| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၈. နာမရူပပဋိသန္ဒဟနပဉ္ဟော
8. Nāmarūpapaṭisandahanapañho
၈. ရာဇာ အာဟ ‘‘ဘန္တေ နာဂသေန, ယံ ပနေတံ ဗ္ရူသိ ‘နာမရူပ’န္တိ, တတ္ထ ကတမံ နာမံ, ကတမံ ရူပ’’န္တိ။ ‘‘ယံ တတ္ထ, မဟာရာဇ, ဩဠာရိကံ, ဧတံ ရူပံ, ယေ တတ္ထ သုခုမာ စိတ္တစေတသိကာ ဓမ္မာ, ဧတံ နာမ’’န္တိ။ ‘‘ဘန္တေ နာဂသေန, ကေန ကာရဏေန နာမံ ယေဝ န ပဋိသန္ဒဟတိ, ရူပံ ယေဝ ဝာ’’တိ? ‘‘အညမညူပနိသ္သိတာ, မဟာရာဇ, ဧတေ ဓမ္မာ ဧကတောဝ ဥပ္ပဇ္ဇန္တီ’’တိ။
8. Rājā āha ‘‘bhante nāgasena, yaṃ panetaṃ brūsi ‘nāmarūpa’nti, tattha katamaṃ nāmaṃ, katamaṃ rūpa’’nti. ‘‘Yaṃ tattha, mahārāja, oḷārikaṃ, etaṃ rūpaṃ, ye tattha sukhumā cittacetasikā dhammā, etaṃ nāma’’nti. ‘‘Bhante nāgasena, kena kāraṇena nāmaṃ yeva na paṭisandahati, rūpaṃ yeva vā’’ti? ‘‘Aññamaññūpanissitā, mahārāja, ete dhammā ekatova uppajjantī’’ti.
‘‘ဩပမ္မံ ကရောဟီ’’တိ။ ‘‘ယထာ, မဟာရာဇ, ကုက္ကုဋိယာ ကလလံ န ဘဝေယ္ယ, အဏ္ဍမ္ပိ န ဘဝေယ္ယ, ယဉ္စ တတ္ထ ကလလံ, ယဉ္စ အဏ္ဍံ, ဥဘောပေတေ အညမညူပနိသ္သိတာ, ဧကတောဝ နေသံ ဥပ္ပတ္တိ ဟောတိ။ ဧဝမေဝ ခော, မဟာရာဇ, ယဒိ တတ္ထ နာမံ န ဘဝေယ္ယ, ရူပမ္ပိ န ဘဝေယ္ယ, ယဉ္စေဝ တတ္ထ နာမံ, ယဉ္စေဝ ရူပံ, ဥဘောပေတေ အညမညူပနိသ္သိတာ, ဧကတောဝ နေသံ ဥပ္ပတ္တိ ဟောတိ။ ဧဝမေတံ ဒီဃမဒ္ဓာနံ သန္ဓာဝိတ’’န္တိ။
‘‘Opammaṃ karohī’’ti. ‘‘Yathā, mahārāja, kukkuṭiyā kalalaṃ na bhaveyya, aṇḍampi na bhaveyya, yañca tattha kalalaṃ, yañca aṇḍaṃ, ubhopete aññamaññūpanissitā, ekatova nesaṃ uppatti hoti. Evameva kho, mahārāja, yadi tattha nāmaṃ na bhaveyya, rūpampi na bhaveyya, yañceva tattha nāmaṃ, yañceva rūpaṃ, ubhopete aññamaññūpanissitā, ekatova nesaṃ uppatti hoti. Evametaṃ dīghamaddhānaṃ sandhāvita’’nti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
နာမရူပပဋိသန္ဒဟနပဉ္ဟော အဋ္ဌမော။
Nāmarūpapaṭisandahanapañho aṭṭhamo.
