| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༨. ནཱམརཱུཔཔཊིསནྡཧནཔཉྷོ
8. Nāmarūpapaṭisandahanapañho
༨. རཱཛཱ ཨཱཧ ‘‘བྷནྟེ ནཱགསེན, ཡཾ པནེཏཾ བྲཱུསི ‘ནཱམརཱུཔ’ནྟི, ཏཏྠ ཀཏམཾ ནཱམཾ, ཀཏམཾ རཱུཔ’’ནྟི། ‘‘ཡཾ ཏཏྠ, མཧཱརཱཛ, ཨོལཱ༹རིཀཾ, ཨེཏཾ རཱུཔཾ, ཡེ ཏཏྠ སུཁུམཱ ཙིཏྟཙེཏསིཀཱ དྷམྨཱ, ཨེཏཾ ནཱམ’’ནྟི། ‘‘བྷནྟེ ནཱགསེན, ཀེན ཀཱརཎེན ནཱམཾ ཡེཝ ན པཊིསནྡཧཏི, རཱུཔཾ ཡེཝ ཝཱ’’ཏི? ‘‘ཨཉྙམཉྙཱུཔནིསྶིཏཱ, མཧཱརཱཛ, ཨེཏེ དྷམྨཱ ཨེཀཏོཝ ཨུཔྤཛྫནྟཱི’’ཏི།
8. Rājā āha ‘‘bhante nāgasena, yaṃ panetaṃ brūsi ‘nāmarūpa’nti, tattha katamaṃ nāmaṃ, katamaṃ rūpa’’nti. ‘‘Yaṃ tattha, mahārāja, oḷārikaṃ, etaṃ rūpaṃ, ye tattha sukhumā cittacetasikā dhammā, etaṃ nāma’’nti. ‘‘Bhante nāgasena, kena kāraṇena nāmaṃ yeva na paṭisandahati, rūpaṃ yeva vā’’ti? ‘‘Aññamaññūpanissitā, mahārāja, ete dhammā ekatova uppajjantī’’ti.
‘‘ཨོཔམྨཾ ཀརོཧཱི’’ཏི། ‘‘ཡཐཱ, མཧཱརཱཛ, ཀུཀྐུཊིཡཱ ཀལལཾ ན བྷཝེཡྻ, ཨཎྜམྤི ན བྷཝེཡྻ, ཡཉྩ ཏཏྠ ཀལལཾ, ཡཉྩ ཨཎྜཾ, ཨུབྷོཔེཏེ ཨཉྙམཉྙཱུཔནིསྶིཏཱ, ཨེཀཏོཝ ནེསཾ ཨུཔྤཏྟི ཧོཏི། ཨེཝམེཝ ཁོ, མཧཱརཱཛ, ཡདི ཏཏྠ ནཱམཾ ན བྷཝེཡྻ, རཱུཔམྤི ན བྷཝེཡྻ, ཡཉྩེཝ ཏཏྠ ནཱམཾ, ཡཉྩེཝ རཱུཔཾ, ཨུབྷོཔེཏེ ཨཉྙམཉྙཱུཔནིསྶིཏཱ, ཨེཀཏོཝ ནེསཾ ཨུཔྤཏྟི ཧོཏི། ཨེཝམེཏཾ དཱིགྷམདྡྷཱནཾ སནྡྷཱཝིཏ’’ནྟི།
‘‘Opammaṃ karohī’’ti. ‘‘Yathā, mahārāja, kukkuṭiyā kalalaṃ na bhaveyya, aṇḍampi na bhaveyya, yañca tattha kalalaṃ, yañca aṇḍaṃ, ubhopete aññamaññūpanissitā, ekatova nesaṃ uppatti hoti. Evameva kho, mahārāja, yadi tattha nāmaṃ na bhaveyya, rūpampi na bhaveyya, yañceva tattha nāmaṃ, yañceva rūpaṃ, ubhopete aññamaññūpanissitā, ekatova nesaṃ uppatti hoti. Evametaṃ dīghamaddhānaṃ sandhāvita’’nti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
ནཱམརཱུཔཔཊིསནྡཧནཔཉྷོ ཨཊྛམོ།
Nāmarūpapaṭisandahanapañho aṭṭhamo.
