| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. நாலந்த³ஸுத்தங்
2. Nālandasuttaṃ
378. ஏகங் ஸமயங் ப⁴க³வா நாலந்தா³யங் விஹரதி பாவாரிகம்ப³வனே. அத² கோ² ஆயஸ்மா ஸாரிபுத்தோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஸாரிபுத்தோ ப⁴க³வந்தங் ஏதத³வோச – ‘‘ஏவங்பஸன்னோ அஹங், ப⁴ந்தே, ப⁴க³வதி! ந சாஹு, ந ச ப⁴விஸ்ஸதி, ந சேதரஹி விஜ்ஜதி அஞ்ஞோ ஸமணோ வா ப்³ராஹ்மணோ வா ப⁴க³வதா பி⁴ய்யோபி⁴ஞ்ஞதரோ, யதி³த³ங் – ஸம்போ³தி⁴ய’’ந்தி. ‘‘உளாரா கோ² த்யாயங், ஸாரிபுத்த, ஆஸபீ⁴ வாசா பா⁴ஸிதா, ஏகங்ஸோ க³ஹிதோ, ஸீஹனாதோ³ நதி³தோ – ‘ஏவங்பஸன்னோ அஹங், ப⁴ந்தே, ப⁴க³வதி! ந சாஹு, ந ச ப⁴விஸ்ஸதி ந சேதரஹி விஜ்ஜதி அஞ்ஞோ ஸமணோ வா ப்³ராஹ்மணோ வா ப⁴க³வதா பி⁴ய்யோபி⁴ஞ்ஞதரோ, யதி³த³ங் – ஸம்போ³தி⁴ய’’’ந்தி.
378. Ekaṃ samayaṃ bhagavā nālandāyaṃ viharati pāvārikambavane. Atha kho āyasmā sāriputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā sāriputto bhagavantaṃ etadavoca – ‘‘evaṃpasanno ahaṃ, bhante, bhagavati! Na cāhu, na ca bhavissati, na cetarahi vijjati añño samaṇo vā brāhmaṇo vā bhagavatā bhiyyobhiññataro, yadidaṃ – sambodhiya’’nti. ‘‘Uḷārā kho tyāyaṃ, sāriputta, āsabhī vācā bhāsitā, ekaṃso gahito, sīhanādo nadito – ‘evaṃpasanno ahaṃ, bhante, bhagavati! Na cāhu, na ca bhavissati na cetarahi vijjati añño samaṇo vā brāhmaṇo vā bhagavatā bhiyyobhiññataro, yadidaṃ – sambodhiya’’’nti.
‘‘கிங் நு தே, ஸாரிபுத்த, யே தே அஹேஸுங் அதீதமத்³தா⁴னங் அரஹந்தோ ஸம்மாஸம்பு³த்³தா⁴, ஸப்³பே³ தே ப⁴க³வந்தோ சேதஸா சேதோ பரிச்ச விதி³தா – ‘ஏவங்ஸீலா தே ப⁴க³வந்தோ அஹேஸுங்’ இதி வா, ‘ஏவங்த⁴ம்மா தே ப⁴க³வந்தோ அஹேஸுங்’ இதி வா, ‘ஏவங்பஞ்ஞா தே ப⁴க³வந்தோ அஹேஸுங்’ இதி வா, ‘ஏவங்விஹாரினோ தே ப⁴க³வந்தோ அஹேஸுங்’ இதி வா, ‘ஏவங்விமுத்தா தே ப⁴க³வந்தோ அஹேஸுங்’ இதி வா’’தி? ‘‘நோ ஹேதங், ப⁴ந்தே’’!
‘‘Kiṃ nu te, sāriputta, ye te ahesuṃ atītamaddhānaṃ arahanto sammāsambuddhā, sabbe te bhagavanto cetasā ceto paricca viditā – ‘evaṃsīlā te bhagavanto ahesuṃ’ iti vā, ‘evaṃdhammā te bhagavanto ahesuṃ’ iti vā, ‘evaṃpaññā te bhagavanto ahesuṃ’ iti vā, ‘evaṃvihārino te bhagavanto ahesuṃ’ iti vā, ‘evaṃvimuttā te bhagavanto ahesuṃ’ iti vā’’ti? ‘‘No hetaṃ, bhante’’!
