| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
7. නළමාලියත්‌ථෙරඅපදානවණ්‌ණනා
7. Naḷamāliyattheraapadānavaṇṇanā
පදුමුත්‌තරබුද්‌ධස්‌සාතිආදිකං ආයස්‌මතො නළමාලියත්‌ථෙරස්‌ස අපදානං. එසොපි පුරිමජිනවරෙසු කතාධිකාරො අනෙකාසු ජාතීසු විවට්‌ටූපනිස්‌සයානි කුසලකම්‌මානි උපචිනන්‌තො පදුමුත්‌තරස්‌ස භගවතො කාලෙ කුලගෙහෙ නිබ්‌බත්‌තො වුද්‌ධිමන්‌වාය ඝරාවාසං සණ්‌ඨපෙත්‌වා කාමෙ ආදීනවං දිස්‌වා ගෙහං පහාය තාපසපබ්‌බජ්‌ජං පබ්‌බජිත්‌වා හිමවන්‌තෙ වසන්‌තො තත්‌ථාගතං භගවන්‌තං දිස්‌වා පසන්‌නො වන්‌දිත්‌වා තිණසන්‌ථරං සන්‌ථරිත්‌වා තත්‌ථ නිසින්‌නස්‌ස භගවතො නළමාලෙහි බීජනිං කත්‌වා බීජෙත්‌වා අදාසි. පටිග්‌ගහෙසි භගවා තස්‌සානුකම්‌පාය, අනුමොදනඤ්‌ච අකාසි. සො තෙන පුඤ්‌ඤෙන දෙවමනුස්‌සෙසු සංසරන්‌තො උප්‌පන්‌නුප්‌පන්‌නභවෙ පරිළාහසන්‌තාපවිවජ්‌ජිතො කායචිත්‌තචෙතසිකසුඛප්‌පත්‌තො අනෙකසුඛමනුභවිත්‌වා ඉමස්‌මිං බුද්‌ධුප්‌පාදෙ එකස්‌මිං කුලගෙහෙ නිබ්‌බත්‌තො වුද්‌ධිමන්‌වාය පුබ්‌බවාසනාබලෙන සත්‌ථරි පසන්‌නො පබ්‌බජිත්‌වා නචිරස්‌සෙව අරහා අහොසි.
Padumuttarabuddhassātiādikaṃ āyasmato naḷamāliyattherassa apadānaṃ. Esopi purimajinavaresu katādhikāro anekāsu jātīsu vivaṭṭūpanissayāni kusalakammāni upacinanto padumuttarassa bhagavato kāle kulagehe nibbatto vuddhimanvāya gharāvāsaṃ saṇṭhapetvā kāme ādīnavaṃ disvā gehaṃ pahāya tāpasapabbajjaṃ pabbajitvā himavante vasanto tatthāgataṃ bhagavantaṃ disvā pasanno vanditvā tiṇasantharaṃ santharitvā tattha nisinnassa bhagavato naḷamālehi bījaniṃ katvā bījetvā adāsi. Paṭiggahesi bhagavā tassānukampāya, anumodanañca akāsi. So tena puññena devamanussesu saṃsaranto uppannuppannabhave pariḷāhasantāpavivajjito kāyacittacetasikasukhappatto anekasukhamanubhavitvā imasmiṃ buddhuppāde ekasmiṃ kulagehe nibbatto vuddhimanvāya pubbavāsanābalena satthari pasanno pabbajitvā nacirasseva arahā ahosi.
36. සො අපරභාගෙ අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො පදුමුත්‌තරබුද්‌ධස්‌සාතිආදිමාහ. තං හෙට්‌ඨා වුත්‌තමෙව.
36. So aparabhāge attano pubbakammaṃ saritvā somanassajāto pubbacaritāpadānaṃ pakāsento padumuttarabuddhassātiādimāha. Taṃ heṭṭhā vuttameva.
37. නළමාලං ගහෙත්‌වානාති නළති අසාරො නිස්‌සාරො හුත්‌වා වෙළුවංසතොපි තනුකො සල්‌ලහුකො ජාතොති නළො, නළස්‌ස මාලා පුප්‌ඵං නළමාලං, තෙන නළමාලෙන බීජනිං කාරෙසින්‌ති සම්‌බන්‌ධො . බීජිස්‌සති ජනිස්‌සති වාතො අනෙනාති බීජනී, තං බීජනිං බුද්‌ධස්‌ස උපනාමෙසිං, පටිග්‌ගහෙසින්‌ති අත්‌ථො. සෙසං සබ්‌බත්‌ථ උත්‌තානමෙවාති.
37.Naḷamālaṃ gahetvānāti naḷati asāro nissāro hutvā veḷuvaṃsatopi tanuko sallahuko jātoti naḷo, naḷassa mālā pupphaṃ naḷamālaṃ, tena naḷamālena bījaniṃ kāresinti sambandho . Bījissati janissati vāto anenāti bījanī, taṃ bījaniṃ buddhassa upanāmesiṃ, paṭiggahesinti attho. Sesaṃ sabbattha uttānamevāti.
නළමාලියත්‌ථෙරඅපදානවණ්‌ණනා සමත්‌තා.
Naḷamāliyattheraapadānavaṇṇanā samattā.
සත්‌තමභාණවාරවණ්‌ණනා සමත්‌තා.
Sattamabhāṇavāravaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 7. නළමාලියත්‌ථෙරඅපදානං • 7. Naḷamāliyattheraapadānaṃ
