| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
8. நாமரூபபடிஸந்த³ஹனபஞ்ஹோ
8. Nāmarūpapaṭisandahanapañho
8. ராஜா ஆஹ ‘‘ப⁴ந்தே நாக³ஸேன, யங் பனேதங் ப்³ரூஸி ‘நாமரூப’ந்தி, தத்த² கதமங் நாமங், கதமங் ரூப’’ந்தி. ‘‘யங் தத்த², மஹாராஜ, ஓளாரிகங், ஏதங் ரூபங், யே தத்த² ஸுகு²மா சித்தசேதஸிகா த⁴ம்மா, ஏதங் நாம’’ந்தி. ‘‘ப⁴ந்தே நாக³ஸேன, கேன காரணேன நாமங் யேவ ந படிஸந்த³ஹதி, ரூபங் யேவ வா’’தி? ‘‘அஞ்ஞமஞ்ஞூபனிஸ்ஸிதா, மஹாராஜ, ஏதே த⁴ம்மா ஏகதோவ உப்பஜ்ஜந்தீ’’தி.
8. Rājā āha ‘‘bhante nāgasena, yaṃ panetaṃ brūsi ‘nāmarūpa’nti, tattha katamaṃ nāmaṃ, katamaṃ rūpa’’nti. ‘‘Yaṃ tattha, mahārāja, oḷārikaṃ, etaṃ rūpaṃ, ye tattha sukhumā cittacetasikā dhammā, etaṃ nāma’’nti. ‘‘Bhante nāgasena, kena kāraṇena nāmaṃ yeva na paṭisandahati, rūpaṃ yeva vā’’ti? ‘‘Aññamaññūpanissitā, mahārāja, ete dhammā ekatova uppajjantī’’ti.
‘‘ஓபம்மங் கரோஹீ’’தி. ‘‘யதா², மஹாராஜ, குக்குடியா கலலங் ந ப⁴வெய்ய, அண்ட³ம்பி ந ப⁴வெய்ய, யஞ்ச தத்த² கலலங், யஞ்ச அண்ட³ங், உபோ⁴பேதே அஞ்ஞமஞ்ஞூபனிஸ்ஸிதா, ஏகதோவ நேஸங் உப்பத்தி ஹோதி. ஏவமேவ கோ², மஹாராஜ, யதி³ தத்த² நாமங் ந ப⁴வெய்ய, ரூபம்பி ந ப⁴வெய்ய, யஞ்சேவ தத்த² நாமங், யஞ்சேவ ரூபங், உபோ⁴பேதே அஞ்ஞமஞ்ஞூபனிஸ்ஸிதா, ஏகதோவ நேஸங் உப்பத்தி ஹோதி. ஏவமேதங் தீ³க⁴மத்³தா⁴னங் ஸந்தா⁴வித’’ந்தி.
‘‘Opammaṃ karohī’’ti. ‘‘Yathā, mahārāja, kukkuṭiyā kalalaṃ na bhaveyya, aṇḍampi na bhaveyya, yañca tattha kalalaṃ, yañca aṇḍaṃ, ubhopete aññamaññūpanissitā, ekatova nesaṃ uppatti hoti. Evameva kho, mahārāja, yadi tattha nāmaṃ na bhaveyya, rūpampi na bhaveyya, yañceva tattha nāmaṃ, yañceva rūpaṃ, ubhopete aññamaññūpanissitā, ekatova nesaṃ uppatti hoti. Evametaṃ dīghamaddhānaṃ sandhāvita’’nti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
நாமரூபபடிஸந்த³ஹனபஞ்ஹோ அட்ட²மோ.
Nāmarūpapaṭisandahanapañho aṭṭhamo.