‘‘கிங் பன தே, ஸாரிபுத்த, யே தே ப⁴விஸ்ஸந்தி அனாக³தமத்³தா⁴னங் அரஹந்தோ ஸம்மாஸம்பு³த்³தா⁴, ஸப்³பே³ தே ப⁴க³வந்தோ சேதஸா சேதோ பரிச்ச விதி³தா – ‘ஏவங்ஸீலா தே ப⁴க³வந்தோ ப⁴விஸ்ஸந்தி’ இதி வா, ‘ஏவங்த⁴ம்மா தே ப⁴க³வந்தோ ப⁴விஸ்ஸந்தி’ இதி வா, ‘ஏவங்பஞ்ஞா தே ப⁴க³வந்தோ ப⁴விஸ்ஸந்தி’ இதி வா, ‘ஏவங்விஹாரினோ தே ப⁴க³வந்தோ ப⁴விஸ்ஸந்தி’ இதி வா, ‘ஏவங்விமுத்தா தே ப⁴க³வந்தோ ப⁴விஸ்ஸந்தி’ இதி வா’’தி? ‘‘நோ ஹேதங், ப⁴ந்தே’’.
‘‘Kiṃ pana te, sāriputta, ye te bhavissanti anāgatamaddhānaṃ arahanto sammāsambuddhā, sabbe te bhagavanto cetasā ceto paricca viditā – ‘evaṃsīlā te bhagavanto bhavissanti’ iti vā, ‘evaṃdhammā te bhagavanto bhavissanti’ iti vā, ‘evaṃpaññā te bhagavanto bhavissanti’ iti vā, ‘evaṃvihārino te bhagavanto bhavissanti’ iti vā, ‘evaṃvimuttā te bhagavanto bhavissanti’ iti vā’’ti? ‘‘No hetaṃ, bhante’’.
‘‘கிங் பன த்யாஹங் 1, ஸாரிபுத்த, ஏதரஹி, அரஹங் ஸம்மாஸம்பு³த்³தோ⁴ சேதஸா சேதோ பரிச்ச விதி³தோ – ‘ஏவங்ஸீலோ ப⁴க³வா’ இதி வா, ‘ஏவங்த⁴ம்மோ ப⁴க³வா’ இதி வா, ‘ஏவங்பஞ்ஞோ ப⁴க³வா’ இதி வா, ‘ஏவங்விஹாரீ ப⁴க³வா’ இதி வா, ‘ஏவங்விமுத்தோ ப⁴க³வா’ இதி வா’’தி? ‘‘நோ ஹேதங், ப⁴ந்தே’’.
‘‘Kiṃ pana tyāhaṃ 2, sāriputta, etarahi, arahaṃ sammāsambuddho cetasā ceto paricca vidito – ‘evaṃsīlo bhagavā’ iti vā, ‘evaṃdhammo bhagavā’ iti vā, ‘evaṃpañño bhagavā’ iti vā, ‘evaṃvihārī bhagavā’ iti vā, ‘evaṃvimutto bhagavā’ iti vā’’ti? ‘‘No hetaṃ, bhante’’.
‘‘எத்த² ச தே, ஸாரிபுத்த, அதீதானாக³தபச்சுப்பன்னேஸு அரஹந்தேஸு ஸம்மாஸம்பு³த்³தே⁴ஸு சேதோபரியஞாணங் 3 நத்தி². அத² கிஞ்சரஹி த்யாயங், ஸாரிபுத்த, உளாரா ஆஸபீ⁴ வாசா பா⁴ஸிதா, ஏகங்ஸோ க³ஹிதோ, ஸீஹனாதோ³ நதி³தோ – ‘ஏவங்பஸன்னோ அஹங், ப⁴ந்தே, ப⁴க³வதி! ந சாஹு, ந ச ப⁴விஸ்ஸதி, ந சேதரஹி விஜ்ஜதி அஞ்ஞோ ஸமணோ வா ப்³ராஹ்மணோ வா ப⁴க³வதா’ பி⁴ய்யோபி⁴ஞ்ஞதரோ, யதி³த³ங் – ஸம்போ³தி⁴ய’’ந்தி?
