| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
2. нааланд̣̇аваг̇г̇о
2. Nālandavaggo
2. нааланд̣̇асуд̇д̇аван̣н̣анаа
2. Nālandasuttavaṇṇanā
378. д̣̇уд̇ияаваг̇г̇з батамасуд̇д̇ам̣ хздтаа вуд̇д̇анаяад̇д̇аа сувин̃н̃зяяанд̇и д̇ам̣ лан̇гхид̇ваа ‘‘д̣̇уд̇ияз’’д̇и вуд̇д̇ам̣.
378. Dutiyavagge paṭhamasuttaṃ heṭṭhā vuttanayattā suviññeyyanti taṃ laṅghitvā ‘‘dutiye’’ti vuttaṃ.
бхияяад̇аро абхин̃н̃аад̇од̇и самб̣од̇хияаа сздтад̇арод̇и абхилагкид̇о. бхияяад̇араабхин̃н̃од̇и саб̣б̣асад̇д̇зсу ад̇хигад̇арабан̃н̃о. д̇знааха ‘‘уд̇д̇арид̇аран̃аан̣о’’д̇и. саммаа анавасзсад̇о б̣уж̇жхад̇и зд̇знаад̇и самб̣од̇хийд̇и ааха – ‘‘самб̣од̇хияанд̇и саб̣б̣ан̃н̃уд̇ан̃н̃аан̣з’’д̇и. ниббад̣̇зсаа г̇ахид̇аад̇и анавасзсаа б̣уд̣̇д̇хаг̇ун̣аа г̇ахид̇аа аг̇г̇амаг̇г̇асид̣̇д̇хияаава бхаг̇авад̇о саб̣б̣аг̇ун̣аанам̣ сид̣̇д̇хад̇д̇аа. на гзвалан̃жа б̣уд̣̇д̇хаанам̣, ат̇а ко аг̇г̇асаавагабажжзгаб̣уд̣̇д̇хаанамби д̇ам̣д̇ам̣г̇ун̣асамиж̇жханам̣ аг̇г̇амаг̇г̇аад̇хиг̇амзнзваад̇и д̣̇ассзнд̇о ‘‘д̣̇взби аг̇г̇асаавагаа’’д̇иаад̣̇имааха.
Bhiyyataro abhiññātoti sambodhiyā seṭṭhataroti abhilakkhito. Bhiyyatarābhiññoti sabbasattesu adhikatarapañño. Tenāha ‘‘uttaritarañāṇo’’ti. Sammā anavasesato bujjhati etenāti sambodhīti āha – ‘‘sambodhiyanti sabbaññutaññāṇe’’ti. Nippadesā gahitāti anavasesā buddhaguṇā gahitā aggamaggasiddhiyāva bhagavato sabbaguṇānaṃ siddhattā. Na kevalañca buddhānaṃ, atha kho aggasāvakapaccekabuddhānampi taṃtaṃguṇasamijjhanaṃ aggamaggādhigamenevāti dassento ‘‘dvepi aggasāvakā’’tiādimāha.
абаро наяо – басаннод̇и иминаа басаад̣̇асса вад̇д̇амаанад̇аа д̣̇ийбид̇аад̇и уббаннасад̣̇д̇ход̇и иминааби сад̣̇д̇хааяа бажжуббаннад̇аа багаасид̇аад̇и ааха – ‘‘звам̣ сад̣̇д̣̇ахаамийд̇и ад̇т̇о’’д̇и. абхиж̇аанаад̇и абхимукабхаавзна саб̣б̣ан̃н̃зяяам̣ ж̇аанаад̇ийд̇и абхин̃н̃о, бхияяо ад̇хиго абхин̃н̃од̇и бхияяобхин̃н̃о. со зва ад̇исаяаважанижчаавасзна бхияяобхин̃н̃ад̇арод̇и вуд̇д̇од̇и ааха – ‘‘бхияяад̇аро абхин̃н̃аад̇о’’д̇и. д̣̇уд̇ияавигаббз бана абхиж̇аанаад̇ийд̇и абхин̃н̃аа, абхивисидтаа бан̃н̃аа. бхияяо абхин̃н̃аа зд̇ассаад̇и бхияяобхин̃н̃о, со зва ад̇исаяаважанижчаавасзна бхияяобхин̃н̃ад̇аро. свааяам̣ асса ад̇исаяо абхин̃н̃ааяа бхияяобхаавагад̇од̇и ааха – ‘‘бхияяад̇араабхин̃н̃о ваа’’д̇и. самб̣уж̇жхад̇и зд̇ааяаад̇и самб̣од̇хи, саб̣б̣ан̃н̃уд̇ан̃н̃аан̣ам̣ аг̇г̇амаг̇г̇ан̃аан̣ан̃жа. саб̣б̣ан̃н̃уд̇ан̃н̃аан̣абад̣̇адтаанан̃хи аг̇г̇амаг̇г̇ан̃аан̣ам̣, аг̇г̇амаг̇г̇ан̃аан̣абад̣̇адтаанан̃жа саб̣б̣ан̃н̃уд̇ан̃н̃аан̣ам̣ самб̣од̇хи наама. д̇ад̇т̇а бад̇хаанавасзна д̇ад̣̇ад̇т̇ад̣̇ассанз батамавигаббо, бад̣̇адтаанавасзна д̣̇уд̇ияавигаббо. гасмаа банзд̇т̇а арахад̇д̇амаг̇г̇ан̃аан̣ассзва г̇ахан̣ам̣, нану хздтимааниби бхаг̇авад̇о маг̇г̇ан̃аан̣аани саваасанамзва яат̇аасагам̣ бадибагкавид̇хаманавасзна бавад̇д̇аани. саваасанаббахаанан̃хи н̃зяяааваран̣аббахаананд̇и? сажжамзд̇ам̣, д̇ам̣ бана абарибун̣н̣ам̣ бадибагкавид̇хаманасса виббагад̇абхаавад̇од̇и ааха ‘‘арахад̇д̇амаг̇г̇ан̃аан̣з ваа’’д̇и. саб̣б̣анд̇и саммаасамб̣уд̣̇д̇хзна ад̇хиг̇анд̇аб̣б̣ам̣ саб̣б̣ам̣.
