| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[289] 9. நானாச²ந்த³ஜாதகவண்ணனா
[289] 9. Nānāchandajātakavaṇṇanā
நானாச²ந்தா³, மஹாராஜாதி இத³ங் ஸத்தா² ஜேதவனே விஹரந்தோ ஆயஸ்மதோ ஆனந்த³ஸ்ஸ அட்ட²வரலாப⁴ங் ஆரப்³ப⁴ கதே²ஸி. வத்து² ஏகாத³ஸகனிபாதே ஜுண்ஹஜாதகே (ஜா॰ 1.11.13 ஆத³யோ) ஆவிப⁴விஸ்ஸதி.
Nānāchandā, mahārājāti idaṃ satthā jetavane viharanto āyasmato ānandassa aṭṭhavaralābhaṃ ārabbha kathesi. Vatthu ekādasakanipāte juṇhajātake (jā. 1.11.13 ādayo) āvibhavissati.
அதீதே பன போ³தி⁴ஸத்தோ பா³ராணஸியங் ப்³ரஹ்மத³த்தே ரஜ்ஜங் காரெந்தே தஸ்ஸ அக்³க³மஹேஸியா குச்சி²ம்ஹி நிப்³ப³த்தித்வா வயப்பத்தோ தக்கஸிலாயங் ஸப்³ப³ஸிப்பானி உக்³க³ஹெத்வா பிது அச்சயேன ரஜ்ஜங் பாபுணி. தஸ்ஸ டா²னதோ அபனீதோ பிது புரோஹிதோ அத்தி². ஸோ து³க்³க³தோ ஹுத்வா ஏகஸ்மிங் ஜரகே³ஹே வஸதி. அதே²கதி³வஸங் போ³தி⁴ஸத்தோ அஞ்ஞாதகவேஸேன ரத்திபா⁴கே³ நக³ரங் பரிக்³க³ண்ஹந்தோ விசரதி. தமேனங் கதகம்மசோரா ஏகஸ்மிங் ஸுராபானே ஸுரங் பிவித்வா அபரம்பி க⁴டேனாதா³ய அத்தனோ கே³ஹங் க³ச்ச²ந்தா அந்தரவீதி²யங் தி³ஸ்வா ‘‘அரே கோஸி த்வ’’ந்தி வத்வா பஹரித்வா உத்தரிஸாடகங் க³ஹெத்வா க⁴டங் உக்கி²பாபெத்வா தாஸெந்தா க³ச்சி²ங்ஸு. ஸோபி கோ² ப்³ராஹ்மணோ தஸ்மிங் க²ணே நிக்க²மித்வா அந்தரவீதி²யங் டி²தோ நக்க²த்தங் ஓலோகெந்தோ ரஞ்ஞோ அமித்தானங் ஹத்த²க³தபா⁴வங் ஞத்வா ப்³ராஹ்மணிங் ஆமந்தேஸி. ஸா ‘‘கிங், அய்யா’’தி வத்வா வேகே³ன தஸ்ஸ ஸந்திகங் ஆக³தா. அத² நங் ஸோ ஆஹ – ‘‘போ⁴தி அம்ஹாகங் ராஜா அமித்தானங் வஸங் க³தோ’’தி. ‘‘அய்ய, கிங் தே ரஞ்ஞோ ஸந்திகே பவத்தியா, ப்³ராஹ்மணா ஜானிஸ்ஸந்தீ’’தி.
Atīte pana bodhisatto bārāṇasiyaṃ brahmadatte rajjaṃ kārente tassa aggamahesiyā kucchimhi nibbattitvā vayappatto takkasilāyaṃ sabbasippāni uggahetvā pitu accayena rajjaṃ pāpuṇi. Tassa ṭhānato apanīto pitu purohito atthi. So duggato hutvā ekasmiṃ jaragehe vasati. Athekadivasaṃ bodhisatto aññātakavesena rattibhāge nagaraṃ pariggaṇhanto vicarati. Tamenaṃ katakammacorā ekasmiṃ surāpāne suraṃ pivitvā aparampi ghaṭenādāya attano gehaṃ gacchantā antaravīthiyaṃ disvā ‘‘are kosi tva’’nti vatvā paharitvā uttarisāṭakaṃ gahetvā ghaṭaṃ ukkhipāpetvā tāsentā gacchiṃsu. Sopi kho brāhmaṇo tasmiṃ khaṇe nikkhamitvā antaravīthiyaṃ ṭhito nakkhattaṃ olokento rañño amittānaṃ hatthagatabhāvaṃ ñatvā brāhmaṇiṃ āmantesi. Sā ‘‘kiṃ, ayyā’’ti vatvā vegena tassa santikaṃ āgatā. Atha naṃ so āha – ‘‘bhoti amhākaṃ rājā amittānaṃ vasaṃ gato’’ti. ‘‘Ayya, kiṃ te rañño santike pavattiyā, brāhmaṇā jānissantī’’ti.
