| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. நாலந்த³வக்³கோ³
2. Nālandavaggo
2. நாலந்த³ஸுத்தவண்ணனா
2. Nālandasuttavaṇṇanā
378. து³தியவக்³க³ஸ்ஸ து³தியே நாலந்தா³யந்தி நாலந்தா³தி ஏவங்னாமகே நக³ரே, தங் நக³ரங் கோ³சரகா³மங் கத்வா. பாவாரிகம்ப³வனேதி து³ஸ்ஸபாவாரிகஸெட்டி²னோ அம்ப³வனே. தங் கிர தஸ்ஸ உய்யானங் அஹோஸி. ஸோ ப⁴க³வதோ த⁴ம்மதே³ஸனங் ஸுத்வா ப⁴க³வதி பஸன்னோ தஸ்மிங் உய்யானே குடிலேணமண்ட³பாதி³படிமண்டி³தங் ப⁴க³வதோ விஹாரங் கத்வா நிய்யாதேஸி. ஸோ விஹாரோ ஜீவகம்ப³வனங் விய பாவாரிகம்ப³வனந்த்வேவ ஸங்க²ங் க³தோ. தஸ்மிங் பாவாரிகம்ப³வனே விஹரதீதி அத்தோ².
378. Dutiyavaggassa dutiye nālandāyanti nālandāti evaṃnāmake nagare, taṃ nagaraṃ gocaragāmaṃ katvā. Pāvārikambavaneti dussapāvārikaseṭṭhino ambavane. Taṃ kira tassa uyyānaṃ ahosi. So bhagavato dhammadesanaṃ sutvā bhagavati pasanno tasmiṃ uyyāne kuṭileṇamaṇḍapādipaṭimaṇḍitaṃ bhagavato vihāraṃ katvā niyyātesi. So vihāro jīvakambavanaṃ viya pāvārikambavanantveva saṅkhaṃ gato. Tasmiṃ pāvārikambavane viharatīti attho.
ஏவங்பஸன்னோதி ஏவங் உப்பன்னஸத்³தோ⁴, ஏவங் ஸத்³த³ஹாமீதி அத்தோ². பி⁴ய்யோபி⁴ஞ்ஞதரோதி பி⁴ய்யதரோ அபி⁴ஞ்ஞாதோ பி⁴ய்யதராபி⁴ய்யோ வா, உத்தரிதரஞாணோதி அத்தோ². ஸம்போ³தி⁴யந்தி ஸப்³ப³ஞ்ஞுதஞ்ஞாணே அரஹத்தமக்³க³ஞாணே வா அரஹத்தமக்³கே³னேவ ஹி பு³த்³த⁴கு³ணா நிப்பதே³ஸா க³ஹிதா ஹொந்தி, த்³வேபி அக்³க³ஸாவகா அரஹத்தமக்³கே³னேவ ஸாவகபாரமீஞாணங் படிலப⁴ந்தி, பச்சேகபு³த்³தா⁴ பச்சேகபோ³தி⁴ஞாணங், பு³த்³தா⁴ ஸப்³ப³ஞ்ஞுதஞ்ஞாணஞ்சேவ ஸகலே ச பு³த்³த⁴கு³ணே. ஸப்³ப³ம்பி நேஸங் அரஹத்தமக்³கே³னேவ இஜ்ஜ²தி. தஸ்மா அரஹத்தமக்³க³ஞாணங் ஸம்போ³தி⁴ நாம ஹோதி. தேன உத்தரிதரோ ச ப⁴க³வதா நத்தி². தேனாஹ ‘‘ப⁴க³வதா பி⁴ய்யோபி⁴ஞ்ஞதரோ, யதி³த³ங் ஸம்போ³தி⁴ய’’ந்தி.
Evaṃpasannoti evaṃ uppannasaddho, evaṃ saddahāmīti attho. Bhiyyobhiññataroti bhiyyataro abhiññāto bhiyyatarābhiyyo vā, uttaritarañāṇoti attho. Sambodhiyanti sabbaññutaññāṇe arahattamaggañāṇe vā arahattamaggeneva hi buddhaguṇā nippadesā gahitā honti, dvepi aggasāvakā arahattamaggeneva sāvakapāramīñāṇaṃ paṭilabhanti, paccekabuddhā paccekabodhiñāṇaṃ, buddhā sabbaññutaññāṇañceva sakale ca buddhaguṇe. Sabbampi nesaṃ arahattamaggeneva ijjhati. Tasmā arahattamaggañāṇaṃ sambodhi nāma hoti. Tena uttaritaro ca bhagavatā natthi. Tenāha ‘‘bhagavatā bhiyyobhiññataro, yadidaṃ sambodhiya’’nti.