Aparo nayo – pasannoti iminā pasādassa vattamānatā dīpitāti uppannasaddhoti imināpi saddhāya paccuppannatā pakāsitāti āha – ‘‘evaṃ saddahāmīti attho’’ti. Abhijānāti abhimukhabhāvena sabbaññeyyaṃ jānātīti abhiñño, bhiyyo adhiko abhiññoti bhiyyobhiñño. So eva atisayavacanicchāvasena bhiyyobhiññataroti vuttoti āha – ‘‘bhiyyataro abhiññāto’’ti. Dutiyavikappe pana abhijānātīti abhiññā, abhivisiṭṭhā paññā. Bhiyyo abhiññā etassāti bhiyyobhiñño, so eva atisayavacanicchāvasena bhiyyobhiññataro. Svāyaṃ assa atisayo abhiññāya bhiyyobhāvakatoti āha – ‘‘bhiyyatarābhiñño vā’’ti. Sambujjhati etāyāti sambodhi, sabbaññutaññāṇaṃ aggamaggañāṇañca. Sabbaññutaññāṇapadaṭṭhānañhi aggamaggañāṇaṃ, aggamaggañāṇapadaṭṭhānañca sabbaññutaññāṇaṃ sambodhi nāma. Tattha padhānavasena tadatthadassane paṭhamavikappo, padaṭṭhānavasena dutiyavikappo. Kasmā panettha arahattamaggañāṇasseva gahaṇaṃ, nanu heṭṭhimānipi bhagavato maggañāṇāni savāsanameva yathāsakaṃ paṭipakkhavidhamanavasena pavattāni. Savāsanappahānañhi ñeyyāvaraṇappahānanti? Saccametaṃ, taṃ pana aparipuṇṇaṃ paṭipakkhavidhamanassa vippakatabhāvatoti āha ‘‘arahattamaggañāṇe vā’’ti. Sabbanti sammāsambuddhena adhigantabbaṃ sabbaṃ.
каад̣̇анийяаанам̣ ул̣аарад̇аа саад̇арасаанубхаавзнаад̇и ааха ‘‘мад̇хурз ааг̇ажчад̇ий’’д̇и. басам̣сааяа ул̣аарад̇аа висидтабхаавзнаад̇и ааха – ‘‘сздтз’’д̇и. обхаасасса ул̣аарад̇аа маханд̇абхаавзнаад̇и вуд̇д̇ам̣ – ‘‘вибулз’’д̇и. усабхасса аяанд̇и аасабхий, ид̇ха бана аасабхий вияаад̇и аасабхий. д̇знааха – ‘‘усабхасса ваажаасад̣̇исий’’д̇и. язна г̇ун̣зна саа д̇ам̣сад̣̇исаа, д̇ам̣ д̣̇ассзд̇ум̣ ‘‘ажалаа асамбавзд̇хий’’д̇и вуд̇д̇ам̣. яад̇о гуд̇ожи ануссаванам̣ ануссаво. виж̇ж̇аадтаанаад̣̇ийсу гад̇абарижаяаанам̣ аажарияаанам̣ д̇ам̣ д̇ам̣ ад̇т̇ам̣ н̃аабзнд̇ий бавзн̣ий аажарияабарамбараа. гзвалам̣ ад̇д̇ано мад̇ияаа ‘‘ид̇и гира звам̣ гираа’’д̇и баригаббанаа ид̇игираа. бидагасса г̇ант̇асса самбад̣̇аанад̇о бхууд̇ад̇о д̇асса г̇ахан̣ам̣ бидагасамбад̣̇аанам̣. яат̇аасуд̇аанам̣ ад̇д̇аанам̣ аагаарасса баривид̇агганам̣ аагаарабаривид̇агго. д̇ат̇звасса ‘‘звамзд̇а’’нд̇и д̣̇идтияаа ниж̇жхаанагкаманам̣ д̣̇идтиниж̇жхаанагканд̇и. ааг̇амаад̇хиг̇амзхи винаа гзвалам̣ ануссуд̇ад̇о д̇аггамаг̇г̇ам̣ ниссааяа д̇агганам̣ д̇агго. анумаанавид̇хим̣ ниссааяа г̇ахан̣ам̣ наяаг̇г̇аахо. яасмаа б̣уд̣̇д̇хависаяз тад̇ваа бхаг̇авад̇о аяам̣ т̇зрасса жод̣̇анаа т̇зрасса жа со ависаяо, д̇асмаа ‘‘бажжагкад̇о н̃аан̣зна бадивиж̇жхид̇ваа вияаа’’д̇и вуд̇д̇ам̣. сийханаад̣̇о вияаад̇и сийханаад̣̇о. д̇ам̣сад̣̇исад̇аа жасса сздтабхаавзна, со жзд̇т̇а звам̣ взд̣̇ид̇аб̣б̣од̇и д̣̇ассзнд̇о ‘‘сийханаад̣̇о’’д̇иаад̣̇имааха. уннаад̣̇аяанд̇знаад̇и асанисад̣̇исам̣ гаронд̇зна.