ராஜா ப்³ராஹ்மணஸ்ஸ ஸத்³த³ங் ஸுத்வா தோ²கங் க³ந்த்வா து⁴த்தே ஆஹ – ‘‘து³க்³க³தொம்ஹி, ஸாமி, உத்தராஸங்க³ங் க³ஹெத்வா விஸ்ஸஜ்ஜேத² ம’’ந்தி. தே புனப்புனங் கதெ²ந்தங் காருஞ்ஞேன விஸ்ஸஜ்ஜேஸுங். ஸோ தேஸங் வஸனகே³ஹங் ஸல்லக்கெ²த்வா நிவத்தி. அத² போராணகபுரோஹிதோ ப்³ராஹ்மணோபி ‘‘போ⁴தி, அம்ஹாகங் ராஜா அமித்தஹத்த²தோ முத்தோ’’தி ஆஹ. ராஜா தம்பி ஸுத்வா தம்பி கே³ஹங் ஸல்லக்கெ²த்வா பாஸாத³ங் அபி⁴ருஹி. ஸோ விபா⁴தாய ரத்தியா ப்³ராஹ்மணே பக்கோஸாபெத்வா ‘‘கிங் ஆசரியா ரத்திங் நக்க²த்தங் ஓலோகயித்தா²’’தி புச்சி². ‘‘ஆம, தே³வா’’தி. ‘‘கிங் ஸோப⁴ன’’ந்தி? ‘‘ஸோப⁴னங், தே³வா’’தி. ‘‘கோசி கா³ஹோ நத்தீ²’’தி. ‘‘நத்தி², தே³வா’’தி. ராஜா ‘‘அஸுககே³ஹதோ ப்³ராஹ்மணங் பக்கோஸதா²’’தி போராணகபுரோஹிதங் பக்கோஸாபெத்வா ‘‘கிங், ஆசரிய, ரத்திங் தே நக்க²த்தங் தி³ட்ட²’’ந்தி புச்சி². ‘‘ஆம, தே³வா’’தி. ‘‘அத்தி² கோசி கா³ஹோ’’தி. ‘‘ஆம, மஹாராஜ, அஜ்ஜ ரத்திங் தும்ஹே அமித்தவஸங் க³ந்த்வா முஹுத்தேனேவ முத்தா’’தி. ராஜா ‘‘நக்க²த்தஜானநகேன நாம ஏவரூபேன ப⁴விதப்³ப³’’ந்தி ஸேஸப்³ராஹ்மணே நிக்கட்³டா⁴பெத்வா ‘‘ப்³ராஹ்மண, பஸன்னொஸ்மி தே, வரங் த்வங் க³ண்ஹா’’தி ஆஹ. ‘‘மஹாராஜ, புத்ததா³ரேன ஸத்³தி⁴ங் மந்தெத்வா க³ண்ஹிஸ்ஸாமீ’’தி. ‘‘க³ச்ச² மந்தெத்வா ஏஹீ’’தி.