உளாராதி ஸெட்டா². அயஞ்ஹி உளாரஸத்³தோ³ ‘‘உளாரானி கா²த³னீயானி கா²த³ந்தீ’’திஆதீ³ஸு (ம॰ நி॰ 1.366) மது⁴ரே ஆக³ச்ச²தி. ‘‘உளாராய க²லு ப⁴வங் வச்சா²யனோ ஸமணங் கோ³தமங் பஸங்ஸாய பஸங்ஸதீ’’திஆதீ³ஸு (ம॰ நி॰ 1.288) ஸெட்டே². ‘‘அப்பமாணோ உளாரோ ஓபா⁴ஸோ’’திஆதீ³ஸு (தீ³॰ நி॰ 2.32; ம॰ நி॰ 3.201) விபுலே. ஸ்வாயமித⁴ ஸெட்டே² ஆக³தோ. தேன வுத்தங் ‘‘உளாராதி ஸெட்டா²’’தி. ஆஸபீ⁴தி உஸப⁴ஸ்ஸ வாசாஸதி³ஸீ அசலா அஸம்பவேதீ⁴. ஏகங்ஸோ க³ஹிதோதி அனுஸ்ஸவேன வா ஆசரியபரம்பராய வா இதிகிராய வா பிடகஸம்பதா³னேன வா ஆகாரபரிவிதக்கேன வா தி³ட்டி²னிஜ்ஜா²னக்க²ந்தியா வா தக்கஹேது வா நயஹேது வா அகதெ²த்வா பச்சக்க²தோ ஞாணேன படிவிஜ்ஜி²த்வா விய ஏகங்ஸோ க³ஹிதோ, ஸன்னிட்டா²னகதா²வ கதி²தாதி அத்தோ². ஸீஹனாதோ³தி ஸெட்ட²னாதோ³, வனே உன்னாத³யந்தேன ஸீஹேன விய உத்தமனாதோ³ நதி³தோதி அத்தோ².
Uḷārāti seṭṭhā. Ayañhi uḷārasaddo ‘‘uḷārāni khādanīyāni khādantī’’tiādīsu (ma. ni. 1.366) madhure āgacchati. ‘‘Uḷārāya khalu bhavaṃ vacchāyano samaṇaṃ gotamaṃ pasaṃsāya pasaṃsatī’’tiādīsu (ma. ni. 1.288) seṭṭhe. ‘‘Appamāṇo uḷāro obhāso’’tiādīsu (dī. ni. 2.32; ma. ni. 3.201) vipule. Svāyamidha seṭṭhe āgato. Tena vuttaṃ ‘‘uḷārāti seṭṭhā’’ti. Āsabhīti usabhassa vācāsadisī acalā asampavedhī. Ekaṃso gahitoti anussavena vā ācariyaparamparāya vā itikirāya vā piṭakasampadānena vā ākāraparivitakkena vā diṭṭhinijjhānakkhantiyā vā takkahetu vā nayahetu vā akathetvā paccakkhato ñāṇena paṭivijjhitvā viya ekaṃso gahito, sanniṭṭhānakathāva kathitāti attho. Sīhanādoti seṭṭhanādo, vane unnādayantena sīhena viya uttamanādo naditoti attho.
கிங் நு தே ஸாரிபுத்தாதி இமங் தே³ஸனங் கஸ்மா ஆரபி⁴? அனுயோக³தா³பனத்த²ங். ஏகச்சோ ஹி ஸீஹனாத³ங் நதி³த்வா அத்தனோ ஸீஹனாதே³ அனுயோக³ங் தா³துங் ந ஸக்கோதி, நிக⁴ங்ஸனங் ந க²மதி, ஸிலேஸே பதிதமக்கடோ விய ஹோதி. யதா² த⁴மமானங் அபரிஸுத்³த⁴ங் லோஹங் ஜா²யித்வா அங்கா³ரோ ஹோதி, ஏவங் ஜா²மங்கா³ரோ விய ஹோதி. ஏகோ ஸீஹனாதே³ அனுயோக³ங் தா³பியமானோ தா³துங் ஸக்கோதி, நிக⁴ங்ஸனங் க²மதி , த⁴மமானங் நித்³தோ³ஸஜாதரூபங் விய அதி⁴கதரங் ஸோப⁴தி, தாதி³ஸோ தே²ரோ. தேன நங் ப⁴க³வா ‘‘அனுயோக³க்க²மோ அய’’ந்தி ஞத்வா ஸீஹனாதே³ அனுயோக³தா³பனத்த²ங் இமங் தே³ஸனங் ஆரபி⁴.