Khādanīyānaṃ uḷāratā sātarasānubhāvenāti āha ‘‘madhure āgacchatī’’ti. Pasaṃsāya uḷāratā visiṭṭhabhāvenāti āha – ‘‘seṭṭhe’’ti. Obhāsassa uḷāratā mahantabhāvenāti vuttaṃ – ‘‘vipule’’ti. Usabhassa ayanti āsabhī, idha pana āsabhī viyāti āsabhī. Tenāha – ‘‘usabhassa vācāsadisī’’ti. Yena guṇena sā taṃsadisā, taṃ dassetuṃ ‘‘acalā asampavedhī’’ti vuttaṃ. Yato kutoci anussavanaṃ anussavo. Vijjāṭṭhānādīsu kataparicayānaṃ ācariyānaṃ taṃ taṃ atthaṃ ñāpentī paveṇī ācariyaparamparā. Kevalaṃ attano matiyā ‘‘iti kira evaṃ kirā’’ti parikappanā itikirā. Piṭakassa ganthassa sampadānato bhūtato tassa gahaṇaṃ piṭakasampadānaṃ. Yathāsutānaṃ attānaṃ ākārassa parivitakkanaṃ ākāraparivitakko. Tathevassa ‘‘evameta’’nti diṭṭhiyā nijjhānakkhamanaṃ diṭṭhinijjhānakkhanti. Āgamādhigamehi vinā kevalaṃ anussutato takkamaggaṃ nissāya takkanaṃ takko. Anumānavidhiṃ nissāya gahaṇaṃ nayaggāho. Yasmā buddhavisaye ṭhatvā bhagavato ayaṃ therassa codanā therassa ca so avisayo, tasmā ‘‘paccakkhato ñāṇena paṭivijjhitvā viyā’’ti vuttaṃ. Sīhanādo viyāti sīhanādo. Taṃsadisatā cassa seṭṭhabhāvena, so cettha evaṃ veditabboti dassento ‘‘sīhanādo’’tiādimāha. Unnādayantenāti asanisadisaṃ karontena.
ануяог̇ад̣̇аабанад̇т̇анд̇и ануяог̇ам̣ сод̇хаабзд̇ум̣. вимад̣̇д̣̇агкаман̃хи сийханаад̣̇ам̣ над̣̇анд̇о ад̇т̇ад̇о ануяог̇ам̣ сод̇хзд̇и наама, ануяуж̇жханд̇о жа нам̣ сод̇хаабзд̇и наама. д̣̇аад̇унд̇и сод̇хзд̇ум̣. гзжи ‘‘д̣̇аанад̇т̇а’’нд̇и ад̇т̇ам̣ вад̣̇анд̇и, д̇ам̣ на яуд̇д̇ам̣. на хи яо сийхад̣̇аанам̣ над̣̇ад̇и, со зва д̇ад̇т̇а ануяог̇ам̣ д̣̇зд̇ийд̇и яуж̇ж̇ад̇и. нигхам̣сананд̇и вимад̣̇д̣̇анам̣. д̇хамамаананд̇и д̇аабаяамаанам̣. д̇аабанан̃жзд̇т̇а г̇аг̇г̇арияаа д̇хаммаабанасийсзна вад̣̇ад̇и.
Anuyogadāpanatthanti anuyogaṃ sodhāpetuṃ. Vimaddakkhamañhi sīhanādaṃ nadanto atthato anuyogaṃ sodheti nāma, anuyujjhanto ca naṃ sodhāpeti nāma. Dātunti sodhetuṃ. Keci ‘‘dānattha’’nti atthaṃ vadanti, taṃ na yuttaṃ. Na hi yo sīhadānaṃ nadati, so eva tattha anuyogaṃ detīti yujjati. Nighaṃsananti vimaddanaṃ. Dhamamānanti tāpayamānaṃ. Tāpanañcettha gaggariyā dhammāpanasīsena vadati.
