತಮಭಾಣವಾರವಣ್ಣನಾ ಸಮತ್ತಾ।
Sattamabhāṇavāravaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೭. ನಳಮಾಲಿಯತ್ಥೇರಅಪದಾನಂ • 7. Naḷamāliyattheraapadānaṃ