Kiṃnu te sāriputtāti imaṃ desanaṃ kasmā ārabhi? Anuyogadāpanatthaṃ. Ekacco hi sīhanādaṃ naditvā attano sīhanāde anuyogaṃ dātuṃ na sakkoti, nighaṃsanaṃ na khamati, silese patitamakkaṭo viya hoti. Yathā dhamamānaṃ aparisuddhaṃ lohaṃ jhāyitvā aṅgāro hoti, evaṃ jhāmaṅgāro viya hoti. Eko sīhanāde anuyogaṃ dāpiyamāno dātuṃ sakkoti, nighaṃsanaṃ khamati , dhamamānaṃ niddosajātarūpaṃ viya adhikataraṃ sobhati, tādiso thero. Tena naṃ bhagavā ‘‘anuyogakkhamo aya’’nti ñatvā sīhanāde anuyogadāpanatthaṃ imaṃ desanaṃ ārabhi.
தத்த² ஸப்³பே³ தேதி ஸப்³பே³ தே தயா. ஏவங்ஸீலாதி மக்³க³ஸீலேன ப²லஸீலேன லோகியலோகுத்தரஸீலேன ஏவங்ஸீலா. ஏவங்த⁴ம்மாதி எத்த² ஸமாதி⁴பக்கா² த⁴ம்மா அதி⁴ப்பேதா, மக்³க³ஸமாதி⁴னா ப²லஸமாதி⁴னா லோகியலோகுத்தரேன ஸமாதி⁴னா ஏவங்ஸமாதீ⁴தி அத்தோ². ஏவங்பஞ்ஞாதி மக்³க³பஞ்ஞாதி³வஸேனேவ ஏவங்பஞ்ஞா. ஏவங்விஹாரினோதி எத்த² பன ஹெட்டா² ஸமாதி⁴பக்கா²னங் த⁴ம்மானங் க³ஹிதத்தா விஹாரோ க³ஹிதோபி புன கஸ்மா க³ஹிதமேவ க³ண்ஹதீதி சே. தே²ரேன இத³ங் க³ஹிதமேவ. இத³ஞ்ஹி நிரோத⁴ஸமாபத்திதீ³பனத்த²ங் வுத்தங். தஸ்மா ஏவங் நிரோத⁴ஸமாபத்திவிஹாரினோ தே ப⁴க³வந்தோ அஹேஸுந்தி ஏவமெத்த² அத்தோ² த³ட்ட²ப்³போ³.
Tattha sabbe teti sabbe te tayā. Evaṃsīlāti maggasīlena phalasīlena lokiyalokuttarasīlena evaṃsīlā. Evaṃdhammāti ettha samādhipakkhā dhammā adhippetā, maggasamādhinā phalasamādhinā lokiyalokuttarena samādhinā evaṃsamādhīti attho. Evaṃpaññāti maggapaññādivaseneva evaṃpaññā. Evaṃvihārinoti ettha pana heṭṭhā samādhipakkhānaṃ dhammānaṃ gahitattā vihāro gahitopi puna kasmā gahitameva gaṇhatīti ce. Therena idaṃ gahitameva. Idañhi nirodhasamāpattidīpanatthaṃ vuttaṃ. Tasmā evaṃ nirodhasamāpattivihārino te bhagavanto ahesunti evamettha attho daṭṭhabbo.
ஏவங்விமுத்தாதி எத்த² விக்க²ம்ப⁴னவிமுத்தி, தத³ங்க³விமுத்தி, ஸமுச்சே²த³விமுத்தி, படிபஸ்ஸத்³தி⁴விமுத்தி, நிஸ்ஸரணவிமுத்தீதி பஞ்சவிதா⁴ விமுத்தி. தத்த² அட்ட² ஸமாபத்தியோ ஸயங் விக்க²ம்பி⁴தேஹி நீவரணாதீ³ஹி விமுத்தத்தா விக்க²ம்ப⁴னவிமுத்தீதி ஸங்க²ங் க³ச்ச²ந்தி. அனிச்சானுபஸ்ஸனாதி³கா ஸத்த அனுபஸ்ஸனா ஸயங் தஸ்ஸ தஸ்ஸ பச்சனீகவஸேன பரிச்சத்தாஹி நிச்சஸஞ்ஞாதீ³ஹி விமுத்தத்தா தத³ங்க³விமுத்தீதி ஸங்க²ங் க³ச்ச²ந்தி. சத்தாரோ அரியமக்³கா³ ஸயங் ஸமுச்சி²ன்னேஹி கிலேஸேஹி விமுத்தத்தா ஸமுச்சே²த³விமுத்தீதி ஸங்க²ங் க³ச்ச²ந்தி. சத்தாரி ஸாமஞ்ஞப²லானி மக்³கா³னுபா⁴வேன கிலேஸானங் படிபஸ்ஸத்³த⁴ந்தே உப்பன்னத்தா படிபஸ்ஸத்³தி⁴விமுத்தீதி ஸங்க²ங் க³ச்ச²ந்தி. நிப்³பா³னங் ஸப்³ப³கிலேஸேஹி நிஸ்ஸடத்தா அபக³தத்தா தூ³ரே டி²தத்தா நிஸ்ஸரணவிமுத்தீதி ஸங்க²ங் க³தங். இதி இமாஸங் பஞ்சன்னங் விமுத்தீனங் வஸேன ஏவங் விமுத்தாதி எத்த² அத்தோ² த³ட்ட²ப்³போ³.