саб̣б̣з д̇зд̇и саб̣б̣з д̇з ад̇ийд̇з нируд̣̇д̇хз саммаасамб̣уд̣̇д̇хз. д̇знзд̇ам̣ д̣̇ассзд̇и – яз д̇з ахзсум̣ ад̇ийд̇амад̣̇д̇хаанам̣ д̇ава абхинийхаарад̇о орам̣ саммаасамб̣уд̣̇д̇хаа, д̇зсам̣ д̇аава сааваган̃аан̣аг̇ожарз д̇хаммз барижчинд̣̇анд̇о маараад̣̇аяо вияа жа б̣уд̣̇д̇хаанам̣ логияажид̇д̇аажаарам̣ д̇вам̣ ж̇аанзяяааси. яз бана д̇з аб̣бхад̇ийд̇аа, д̇ад̇о барад̇о чиннавадумаа чиннабабан̃жаа барияаад̣̇иннаваддаа саб̣б̣ад̣̇угкавийд̇ивад̇д̇аа саммаасамб̣уд̣̇д̇хаа, д̇зсам̣ саб̣б̣зсамби д̇ава сааваган̃аан̣асса ависаяабхууд̇з д̇хаммз гат̇ам̣ ж̇ааниссасийд̇и. д̇знаад̇и самб̣од̇хисан̇каад̇зна саб̣б̣ан̃н̃уд̇ан̃н̃аан̣абад̣̇адтаанзна арахад̇д̇амаг̇г̇ан̃аан̣зна. звам̣сийлаад̇и д̇аад̣̇исасийлаа. самаад̇хибагкаад̇и самаад̇хи жа самаад̇хибагкаа жа самаад̇хибагкаа згад̣̇зсасаруубзгасзсанаязна. д̇ад̇т̇а самаад̇хибагкаад̇и вийрияасад̇ияо д̇ад̣̇ануг̇ун̣аа жа д̇хаммаа взд̣̇ид̇аб̣б̣аа . жхаанасамаабад̇д̇ийсу язбхуяязна вихааравохааро, жхаанасамаабад̇д̇ияо самаад̇хиббад̇хаанаад̇и вуд̇д̇ам̣ ‘‘самаад̇хибагкаанам̣ д̇хаммаанам̣ г̇ахид̇ад̇д̇аа вихааро г̇ахид̇о’’д̇и.
Sabbe teti sabbe te atīte niruddhe sammāsambuddhe. Tenetaṃ dasseti – ye te ahesuṃ atītamaddhānaṃ tava abhinīhārato oraṃ sammāsambuddhā, tesaṃ tāva sāvakañāṇagocare dhamme paricchindanto mārādayo viya ca buddhānaṃ lokiyacittācāraṃ tvaṃ jāneyyāsi. Ye pana te abbhatītā, tato parato chinnavaṭumā chinnapapañcā pariyādinnavaṭṭā sabbadukkhavītivattā sammāsambuddhā, tesaṃ sabbesampi tava sāvakañāṇassa avisayabhūte dhamme kathaṃ jānissasīti. Tenāti sambodhisaṅkhātena sabbaññutaññāṇapadaṭṭhānena arahattamaggañāṇena. Evaṃsīlāti tādisasīlā. Samādhipakkhāti samādhi ca samādhipakkhā ca samādhipakkhā ekadesasarūpekasesanayena. Tattha samādhipakkhāti vīriyasatiyo tadanuguṇā ca dhammā veditabbā . Jhānasamāpattīsu yebhuyyena vihāravohāro, jhānasamāpattiyo samādhippadhānāti vuttaṃ ‘‘samādhipakkhānaṃ dhammānaṃ gahitattā vihāro gahito’’ti.
яат̇аа бана хздтаа г̇ахид̇ааби самаад̇хибан̃н̃аа бадибагкад̇о вимуд̇д̇ад̇д̇аа вимужжана-сан̇каад̇а-гижжависзса-д̣̇ассанавасзна вимуд̇д̇ибарияааязна буна г̇ахид̇аа ‘‘звам̣вимуд̇д̇аа’’д̇и, звам̣ д̣̇иб̣б̣авихааро д̣̇иб̣б̣авихаарависзсад̣̇ассанавасзна буна г̇ахид̇о ‘‘звам̣вихаарий’’д̇и, д̇асмаа саб̣б̣зсам̣ самаабад̇д̇ивихаараанам̣ васзнзд̇т̇а ад̇т̇о яуж̇ж̇ад̇ийд̇и д̣̇адтаб̣б̣ам̣. вимуд̇д̇ийд̇и сан̇кам̣ г̇ажчанд̇и вимужжид̇т̇аад̇и гад̇ваа. зса наяо сзсзсуби. бадиббассад̣̇д̇ханд̇зд̇и бадиббассамбханосаабанзна. саб̣б̣агилзсзхи ниссадад̇д̇аа асам̣садтад̇д̇аа вимуд̇д̇ад̇д̇аа жа ниссаран̣авимуд̇д̇и ниб̣б̣аанам̣.