‘‘Ettha ca te, sāriputta, atītānāgatapaccuppannesu arahantesu sammāsambuddhesu cetopariyañāṇaṃ 4 natthi. Atha kiñcarahi tyāyaṃ, sāriputta, uḷārā āsabhī vācā bhāsitā, ekaṃso gahito, sīhanādo nadito – ‘evaṃpasanno ahaṃ, bhante, bhagavati! Na cāhu, na ca bhavissati, na cetarahi vijjati añño samaṇo vā brāhmaṇo vā bhagavatā’ bhiyyobhiññataro, yadidaṃ – sambodhiya’’nti?
‘‘ந கோ² மே 5, ப⁴ந்தே, அதீதானாக³தபச்சுப்பன்னேஸு அரஹந்தேஸு ஸம்மாஸம்பு³த்³தே⁴ஸு சேதோபரியஞாணங் அத்தி², அபி ச மே த⁴ம்மன்வயோ விதி³தோ. ஸெய்யதா²பி, ப⁴ந்தே, ரஞ்ஞோ பச்சந்திமங் நக³ரங் த³ள்ஹுத்³தா⁴பங் 6 த³ள்ஹபாகாரதோரணங் ஏகத்³வாரங். தத்ரஸ்ஸ தோ³வாரிகோ பண்டி³தோ ப்³யத்தோ மேதா⁴வீ அஞ்ஞாதானங் நிவாரேதா ஞாதானங் பவேஸேதா. ஸோ தஸ்ஸ நக³ரஸ்ஸ ஸமந்தா அனுபரியாயபத²ங் அனுக்கமமானோ ந பஸ்ஸெய்ய பாகாரஸந்தி⁴ங் வா பாகாரவிவரங் வா, அந்தமஸோ பி³ளாரனிக்க²மனமத்தம்பி. தஸ்ஸ ஏவமஸ்ஸ – ‘யே கோ² கேசி ஓளாரிகா பாணா இமங் நக³ரங் பவிஸந்தி வா நிக்க²மந்தி வா, ஸப்³பே³ தே இமினாவ த்³வாரேன பவிஸந்தி வா நிக்க²மந்தி வா’தி. ஏவமேவ கோ² மே, ப⁴ந்தே, த⁴ம்மன்வயோ விதி³தோ – ‘யேபி தே, ப⁴ந்தே, அஹேஸுங் அதீதமத்³தா⁴னங் அரஹந்தோ ஸம்மாஸம்பு³த்³தா⁴, ஸப்³பே³ தே ப⁴க³வந்தோ பஞ்ச நீவரணே பஹாய, சேதஸோ உபக்கிலேஸே பஞ்ஞாய து³ப்³ப³லீகரணே, சதூஸு ஸதிபட்டா²னேஸு ஸுப்பதிட்டி²தசித்தா, ஸத்த பொ³ஜ்ஜ²ங்கே³ யதா²பூ⁴தங் பா⁴வெத்வா, அனுத்தரங் ஸம்மாஸம்போ³தி⁴ங் அபி⁴ஸம்பு³ஜ்ஜி²ங்ஸு. யேபி தே, ப⁴ந்தே, ப⁴விஸ்ஸந்தி அனாக³தமத்³தா⁴னங் அரஹந்தோ ஸம்மாஸம்பு³த்³தா⁴, ஸப்³பே³ தே ப⁴க³வந்தோ பஞ்ச நீவரணே பஹாய, சேதஸோ உபக்கிலேஸே பஞ்ஞாய து³ப்³ப³லீகரணே, சதூஸு ஸதிபட்டா²னேஸு ஸுப்பதிட்டி²தசித்தா, ஸத்த பொ³ஜ்ஜ²ங்கே³ யதா²பூ⁴தங் பா⁴வெத்வா, அனுத்தரங் ஸம்மாஸம்போ³தி⁴ங் அபி⁴ஸம்பு³ஜ்ஜி²ஸ்ஸந்தி. ப⁴க³வாபி, ப⁴ந்தே, ஏதரஹி அரஹங் ஸம்மாஸம்பு³த்³தோ⁴ பஞ்ச நீவரணே பஹாய, சேதஸோ உபக்கிலேஸே பஞ்ஞாய து³ப்³ப³லீகரணே, சதூஸு ஸதிபட்டா²னேஸு ஸுப்பதிட்டி²தசித்தோ, ஸத்த பொ³ஜ்ஜ²ங்கே³ யதா²பூ⁴தங் பா⁴வெத்வா, அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴’’’தி.