Evaṃvimuttāti ettha vikkhambhanavimutti, tadaṅgavimutti, samucchedavimutti, paṭipassaddhivimutti, nissaraṇavimuttīti pañcavidhā vimutti. Tattha aṭṭha samāpattiyo sayaṃ vikkhambhitehi nīvaraṇādīhi vimuttattā vikkhambhanavimuttīti saṅkhaṃ gacchanti. Aniccānupassanādikā satta anupassanā sayaṃ tassa tassa paccanīkavasena pariccattāhi niccasaññādīhi vimuttattā tadaṅgavimuttīti saṅkhaṃ gacchanti. Cattāro ariyamaggā sayaṃ samucchinnehi kilesehi vimuttattā samucchedavimuttīti saṅkhaṃ gacchanti. Cattāri sāmaññaphalāni maggānubhāvena kilesānaṃ paṭipassaddhante uppannattā paṭipassaddhivimuttīti saṅkhaṃ gacchanti. Nibbānaṃ sabbakilesehi nissaṭattā apagatattā dūre ṭhitattā nissaraṇavimuttīti saṅkhaṃ gataṃ. Iti imāsaṃ pañcannaṃ vimuttīnaṃ vasena evaṃ vimuttāti ettha attho daṭṭhabbo.
கிங் பன தே ஸாரிபுத்த யே தே ப⁴விஸ்ஸந்தீதி அதீதா தாவ நிருத்³தா⁴ அபண்ணத்திகபா⁴வங் க³தா தீ³பஸிகா² விய நிப்³பு³தா, ஏவங் நிருத்³தே⁴ அபண்ணத்திகபா⁴வங் க³தே த்வங் கத²ங் ஜானிஸ்ஸஸி, அனாக³தபு³த்³தா⁴னங் பன கு³ணா கிங் தயா அத்தனோ சித்தேன பரிச்சி²ந்தி³த்வா விதி³தாதி புச்ச²ந்தோ ஏவமாஹ.
Kiṃpana te sāriputta ye te bhavissantīti atītā tāva niruddhā apaṇṇattikabhāvaṃ gatā dīpasikhā viya nibbutā, evaṃ niruddhe apaṇṇattikabhāvaṃ gate tvaṃ kathaṃ jānissasi, anāgatabuddhānaṃ pana guṇā kiṃ tayā attano cittena paricchinditvā viditāti pucchanto evamāha.
கிங் பன த்யாஹங் ஸாரிபுத்த ஏதரஹீதி அனாக³தாபி பு³த்³தா⁴ அஜாதா அனிப்³ப³த்தா அனுப்பன்னா, தே கத²ங் ஜானிஸ்ஸஸி. தேஸஞ்ஹி ஜானநங் அபதே³ ஆகாஸே பத³த³ஸ்ஸனங் விய ஹோதி. இதா³னி மயா ஸத்³தி⁴ங் ஏகவிஹாரே வஸஸி, ஏகதோ பி⁴க்கா²ய சரஸி, த⁴ம்மதே³ஸனாகாலே த³க்கி²ணபஸ்ஸே நிஸீத³ஸி, கிங் பன மய்ஹங் கு³ணா அத்தனோ சேதஸா பரிச்சி²ந்தி³த்வா விதி³தா தயாதி அனுயுஞ்ஜந்தோ ஏவமாஹ. தே²ரோ பன புச்சி²தபுச்சி²தே ‘‘நோ ஹேதங் ப⁴ந்தே’’தி படிக்கி²பதி.
Kiṃ pana tyāhaṃ sāriputta etarahīti anāgatāpi buddhā ajātā anibbattā anuppannā, te kathaṃ jānissasi. Tesañhi jānanaṃ apade ākāse padadassanaṃ viya hoti. Idāni mayā saddhiṃ ekavihāre vasasi, ekato bhikkhāya carasi, dhammadesanākāle dakkhiṇapasse nisīdasi, kiṃ pana mayhaṃ guṇā attano cetasā paricchinditvā viditā tayāti anuyuñjanto evamāha. Thero pana pucchitapucchite ‘‘no hetaṃ bhante’’ti paṭikkhipati.