Yathā pana heṭṭhā gahitāpi samādhipaññā paṭipakkhato vimuttattā vimuccana-saṅkhāta-kiccavisesa-dassanavasena vimuttipariyāyena puna gahitā ‘‘evaṃvimuttā’’ti, evaṃ dibbavihāro dibbavihāravisesadassanavasena puna gahito ‘‘evaṃvihārī’’ti, tasmā sabbesaṃ samāpattivihārānaṃ vasenettha attho yujjatīti daṭṭhabbaṃ. Vimuttīti saṅkhaṃ gacchanti vimuccitthāti katvā. Esa nayo sesesupi. Paṭippassaddhanteti paṭippassambhanosāpanena. Sabbakilesehi nissaṭattā asaṃsaṭṭhattā vimuttattā ca nissaraṇavimutti nibbānaṃ.
анааг̇ад̇аб̣уд̣̇д̇хаанам̣ банаад̇и бана-сад̣̇д̣̇о висзсад̇т̇аж̇од̇ано. д̇зна ад̇ийд̇зсу д̇аава канд̇хаанам̣ бхууд̇абуб̣б̣ад̇д̇аа д̇ад̇т̇а сияаа н̃аан̣асса сависаяз г̇ад̇и, анааг̇ад̇зсу бана саб̣б̣асо асан̃ж̇аад̇зсу гат̇анд̇и имамад̇т̇ам̣ ж̇од̇зд̇и. д̇знааха ‘‘анааг̇ад̇аабий’’д̇иаад̣̇и. ‘‘ад̇д̇ано жзд̇асаа барижчинд̣̇ид̇ваа вид̣̇ид̇аа’’д̇и гасмаа вуд̇д̇ам̣? нану ад̇ийд̇аанааг̇ад̇з сад̇д̇аахз зва бавад̇д̇ам̣ жид̇д̇ам̣ жзд̇обарияан̃аан̣асса висаяо, на д̇ад̇о баранд̇и? наяид̣̇ам̣ жзд̇обарияан̃аан̣агижжавасзна вуд̇д̇ам̣, ат̇а ко буб̣б̣зниваасаанааг̇ад̇ам̣сан̃аан̣аанам̣ васзна вуд̇д̇ам̣, д̇асмаа нааяам̣ д̣̇осо. вид̣̇ид̇адтаанз на гарод̇и сигкаабад̣̇знзва д̇аад̣̇исасса бадигкзбасса бадигкид̇д̇ад̇д̇аа сзд̇угхаад̇ад̇о жа. гат̇ам̣ бана т̇зро д̣̇ваяасамбхавз бадигкзбамзва агааси, на вибхаж̇ж̇а б̣яаагаасийд̇и ааха ‘‘т̇зро гираа’’д̇иаад̣̇и. баарам̣ барияанд̇ам̣ минод̇ийд̇и баарамий, саа зва н̃аан̣анд̇и баарамин̃аан̣ам̣, саавагаанам̣ баарамин̃аан̣ам̣ саавагабаарамин̃аан̣ам̣. д̇асмим̣ саавагаанам̣ уггам̣сабарияанд̇аг̇ад̇з ж̇аананз нааяамануяог̇о, ат̇а ко саб̣б̣ан̃н̃уд̇ан̃н̃аан̣з саб̣б̣ан̃н̃уд̇ааяа ж̇аананз. гзжи бана ‘‘саавагабаарамин̃аан̣зд̇и саавагабаарамин̃аан̣ависаяз’’д̇и ад̇т̇ам̣ вад̣̇анд̇и, д̇ат̇аа сзсабад̣̇зсуби. сийла…бз… самад̇т̇анд̇и сийласамаад̇хибан̃н̃аавимуд̇д̇ин̃аан̣асан̇каад̇аанам̣ гааран̣аанам̣ ж̇аананасамад̇т̇ам̣. б̣уд̣̇д̇хасийлаад̣̇аяо хи б̣уд̣̇д̇хаанам̣ б̣уд̣̇д̇хагижжасса барзхи зд̇з б̣уд̣̇д̇хаад̇и ж̇аананасса жа гааран̣ам̣.
Anāgatabuddhānaṃ panāti pana-saddo visesatthajotano. Tena atītesu tāva khandhānaṃ bhūtapubbattā tattha siyā ñāṇassa savisaye gati, anāgatesu pana sabbaso asañjātesu kathanti imamatthaṃ joteti. Tenāha ‘‘anāgatāpī’’tiādi. ‘‘Attano cetasā paricchinditvā viditā’’ti kasmā vuttaṃ? Nanu atītānāgate sattāhe eva pavattaṃ cittaṃ cetopariyañāṇassa visayo, na tato paranti? Nayidaṃ cetopariyañāṇakiccavasena vuttaṃ, atha kho pubbenivāsaanāgataṃsañāṇānaṃ vasena vuttaṃ, tasmā nāyaṃ doso. Viditaṭṭhāne na karoti sikkhāpadeneva tādisassa paṭikkhepassa paṭikkhittattā setughātato ca. Kathaṃ pana thero dvayasambhave paṭikkhepameva akāsi, na vibhajja byākāsīti āha ‘‘thero kirā’’tiādi. Pāraṃ pariyantaṃ minotīti pāramī, sā eva ñāṇanti pāramiñāṇaṃ, sāvakānaṃ pāramiñāṇaṃ sāvakapāramiñāṇaṃ. Tasmiṃ sāvakānaṃ ukkaṃsapariyantagate jānane nāyamanuyogo, atha kho sabbaññutaññāṇe sabbaññutāya jānane. Keci pana ‘‘sāvakapāramiñāṇeti sāvakapāramiñāṇavisaye’’ti atthaṃ vadanti, tathā sesapadesupi. Sīla…pe… samatthanti sīlasamādhipaññāvimuttiñāṇasaṅkhātānaṃ kāraṇānaṃ jānanasamatthaṃ. Buddhasīlādayo hi buddhānaṃ buddhakiccassa parehi ete buddhāti jānanassa ca kāraṇaṃ.