Rājā brāhmaṇassa saddaṃ sutvā thokaṃ gantvā dhutte āha – ‘‘duggatomhi, sāmi, uttarāsaṅgaṃ gahetvā vissajjetha ma’’nti. Te punappunaṃ kathentaṃ kāruññena vissajjesuṃ. So tesaṃ vasanagehaṃ sallakkhetvā nivatti. Atha porāṇakapurohito brāhmaṇopi ‘‘bhoti, amhākaṃ rājā amittahatthato mutto’’ti āha. Rājā tampi sutvā tampi gehaṃ sallakkhetvā pāsādaṃ abhiruhi. So vibhātāya rattiyā brāhmaṇe pakkosāpetvā ‘‘kiṃ ācariyā rattiṃ nakkhattaṃ olokayitthā’’ti pucchi. ‘‘Āma, devā’’ti. ‘‘Kiṃ sobhana’’nti? ‘‘Sobhanaṃ, devā’’ti. ‘‘Koci gāho natthī’’ti. ‘‘Natthi, devā’’ti. Rājā ‘‘asukagehato brāhmaṇaṃ pakkosathā’’ti porāṇakapurohitaṃ pakkosāpetvā ‘‘kiṃ, ācariya, rattiṃ te nakkhattaṃ diṭṭha’’nti pucchi. ‘‘Āma, devā’’ti. ‘‘Atthi koci gāho’’ti. ‘‘Āma, mahārāja, ajja rattiṃ tumhe amittavasaṃ gantvā muhutteneva muttā’’ti. Rājā ‘‘nakkhattajānanakena nāma evarūpena bhavitabba’’nti sesabrāhmaṇe nikkaḍḍhāpetvā ‘‘brāhmaṇa, pasannosmi te, varaṃ tvaṃ gaṇhā’’ti āha. ‘‘Mahārāja, puttadārena saddhiṃ mantetvā gaṇhissāmī’’ti. ‘‘Gaccha mantetvā ehī’’ti.
ஸோ க³ந்த்வா ப்³ராஹ்மணிஞ்ச புத்தஞ்ச ஸுணிஸஞ்ச தா³ஸிஞ்ச பக்கோஸித்வா ‘‘ராஜா மே வரங் த³தா³தி, கிங் க³ண்ஹாமா’’தி புச்சி². ப்³ராஹ்மணீ ‘‘மய்ஹங் தே⁴னுஸதங் ஆனேஹீ’’தி ஆஹ, புத்தோ ச²த்தமாணவோ நாம ‘‘மய்ஹங் குமுத³வண்ணேஹி சதூஹி ஸிந்த⁴வேஹி யுத்தங் ஆஜஞ்ஞரத²’’ந்தி, ஸுணிஸா ‘‘மய்ஹங் மணிகுண்ட³லங் ஆதி³ங் கத்வா ஸப்³பா³லங்கார’’ந்தி, புண்ணா நாம தா³ஸீ ‘‘மய்ஹங் உது³க்க²லமுஸலஞ்சேவ ஸுப்பஞ்சா’’தி. ப்³ராஹ்மணோ பன கா³மவரங் க³ஹேதுகாமோ ரஞ்ஞோ ஸந்திகங் க³ந்த்வா ‘‘கிங் , ப்³ராஹ்மண, புச்சி²தோ தே புத்ததா³ரோ’’தி புட்டோ² ‘‘ஆம, தே³வ, புச்சி²தோ, அனேகச்ச²ந்தோ³’’தி வத்வா பட²மங் கா³தா²த்³வயமாஹ –
So gantvā brāhmaṇiñca puttañca suṇisañca dāsiñca pakkositvā ‘‘rājā me varaṃ dadāti, kiṃ gaṇhāmā’’ti pucchi. Brāhmaṇī ‘‘mayhaṃ dhenusataṃ ānehī’’ti āha, putto chattamāṇavo nāma ‘‘mayhaṃ kumudavaṇṇehi catūhi sindhavehi yuttaṃ ājaññaratha’’nti, suṇisā ‘‘mayhaṃ maṇikuṇḍalaṃ ādiṃ katvā sabbālaṅkāra’’nti, puṇṇā nāma dāsī ‘‘mayhaṃ udukkhalamusalañceva suppañcā’’ti. Brāhmaṇo pana gāmavaraṃ gahetukāmo rañño santikaṃ gantvā ‘‘kiṃ , brāhmaṇa, pucchito te puttadāro’’ti puṭṭho ‘‘āma, deva, pucchito, anekacchando’’ti vatvā paṭhamaṃ gāthādvayamāha –
115.
115.
‘‘நானாச²ந்தா³ மஹாராஜ, ஏகாகா³ரே வஸாமஸே;
‘‘Nānāchandā mahārāja, ekāgāre vasāmase;
அஹங் கா³மவரங் இச்சே², ப்³ராஹ்மணீ ச க³வங் ஸதங்.