தே²ரஸ்ஸ ச விதி³தம்பி அத்தி², அவிதி³தம்பி. கிங் ஸோ அத்தனோ விதி³தட்டா²னே படிக்கே²பங் கரோதி, அவிதி³தட்டா²னேதி? விதி³தட்டா²னே ந கரோதி, அவிதி³தட்டா²னேயேவ கரோதி. தே²ரோ கிர அனுயோகே³ ஆரத்³தே⁴ ஏவங் அஞ்ஞாஸி ‘‘நாயங் அனுயோகோ³ ஸாவகபாரமீஞாணே, ஸப்³ப³ஞ்ஞுதஞ்ஞாணே பன அயங் அனுயோகோ³’’தி அத்தனோ ஸாவகபாரமீஞாணே படிக்கே²பங் அகத்வாவ அவிதி³தட்டா²னே ஸப்³ப³ஞ்ஞுதஞ்ஞாணே படிக்கே²பங் கரோதி. தேன இத³ம்பி தீ³பேதி – ப⁴க³வா மய்ஹங் அதீதானாக³தபச்சுப்பன்னானங் பு³த்³தா⁴னங் ஸீலஸமாதி⁴பஞ்ஞாவிமுத்திகாரணஜானநஸமத்த²ங் ஸப்³ப³ஞ்ஞுதஞ்ஞாணங் நத்தீ²தி.
Therassa ca viditampi atthi, aviditampi. Kiṃ so attano viditaṭṭhāne paṭikkhepaṃ karoti, aviditaṭṭhāneti? Viditaṭṭhāne na karoti, aviditaṭṭhāneyeva karoti. Thero kira anuyoge āraddhe evaṃ aññāsi ‘‘nāyaṃ anuyogo sāvakapāramīñāṇe, sabbaññutaññāṇe pana ayaṃ anuyogo’’ti attano sāvakapāramīñāṇe paṭikkhepaṃ akatvāva aviditaṭṭhāne sabbaññutaññāṇe paṭikkhepaṃ karoti. Tena idampi dīpeti – bhagavā mayhaṃ atītānāgatapaccuppannānaṃ buddhānaṃ sīlasamādhipaññāvimuttikāraṇajānanasamatthaṃ sabbaññutaññāṇaṃ natthīti.
எத்தா²தி ஏதேஸு அதீதாதி³பே⁴தே³ஸு பு³த்³தே⁴ஸு. அத² கிஞ்சரஹீதி அத² கஸ்மா ஏவங் ஞாணே அஸதி தயா ஏவங் கதி²தந்தி வத³தி. த⁴ம்மன்வயோதி த⁴ம்மஸ்ஸ பச்சக்க²தோ ஞாணஸ்ஸ அனுயோக³ங் அனுக³ந்த்வா உப்பன்னங் அனுமானஞாணங் நயக்³கா³ஹோ விதி³தோ, ஸாவகபாரமீஞாணே ட²த்வாவ இமினா ஆகாரேன ஜானாமி ப⁴க³வாதி வத³தி. தே²ரஸ்ஸ ஹி நயக்³கா³ஹோ அப்பமாணோ அபரியந்தோ. யதா² ச ஸப்³ப³ஞ்ஞுதஞ்ஞாணஸ்ஸ பமாணங் வா பரியந்தோ வா நத்தி², ஏவங் த⁴ம்மஸேனாபதினோ நயக்³கா³ஹஸ்ஸ. தேன ஸோ – ‘‘இமினா ஏவங்விதோ⁴ இமினா ஏவங்விதோ⁴, இமினா அனுத்தரோ இமினா அனுத்தரோ ஸத்தா²’’தி ஜானாதி. தே²ரஸ்ஸ ஹி நயக்³கா³ஹோ ஸப்³ப³ஞ்ஞுதஞ்ஞாணக³திகோ ஏவ.
Etthāti etesu atītādibhedesu buddhesu. Atha kiñcarahīti atha kasmā evaṃ ñāṇe asati tayā evaṃ kathitanti vadati. Dhammanvayoti dhammassa paccakkhato ñāṇassa anuyogaṃ anugantvā uppannaṃ anumānañāṇaṃ nayaggāho vidito, sāvakapāramīñāṇe ṭhatvāva iminā ākārena jānāmi bhagavāti vadati. Therassa hi nayaggāho appamāṇo apariyanto. Yathā ca sabbaññutaññāṇassa pamāṇaṃ vā pariyanto vā natthi, evaṃ dhammasenāpatino nayaggāhassa. Tena so – ‘‘iminā evaṃvidho iminā evaṃvidho, iminā anuttaro iminā anuttaro satthā’’ti jānāti. Therassa hi nayaggāho sabbaññutaññāṇagatiko eva.