анумаанан̃аан̣ам̣ вияа сам̣саяадтид̇ам̣ ахуд̇ваа ид̣̇амид̣̇анд̇и яат̇аасабхаавад̇о н̃зяяам̣ д̇хаарзд̇и нижчинод̇ийд̇и д̇хаммо, бажжагкан̃аан̣анд̇и ааха ‘‘д̇хаммасса бажжагкад̇о н̃аан̣ассаа’’д̇и. анузд̇ийд̇и анваяод̇и ааха ‘‘ануяог̇ам̣ ануг̇анд̇ваа’’д̇и. бажжагкасид̣̇д̇хан̃хи ад̇т̇ам̣ ануг̇анд̇ваа анумаанан̃аан̣асса бавад̇д̇и ‘‘д̣̇идтзна ад̣̇идтасса анумаана’’нд̇и взд̣̇ид̇аб̣б̣аа. вид̣̇ид̇з взд̣̇агамби н̃аан̣ам̣ ад̇т̇ад̇о вид̣̇ид̇амзва ход̇ийд̇и ‘‘анумаанан̃аан̣ам̣ наяаг̇г̇аахо вид̣̇ид̇о’’д̇и вуд̇д̇ам̣. вид̣̇ид̇од̇и вид̣̇д̇хо бадилад̣̇д̇хо, ад̇хиг̇ад̇од̇и ад̇т̇о. аббамаан̣од̇и абаримаан̣о махаависаяад̇д̇аа. д̇знааха ‘‘абарияанд̇о’’д̇и. д̇знаад̇и абарияанд̇ад̇д̇аа. д̇зна ваа абарияанд̇зна н̃аан̣зна. зд̇зна т̇зро яам̣ яам̣ анумзяяамад̇т̇ам̣ н̃аад̇угаамо ход̇и, д̇ад̇т̇а д̇ад̇т̇а д̇асса асан̇г̇амаббадихад̇ам̣ анумаанан̃аан̣ам̣ бавад̇д̇зд̇ийд̇и д̣̇ассзд̇и. д̇знааха ‘‘со иминаа’’д̇иаад̣̇и. д̇ад̇т̇а иминаад̇и иминаа гааран̣зна.
Anumānañāṇaṃ viya saṃsayaṭṭhitaṃ ahutvā idamidanti yathāsabhāvato ñeyyaṃ dhāreti nicchinotīti dhammo, paccakkhañāṇanti āha ‘‘dhammassa paccakkhato ñāṇassā’’ti. Anuetīti anvayoti āha ‘‘anuyogaṃ anugantvā’’ti. Paccakkhasiddhañhi atthaṃ anugantvā anumānañāṇassa pavatti ‘‘diṭṭhena adiṭṭhassa anumāna’’nti veditabbā. Vidite vedakampi ñāṇaṃ atthato viditameva hotīti ‘‘anumānañāṇaṃ nayaggāho vidito’’ti vuttaṃ. Viditoti viddho paṭiladdho, adhigatoti attho. Appamāṇoti aparimāṇo mahāvisayattā. Tenāha ‘‘apariyanto’’ti. Tenāti apariyantattā. Tena vā apariyantena ñāṇena. Etena thero yaṃ yaṃ anumeyyamatthaṃ ñātukāmo hoti, tattha tattha tassa asaṅgamappaṭihataṃ anumānañāṇaṃ pavattetīti dasseti. Tenāha ‘‘so iminā’’tiādi. Tattha imināti iminā kāraṇena.
баагаарасса т̇ирабхаавам̣ уд̣̇д̇хамуд̣̇д̇хам̣ аабзд̇ийд̇и уд̣̇д̇хаабам̣, баагаарамуулам̣. аад̣̇и-сад̣̇д̣̇зна баагаарад̣̇ваараб̣анд̇хабарикаад̣̇ийнам̣ сан̇г̇ахо взд̣̇ид̇аб̣б̣о. бажжанд̇з бхавам̣ бажжанд̇имам̣. бан̣д̣ид̇ад̣̇овааригадтаанияам̣ гад̇ваа т̇зро ад̇д̇аанам̣ д̣̇ассзд̇ийд̇и д̣̇ассзнд̇о ‘‘згад̣̇вааранд̇и гасмаа аахаа’’д̇и жод̣̇анам̣ самудтаабзси.