‘‘Na kho me 7, bhante, atītānāgatapaccuppannesu arahantesu sammāsambuddhesu cetopariyañāṇaṃ atthi, api ca me dhammanvayo vidito. Seyyathāpi, bhante, rañño paccantimaṃ nagaraṃ daḷhuddhāpaṃ 8 daḷhapākāratoraṇaṃ ekadvāraṃ. Tatrassa dovāriko paṇḍito byatto medhāvī aññātānaṃ nivāretā ñātānaṃ pavesetā. So tassa nagarassa samantā anupariyāyapathaṃ anukkamamāno na passeyya pākārasandhiṃ vā pākāravivaraṃ vā, antamaso biḷāranikkhamanamattampi. Tassa evamassa – ‘ye kho keci oḷārikā pāṇā imaṃ nagaraṃ pavisanti vā nikkhamanti vā, sabbe te imināva dvārena pavisanti vā nikkhamanti vā’ti. Evameva kho me, bhante, dhammanvayo vidito – ‘yepi te, bhante, ahesuṃ atītamaddhānaṃ arahanto sammāsambuddhā, sabbe te bhagavanto pañca nīvaraṇe pahāya, cetaso upakkilese paññāya dubbalīkaraṇe, catūsu satipaṭṭhānesu suppatiṭṭhitacittā, satta bojjhaṅge yathābhūtaṃ bhāvetvā, anuttaraṃ sammāsambodhiṃ abhisambujjhiṃsu. Yepi te, bhante, bhavissanti anāgatamaddhānaṃ arahanto sammāsambuddhā, sabbe te bhagavanto pañca nīvaraṇe pahāya, cetaso upakkilese paññāya dubbalīkaraṇe, catūsu satipaṭṭhānesu suppatiṭṭhitacittā, satta bojjhaṅge yathābhūtaṃ bhāvetvā, anuttaraṃ sammāsambodhiṃ abhisambujjhissanti. Bhagavāpi, bhante, etarahi arahaṃ sammāsambuddho pañca nīvaraṇe pahāya, cetaso upakkilese paññāya dubbalīkaraṇe, catūsu satipaṭṭhānesu suppatiṭṭhitacitto, satta bojjhaṅge yathābhūtaṃ bhāvetvā, anuttaraṃ sammāsambodhiṃ abhisambuddho’’’ti.
‘‘ஸாது⁴ ஸாது⁴, ஸாரிபுத்த! தஸ்மாதிஹ த்வங், ஸாரிபுத்த, இமங் த⁴ம்மபரியாயங் அபி⁴க்க²ணங் பா⁴ஸெய்யாஸி பி⁴க்கூ²னங் பி⁴க்கு²னீனங் உபாஸகானங் உபாஸிகானங். யேஸம்பி ஹி, ஸாரிபுத்த, மோக⁴புரிஸானங் ப⁴விஸ்ஸதி ததா²க³தே கங்கா² வா விமதி வா, தேஸம்பிமங் த⁴ம்மபரியாயங் ஸுத்வா யா ததா²க³தே கங்கா² வா விமதி வா ஸா பஹீயிஸ்ஸதீ’’தி. து³தியங்.
‘‘Sādhu sādhu, sāriputta! Tasmātiha tvaṃ, sāriputta, imaṃ dhammapariyāyaṃ abhikkhaṇaṃ bhāseyyāsi bhikkhūnaṃ bhikkhunīnaṃ upāsakānaṃ upāsikānaṃ. Yesampi hi, sāriputta, moghapurisānaṃ bhavissati tathāgate kaṅkhā vā vimati vā, tesampimaṃ dhammapariyāyaṃ sutvā yā tathāgate kaṅkhā vā vimati vā sā pahīyissatī’’ti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. நாலந்த³ஸுத்தவண்ணனா • 2. Nālandasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. நாலந்த³ஸுத்தவண்ணனா • 2. Nālandasuttavaṇṇanā