இதா³னி தங் நயக்³கா³ஹங் பாகடங் காதுங் உபமங் த³ஸ்ஸெந்தோ ஸெய்யதா²பி ப⁴ந்தேதிஆதி³மாஹ. தத்த² யஸ்மா மஜ்ஜி²மதே³ஸே நக³ரஸ்ஸ உத்³தா⁴பபாகாராதீ³னி தி²ரானி வா ஹொந்து து³ப்³ப³லானி வா, ஸப்³ப³ஸோ வா பன மா ஹொந்து, சோரானங் ஆஸங்கா ந ஹோதி. தஸ்மா தங் அக்³க³ஹெத்வா பச்சந்திமங் நக³ரந்தி ஆஹ. த³ள்ஹுத்³தா⁴பந்தி தி²ரமூலபாகாரங். த³ள்ஹபாகாரதோரணந்தி தி²ரபாகாரஞ்சேவ தி²ரபிட்ட²ஸங்கா⁴டஞ்ச. ஏகத்³வாரந்தி கஸ்மா ஆஹ? ப³ஹுத்³வாரே ஹி நக³ரே ப³ஹூஹி பண்டி³ததோ³வாரிகேஹி ப⁴விதப்³ப³ங், ஏகத்³வாரேவ ஏகோ வட்டதி. தே²ரஸ்ஸ ச பஞ்ஞாய ஸதி³ஸோ அஞ்ஞோ நத்தி², தஸ்மா அத்தனோ பண்டி³தபா⁴வஸ்ஸ ஓபம்மத்த²ங் ஏகங்யேவ தோ³வாரிகங் த³ஸ்ஸேதுங் ‘‘ஏகத்³வார’’ந்தி ஆஹ.
Idāni taṃ nayaggāhaṃ pākaṭaṃ kātuṃ upamaṃ dassento seyyathāpi bhantetiādimāha. Tattha yasmā majjhimadese nagarassa uddhāpapākārādīni thirāni vā hontu dubbalāni vā, sabbaso vā pana mā hontu, corānaṃ āsaṅkā na hoti. Tasmā taṃ aggahetvā paccantimaṃ nagaranti āha. Daḷhuddhāpanti thiramūlapākāraṃ. Daḷhapākāratoraṇanti thirapākārañceva thirapiṭṭhasaṅghāṭañca. Ekadvāranti kasmā āha? Bahudvāre hi nagare bahūhi paṇḍitadovārikehi bhavitabbaṃ, ekadvāreva eko vaṭṭati. Therassa ca paññāya sadiso añño natthi, tasmā attano paṇḍitabhāvassa opammatthaṃ ekaṃyeva dovārikaṃ dassetuṃ ‘‘ekadvāra’’nti āha.
பண்டி³தோதி பண்டி³ச்சேன ஸமன்னாக³தோ. ப்³யத்தோதி வெய்யத்தியேன ஸமன்னாக³தோ விஸத³ஞாணோ. மேதா⁴வீதி டா²னுப்பத்திகபஞ்ஞாஸங்கா²தாய மேதா⁴ய ஸமன்னாக³தோ. அனுபரியாயபத²ந்தி அனுபரியாயனாமகங் பாகாரமக்³க³ங். பாகாரஸந்தி⁴ந்தி த்³வின்னங் இட்ட²கானங் அபக³தட்டா²னங். பாகாரவிவரந்தி பாகாரஸ்ஸ சி²ன்னட்டா²னங். சேதஸோ உபக்கிலேஸேதி பஞ்சனீவரணா சித்தங் உபக்கிலிஸ்ஸந்தி கிலிட்ட²ங் கரொந்தி உபதாபெந்தி விஹேடெ²ந்தி, தஸ்மா ‘‘சேதஸோ உபக்கிலேஸா’’தி வுச்சந்தி. பஞ்ஞாய து³ப்³ப³லீகரணேதி நீவரணா உப்பஜ்ஜமானா அனுப்பன்னாய பஞ்ஞாய உப்பஜ்ஜிதுங் ந தெ³ந்தி, தஸ்மா ‘‘பஞ்ஞாய து³ப்³ப³லீகரணா’’தி வுச்சந்தி. ஸுபதிட்டி²தசித்தாதி சதூஸு ஸதிபட்டா²னேஸு ஸுட்டு² ட²பிதசித்தா ஹுத்வா. ஸத்த பொ³ஜ்ஜ²ங்கே³ யதா²பூ⁴தந்தி ஸத்த பொ³ஜ்ஜ²ங்கே³ யதா²ஸபா⁴வேன பா⁴வெத்வா. அனுத்தரங் ஸம்மாஸம்போ³தி⁴ந்தி அரஹத்தங் ஸப்³ப³ஞ்ஞுதஞ்ஞாணங் படிவிஜ்ஜி²ங்ஸூதி த³ஸ்ஸேதி.