Pākārassa thirabhāvaṃ uddhamuddhaṃ āpetīti uddhāpaṃ, pākāramūlaṃ. Ādi-saddena pākāradvārabandhaparikhādīnaṃ saṅgaho veditabbo. Paccante bhavaṃ paccantimaṃ. Paṇḍitadovārikaṭṭhāniyaṃ katvā thero attānaṃ dassetīti dassento ‘‘ekadvāranti kasmā āhā’’ti codanaṃ samuṭṭhāpesi.
яассаа бан̃н̃ааяа васзна бурисо бан̣д̣ид̇од̇и вужжад̇и, д̇ам̣ бан̣д̣ижжанд̇и ааха – ‘‘бан̣д̣ижжзна саманнааг̇ад̇о’’д̇и. д̇ам̣д̇ам̣ид̇игад̇д̇аб̣б̣ад̇аасу чзгабхааво б̣яад̇д̇абхааво взяяад̇д̇ияам̣. мзд̇хад̇и ан̃н̃аан̣ам̣ хим̣сад̇и вид̇хамад̇ийд̇и мзд̇хаа, саа зд̇асса ад̇т̇ийд̇и мзд̇хаавий. таанз таанз уббад̇д̇и зд̇иссаа ад̇т̇ийд̇и таануббад̇д̇игаа, таанасо уббаж̇ж̇анабан̃н̃аа. анубарияааяанд̇и зд̇знаад̇и анубарияааяо, со зва бат̇од̇и анубарияааяабат̇о, барид̇о баагаарасса ануяааяанамаг̇г̇о. баагаарабхааг̇аа самб̣анд̇хид̇аб̣б̣аа зд̇т̇аад̇и баагаарасанд̇хи, баагаарасса пуллид̇абад̣̇зсо. со бана хздтиманд̇зна д̣̇виннамби идтагаанам̣ виг̇амзна звам̣ вужжад̇ийд̇и ааха – ‘‘д̣̇виннам̣ идтагаанам̣ абаг̇ад̇адтаана’’нд̇и. чиннадтаананд̇и чиннабхиннабад̣̇зсам̣, чиннадтаанам̣ ваа. д̇ан̃хи ‘‘вивара’’нд̇и вужжад̇и. гийлидтанд̇и малийнам̣. убад̇аабзнд̇ийд̇и гилзсабарил̣аахзна санд̇аабзнд̇и. виб̣аад̇хзнд̇ийд̇и бийл̣знд̇и. уббаннааяа бан̃н̃ааяа нийваран̣зхи на гин̃жи гаад̇ум̣ саггаад̇и ааха ‘‘ануббаннааяа бан̃н̃ааяа уббаж̇ж̇ид̇ум̣ на д̣̇знд̇ий’’д̇и. д̇асмаад̇и бажжаяуубагхаад̇зна уббаж̇ж̇ид̇ум̣ аббад̣̇аанад̇о. жад̇уусу сад̇ибадтаанзсу судту табид̇ажид̇д̇аад̇и жад̇уб̣б̣ид̇хааяаби сад̇ибадтаанабхааванааяа саммад̣̇зва табид̇ажид̇д̇аа аббид̇ажид̇д̇аа. яат̇аасабхаавзна бхаавзд̇ваад̇и яаат̇аавад̇о саммад̣̇зва яат̇аа бадибагкаа самужчиж̇ж̇анд̇и, звам̣ бхаавзд̇ваа.
Yassā paññāya vasena puriso paṇḍitoti vuccati, taṃ paṇḍiccanti āha – ‘‘paṇḍiccena samannāgato’’ti. Taṃtaṃitikattabbatāsu chekabhāvo byattabhāvo veyyattiyaṃ. Medhati aññāṇaṃ hiṃsati vidhamatīti medhā, sā etassa atthīti medhāvī. Ṭhāne ṭhāne uppatti etissā atthīti ṭhānuppattikā, ṭhānaso uppajjanapaññā. Anupariyāyanti etenāti anupariyāyo, so eva pathoti anupariyāyapatho, parito pākārassa anuyāyanamaggo. Pākārabhāgā sambandhitabbā etthāti pākārasandhi, pākārassa phullitapadeso. So pana heṭṭhimantena dvinnampi iṭṭhakānaṃ vigamena evaṃ vuccatīti āha – ‘‘dvinnaṃ iṭṭhakānaṃ apagataṭṭhāna’’nti. Chinnaṭṭhānanti chinnabhinnapadesaṃ, chinnaṭṭhānaṃ vā. Tañhi ‘‘vivara’’nti vuccati. Kīliṭṭhanti malīnaṃ. Upatāpentīti kilesapariḷāhena santāpenti. Vibādhentīti pīḷenti. Uppannāya paññāya nīvaraṇehi na kiñci kātuṃ sakkāti āha ‘‘anuppannāya paññāya uppajjituṃ na dentī’’ti. Tasmāti paccayūpaghātena uppajjituṃ appadānato. Catūsu satipaṭṭhānesu suṭṭhu ṭhapitacittāti catubbidhāyapi satipaṭṭhānabhāvanāya sammadeva ṭhapitacittā appitacittā. Yathāsabhāvena bhāvetvāti yāthāvato sammadeva yathā paṭipakkhā samucchijjanti, evaṃ bhāvetvā.