Ahaṃ gāmavaraṃ icche, brāhmaṇī ca gavaṃ sataṃ.
116.
116.
‘‘புத்தோ ச ஆஜஞ்ஞரத²ங், கஞ்ஞா ச மணிகுண்ட³லங்;
‘‘Putto ca ājaññarathaṃ, kaññā ca maṇikuṇḍalaṃ;
யா சேஸா புண்ணிகா ஜம்மீ, உது³க்க²லங்பி⁴கங்க²தீ’’தி.
Yā cesā puṇṇikā jammī, udukkhalaṃbhikaṅkhatī’’ti.
தத்த² இச்சே²தி இச்சா²மி. க³வங் ஸதந்தி தே⁴னூனங் கு³ன்னங் ஸதங். கஞ்ஞாதி ஸுணிஸா. யா சேஸாதி யா ஏஸா அம்ஹாகங் க⁴ரே புண்ணிகா நாம தா³ஸீ, ஸா ஜம்மீ லாமிகா ஸுப்பமுஸலேஹி ஸத்³தி⁴ங் உது³க்க²லங் அபி⁴கங்க²தி இச்ச²தீதி.
Tattha iccheti icchāmi. Gavaṃ satanti dhenūnaṃ gunnaṃ sataṃ. Kaññāti suṇisā. Yā cesāti yā esā amhākaṃ ghare puṇṇikā nāma dāsī, sā jammī lāmikā suppamusalehi saddhiṃ udukkhalaṃ abhikaṅkhati icchatīti.
ராஜா ‘‘ஸப்³பே³ஸங் இச்சி²திச்சி²தங் தே³தா²’’தி ஆணாபெந்தோ –
Rājā ‘‘sabbesaṃ icchiticchitaṃ dethā’’ti āṇāpento –
117.
117.
‘‘ப்³ராஹ்மணஸ்ஸ கா³மவரங், ப்³ராஹ்மணியா க³வங் ஸதங்;
‘‘Brāhmaṇassa gāmavaraṃ, brāhmaṇiyā gavaṃ sataṃ;
புத்தஸ்ஸ ஆஜஞ்ஞரத²ங், கஞ்ஞாய மணிகுண்ட³லங்;
Puttassa ājaññarathaṃ, kaññāya maṇikuṇḍalaṃ;
யஞ்சேதங் புண்ணிகங் ஜம்மிங், படிபாதே³து²து³க்க²ல’’ந்தி. – கா³த²மாஹ;
Yañcetaṃ puṇṇikaṃ jammiṃ, paṭipādethudukkhala’’nti. – gāthamāha;
தத்த² யஞ்சேதந்தி யஞ்ச ஏதங் புண்ணிகந்தி வத³தி, தங் ஜம்மிங் உது³க்க²லங் படிபாதே³த² ஸம்படிச்சா²பேதா²தி.
Tattha yañcetanti yañca etaṃ puṇṇikanti vadati, taṃ jammiṃ udukkhalaṃ paṭipādetha sampaṭicchāpethāti.
இதி ராஜா ப்³ராஹ்மணேன பத்தி²தஞ்ச அஞ்ஞஞ்ச மஹந்தங் யஸங் த³த்வா ‘‘இதோ பட்டா²ய அம்ஹாகங் கத்தப்³ப³கிச்சேஸு உஸ்ஸுக்கங் ஆபஜ்ஜா’’தி வத்வா ப்³ராஹ்மணங் அத்தனோ ஸந்திகே அகாஸி.
Iti rājā brāhmaṇena patthitañca aññañca mahantaṃ yasaṃ datvā ‘‘ito paṭṭhāya amhākaṃ kattabbakiccesu ussukkaṃ āpajjā’’ti vatvā brāhmaṇaṃ attano santike akāsi.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ ப்³ராஹ்மணோ ஆனந்தோ³ அஹோஸி, ராஜா பன அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā brāhmaṇo ānando ahosi, rājā pana ahameva ahosi’’nti.
நானாச²ந்த³ஜாதகவண்ணனா நவமா.
Nānāchandajātakavaṇṇanā navamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 289. நானாச²ந்த³ஜாதகங் • 289. Nānāchandajātakaṃ