Paṇḍitoti paṇḍiccena samannāgato. Byattoti veyyattiyena samannāgato visadañāṇo. Medhāvīti ṭhānuppattikapaññāsaṅkhātāya medhāya samannāgato. Anupariyāyapathanti anupariyāyanāmakaṃ pākāramaggaṃ. Pākārasandhinti dvinnaṃ iṭṭhakānaṃ apagataṭṭhānaṃ. Pākāravivaranti pākārassa chinnaṭṭhānaṃ. Cetaso upakkileseti pañcanīvaraṇā cittaṃ upakkilissanti kiliṭṭhaṃ karonti upatāpenti viheṭhenti, tasmā ‘‘cetaso upakkilesā’’ti vuccanti. Paññāya dubbalīkaraṇeti nīvaraṇā uppajjamānā anuppannāya paññāya uppajjituṃ na denti, tasmā ‘‘paññāya dubbalīkaraṇā’’ti vuccanti. Supatiṭṭhitacittāti catūsu satipaṭṭhānesu suṭṭhu ṭhapitacittā hutvā. Satta bojjhaṅge yathābhūtanti satta bojjhaṅge yathāsabhāvena bhāvetvā. Anuttaraṃ sammāsambodhinti arahattaṃ sabbaññutaññāṇaṃ paṭivijjhiṃsūti dasseti.
அபிசெத்த² ஸதிபட்டா²னாதி விபஸ்ஸனா, பொ³ஜ்ஜ²ங்கா³ மக்³கோ³, அனுத்தரஸம்மாஸம்போ³தி⁴ அரஹத்தங். ஸதிபட்டா²னாதி வா விபஸ்ஸனா, பொ³ஜ்ஜ²ங்கா³மிஸ்ஸகா, ஸம்மாஸம்போ³தி⁴ அரஹத்தமேவ. தீ³க⁴பா⁴ணகமஹாஸீவத்தே²ரோ பனாஹ ‘‘ஸதிபட்டா²னே விபஸ்ஸனங் க³ஹெத்வா பொ³ஜ்ஜ²ங்கே³ மக்³கோ³ ச ஸப்³ப³ஞ்ஞுதஞ்ஞாணஞ்சாதி க³ஹிதே ஸுந்த³ரோ பஞ்ஹோ ப⁴வெய்ய, ந பனேவங் க³ஹித’’ந்தி. இதி தே²ரோ ஸப்³ப³பு³த்³தா⁴னங் நீவரணப்பஹானே ஸதிபட்டா²னபா⁴வனாய ஸம்போ³தி⁴யஞ்ச மஜ்ஜே² பி⁴ன்னஸுவண்ணரஜதானங் விய நானத்தாபா⁴வங் த³ஸ்ஸேதி.
Apicettha satipaṭṭhānāti vipassanā, bojjhaṅgā maggo, anuttarasammāsambodhi arahattaṃ. Satipaṭṭhānāti vā vipassanā, bojjhaṅgāmissakā, sammāsambodhi arahattameva. Dīghabhāṇakamahāsīvatthero panāha ‘‘satipaṭṭhāne vipassanaṃ gahetvā bojjhaṅge maggo ca sabbaññutaññāṇañcāti gahite sundaro pañho bhaveyya, na panevaṃ gahita’’nti. Iti thero sabbabuddhānaṃ nīvaraṇappahāne satipaṭṭhānabhāvanāya sambodhiyañca majjhe bhinnasuvaṇṇarajatānaṃ viya nānattābhāvaṃ dasseti.
இத⁴ ட²த்வா உபமா ஸங்ஸந்தே³தப்³பா³ – ஆயஸ்மா ஹி ஸாரிபுத்தோ பச்சந்தனக³ரங் த³ஸ்ஸேஸி, பாகாரங் த³ஸ்ஸேஸி, அனுபரியாயபத²ங் த³ஸ்ஸேஸி, த்³வாரங் த³ஸ்ஸேஸி, பண்டி³ததோ³வாரிகங் த³ஸ்ஸேஸி, நக³ரங் பவிஸனகனிக்க²மனகே ஓளாரிகே பாணே த³ஸ்ஸேஸி, தோ³வாரிகஸ்ஸ தேஸங் பாணானங் பாகடபா⁴வங் த³ஸ்ஸேஸி. தத்த² கிங் கேன ஸதி³ஸந்தி சே? நக³ரங் விய ஹி நிப்³பா³னங், பாகாரோ விய ஸீலங், அனுபரியாயபதோ² விய ஹிரீ, த்³வாரங் விய அரியமக்³கோ³, பண்டி³ததோ³வாரிகோ விய த⁴ம்மஸேனாபதி, நக³ரங் பவிஸனகனிக்க²மனகா ஓளாரிகபாணா விய அதீதானாக³தபச்சுப்பன்னா பு³த்³தா⁴, தோ³வாரிகஸ்ஸ தேஸங் பாணானங் பாகடபா⁴வோ விய ஆயஸ்மதோ ஸாரிபுத்தஸ்ஸ அதீதானாக³தபச்சுப்பன்னானங் பு³த்³தா⁴னங் ஸீலஸமதா²தீ³ஹி பாகடபா⁴வோ. எத்தாவதா தே²ரேன ப⁴க³வதோ – ‘‘ஏவமஹங் ஸாவகபாரமீஞாணே ட²த்வா த⁴ம்மன்வயேன நயக்³கா³ஹேன ஜானாமீ’’தி அத்தனோ ஸீஹனாத³ஸ்ஸ அனுயோகோ³ தி³ன்னோ ஹோதி.