буриманаяз сад̇ибадтаанаани б̣ож̇жхан̇г̇аа жа миссагаа ад̇хиббзд̇аад̇и д̇ад̇о ан̃н̃ат̇аа вад̇д̇ум̣ ‘‘абижзд̇т̇аа’’д̇иаад̣̇и вуд̇д̇ам̣. миссагаад̇и самат̇авибассанаамаг̇г̇авасзна миссагаа. ‘‘жад̇уусу сад̇ибадтаанзсу суббад̇идтид̇ажид̇д̇аад̇и батамам̣ вуд̇д̇ад̇д̇аа сад̇ибадтаанзсу вибассанам̣ г̇ахзд̇ваа сад̇д̇а б̣ож̇жхан̇г̇з яат̇аабхууд̇ам̣ бхаавзд̇ваад̇и вуд̇д̇ад̇д̇аа маг̇г̇абарияаабаннаанам̣язва жа нзсам̣ ниббарияааяаб̣ож̇жхан̇г̇абхаавад̇о д̇зсу жа ад̇хиг̇ад̇амзва ход̇ийд̇и б̣ож̇жхан̇г̇з маг̇г̇о жа саб̣б̣ан̃н̃уд̇ан̃н̃аан̣ан̃жаад̇и г̇ахид̇з сунд̣̇аро бан̃хо бхавзяяаа’’д̇и махаасивад̇т̇зро ааха. на банзвам̣ г̇ахид̇ам̣ бораан̣зхийд̇и ад̇хиббааяо. ид̇ийд̇и вуд̇д̇аббагаарабараамасанам̣. т̇зрод̇и саарибуд̇д̇ад̇т̇зро.
Purimanaye satipaṭṭhānāni bojjhaṅgā ca missakā adhippetāti tato aññathā vattuṃ ‘‘apicetthā’’tiādi vuttaṃ. Missakāti samathavipassanāmaggavasena missakā. ‘‘Catūsu satipaṭṭhānesu suppatiṭṭhitacittāti paṭhamaṃ vuttattā satipaṭṭhānesu vipassanaṃ gahetvā satta bojjhaṅge yathābhūtaṃ bhāvetvāti vuttattā maggapariyāpannānaṃyeva ca nesaṃ nippariyāyabojjhaṅgabhāvato tesu ca adhigatameva hotīti bojjhaṅge maggo ca sabbaññutaññāṇañcāti gahite sundaro pañho bhaveyyā’’ti mahāsivatthero āha. Na panevaṃ gahitaṃ porāṇehīti adhippāyo. Itīti vuttappakāraparāmasanaṃ. Theroti sāriputtatthero.
д̇ад̇т̇аад̇и д̇зсу бажжанд̇анаг̇араад̣̇ийсу. наг̇арам̣ вияа ниб̣б̣аанам̣ д̇ад̣̇ад̇т̇игзхи убаг̇анд̇аб̣б̣ад̇о убаг̇ад̇аанан̃жа бариссаяарахид̇асукаад̇хиг̇амадтаанад̇о. баагааро вияа сийлам̣ д̇ад̣̇убаг̇ад̇аанам̣ барид̇о аарагкабхаавад̇о. анубарияааяабат̇о вияа хирий сийлабаагаарасса ад̇хидтаанабхаавад̇о. вуд̇д̇ан̃хзд̇ам̣ – ‘‘барияааяабат̇од̇и ко бхигку хирияаа зд̇ам̣ ад̇хиважана’’нд̇и. д̣̇ваарам̣ вияа арияамаг̇г̇о ниб̣б̣аананаг̇араббавзсанз ан̃ж̇асабхаавад̇о. бан̣д̣ид̇ад̣̇оваариго вияа д̇хаммасзнаабад̇и ниб̣б̣аананаг̇арам̣ бавидтабависанагаанам̣ сад̇д̇аанам̣ саллагкан̣ад̇о. д̣̇иннод̇и д̣̇аабид̇о, сод̇хид̇од̇и ад̇т̇о. сзсам̣ сувин̃н̃зяяамзва.
Tatthāti tesu paccantanagarādīsu. Nagaraṃ viya nibbānaṃ tadatthikehi upagantabbato upagatānañca parissayarahitasukhādhigamaṭṭhānato. Pākāro viya sīlaṃ tadupagatānaṃ parito ārakkhabhāvato. Anupariyāyapatho viya hirī sīlapākārassa adhiṭṭhānabhāvato. Vuttañhetaṃ – ‘‘pariyāyapathoti kho bhikkhu hiriyā etaṃ adhivacana’’nti. Dvāraṃ viya ariyamaggo nibbānanagarappavesane añjasabhāvato. Paṇḍitadovāriko viya dhammasenāpati nibbānanagaraṃ paviṭṭhapavisanakānaṃ sattānaṃ sallakkhaṇato. Dinnoti dāpito, sodhitoti attho. Sesaṃ suviññeyyameva.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 2. нааланд̣̇асуд̇д̇ам̣ • 2. Nālandasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 2. нааланд̣̇асуд̇д̇аван̣н̣анаа • 2. Nālandasuttavaṇṇanā
