| Library / Tipiṭaka / തിപിടക • Tipiṭaka / മിലിന്ദപഞ്ഹപാളി • Milindapañhapāḷi |
൮. നാമരൂപപടിസന്ദഹനപഞ്ഹോ
8. Nāmarūpapaṭisandahanapañho
൮. രാജാ ആഹ ‘‘ഭന്തേ നാഗസേന, യം പനേതം ബ്രൂസി ‘നാമരൂപ’ന്തി, തത്ഥ കതമം നാമം, കതമം രൂപ’’ന്തി. ‘‘യം തത്ഥ, മഹാരാജ, ഓളാരികം, ഏതം രൂപം, യേ തത്ഥ സുഖുമാ ചിത്തചേതസികാ ധമ്മാ, ഏതം നാമ’’ന്തി. ‘‘ഭന്തേ നാഗസേന, കേന കാരണേന നാമം യേവ ന പടിസന്ദഹതി, രൂപം യേവ വാ’’തി? ‘‘അഞ്ഞമഞ്ഞൂപനിസ്സിതാ, മഹാരാജ, ഏതേ ധമ്മാ ഏകതോവ ഉപ്പജ്ജന്തീ’’തി.
8. Rājā āha ‘‘bhante nāgasena, yaṃ panetaṃ brūsi ‘nāmarūpa’nti, tattha katamaṃ nāmaṃ, katamaṃ rūpa’’nti. ‘‘Yaṃ tattha, mahārāja, oḷārikaṃ, etaṃ rūpaṃ, ye tattha sukhumā cittacetasikā dhammā, etaṃ nāma’’nti. ‘‘Bhante nāgasena, kena kāraṇena nāmaṃ yeva na paṭisandahati, rūpaṃ yeva vā’’ti? ‘‘Aññamaññūpanissitā, mahārāja, ete dhammā ekatova uppajjantī’’ti.
‘‘ഓപമ്മം കരോഹീ’’തി. ‘‘യഥാ, മഹാരാജ, കുക്കുടിയാ കലലം ന ഭവേയ്യ, അണ്ഡമ്പി ന ഭവേയ്യ, യഞ്ച തത്ഥ കലലം, യഞ്ച അണ്ഡം, ഉഭോപേതേ അഞ്ഞമഞ്ഞൂപനിസ്സിതാ, ഏകതോവ നേസം ഉപ്പത്തി ഹോതി. ഏവമേവ ഖോ, മഹാരാജ, യദി തത്ഥ നാമം ന ഭവേയ്യ, രൂപമ്പി ന ഭവേയ്യ, യഞ്ചേവ തത്ഥ നാമം, യഞ്ചേവ രൂപം, ഉഭോപേതേ അഞ്ഞമഞ്ഞൂപനിസ്സിതാ, ഏകതോവ നേസം ഉപ്പത്തി ഹോതി. ഏവമേതം ദീഘമദ്ധാനം സന്ധാവിത’’ന്തി.
‘‘Opammaṃ karohī’’ti. ‘‘Yathā, mahārāja, kukkuṭiyā kalalaṃ na bhaveyya, aṇḍampi na bhaveyya, yañca tattha kalalaṃ, yañca aṇḍaṃ, ubhopete aññamaññūpanissitā, ekatova nesaṃ uppatti hoti. Evameva kho, mahārāja, yadi tattha nāmaṃ na bhaveyya, rūpampi na bhaveyya, yañceva tattha nāmaṃ, yañceva rūpaṃ, ubhopete aññamaññūpanissitā, ekatova nesaṃ uppatti hoti. Evametaṃ dīghamaddhānaṃ sandhāvita’’nti.
‘‘കല്ലോസി, ഭന്തേ നാഗസേനാ’’തി.
‘‘Kallosi, bhante nāgasenā’’ti.
നാമരൂപപടിസന്ദഹനപഞ്ഹോ അട്ഠമോ.
Nāmarūpapaṭisandahanapañho aṭṭhamo.