Idha ṭhatvā upamā saṃsandetabbā – āyasmā hi sāriputto paccantanagaraṃ dassesi, pākāraṃ dassesi, anupariyāyapathaṃ dassesi, dvāraṃ dassesi, paṇḍitadovārikaṃ dassesi, nagaraṃ pavisanakanikkhamanake oḷārike pāṇe dassesi, dovārikassa tesaṃ pāṇānaṃ pākaṭabhāvaṃ dassesi. Tattha kiṃ kena sadisanti ce? Nagaraṃ viya hi nibbānaṃ, pākāro viya sīlaṃ, anupariyāyapatho viya hirī, dvāraṃ viya ariyamaggo, paṇḍitadovāriko viya dhammasenāpati, nagaraṃ pavisanakanikkhamanakā oḷārikapāṇā viya atītānāgatapaccuppannā buddhā, dovārikassa tesaṃ pāṇānaṃ pākaṭabhāvo viya āyasmato sāriputtassa atītānāgatapaccuppannānaṃ buddhānaṃ sīlasamathādīhi pākaṭabhāvo. Ettāvatā therena bhagavato – ‘‘evamahaṃ sāvakapāramīñāṇe ṭhatvā dhammanvayena nayaggāhena jānāmī’’ti attano sīhanādassa anuyogo dinno hoti.
தஸ்மாதி யஸ்மா ‘‘ந கோ² மேதங், ப⁴ந்தே, அதீதானாக³தபச்சுப்பன்னேஸு அரஹந்தேஸு ஸம்மாஸம்பு³த்³தே⁴ஸு சேதோபரியஞாணங் அத்தி², அபிச த⁴ம்மன்வயோ விதி³தோ’’தி வத³தி, தஸ்மா. அபி⁴க்க²ணங் பா⁴ஸெய்யாஸீதி புனப்புனங் பா⁴ஸெய்யாஸி, ‘‘புப்³ப³ண்ஹே மே கதி²த’’ந்தி மா மஜ்ஜ²ன்ஹிகாதீ³ஸு ந கத²யித்த², ‘‘அஜ்ஜ வா மே கதி²த’’ந்தி மா பரதி³வஸாதீ³ஸு ந கத²யித்தா²தி அத்தோ². ஸா பஹீயிஸ்ஸதீதி ‘‘ஸாரிபுத்தஸதி³ஸோபி நாம ஞாணஜவனஸம்பன்னோ ஸாவகோ பு³த்³தா⁴னங் சித்தாசாரங் ஜானிதுங் ந ஸக்கோதி, ஏவங் அப்பமெய்யா ததா²க³தா’’தி சிந்தெந்தானங் யா ததா²க³தே கங்கா² வா விமதி வா, ஸா பஹீயிஸ்ஸதீதி.
Tasmāti yasmā ‘‘na kho metaṃ, bhante, atītānāgatapaccuppannesu arahantesu sammāsambuddhesu cetopariyañāṇaṃ atthi, apica dhammanvayo vidito’’ti vadati, tasmā. Abhikkhaṇaṃ bhāseyyāsīti punappunaṃ bhāseyyāsi, ‘‘pubbaṇhe me kathita’’nti mā majjhanhikādīsu na kathayittha, ‘‘ajja vā me kathita’’nti mā paradivasādīsu na kathayitthāti attho. Sā pahīyissatīti ‘‘sāriputtasadisopi nāma ñāṇajavanasampanno sāvako buddhānaṃ cittācāraṃ jānituṃ na sakkoti, evaṃ appameyyā tathāgatā’’ti cintentānaṃ yā tathāgate kaṅkhā vā vimati vā, sā pahīyissatīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. நாலந்த³ஸுத்தங் • 2. Nālandasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. நாலந்த³ஸுத்தவண்ணனா • 2. Nālandasuttavaṇṇanā
