| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༡༦. ནཱནཱདྷམྨཱནཾ ཨེཀཀིཙྩཨབྷིནིཔྥཱདནཔཉྷོ
16. Nānādhammānaṃ ekakiccaabhinipphādanapañho
༡༦. རཱཛཱ ཨཱཧ ‘‘བྷནྟེ ནཱགསེན, ཨིམེ དྷམྨཱ ནཱནཱ སནྟཱ ཨེཀཾ ཨཏྠཾ ཨབྷིནིཔྥཱདེནྟཱི’’ཏི? ‘‘ཨཱམ, མཧཱརཱཛ, ཨིམེ དྷམྨཱ ནཱནཱ སནྟཱ ཨེཀཾ ཨཏྠཾ ཨབྷིནིཔྥཱདེནྟི, ཀིལེསེ ཧནནྟཱི’’ཏི།
16. Rājā āha ‘‘bhante nāgasena, ime dhammā nānā santā ekaṃ atthaṃ abhinipphādentī’’ti? ‘‘Āma, mahārāja, ime dhammā nānā santā ekaṃ atthaṃ abhinipphādenti, kilese hanantī’’ti.
‘‘ཀཐཾ, བྷནྟེ, ཨིམེ དྷམྨཱ ནཱནཱ སནྟཱ ཨེཀཾ ཨཏྠཾ ཨབྷིནིཔྥཱདེནྟི, ཀིལེསེ ཧནནྟི? ཨོཔམྨཾ ཀརོཧཱི’’ཏི། ‘‘ཡཐཱ, མཧཱརཱཛ, སེནཱ ནཱནཱ སནྟཱ ཧཏྠཱི ཙ ཨསྶཱ ཙ རཐཱ ཙ པཏྟཱི ཙ ཨེཀཾ ཨཏྠཾ ཨབྷིནིཔྥཱདེནྟི, སངྒཱམེ པརསེནཾ ཨབྷིཝིཛིནནྟི། ཨེཝམེཝ ཁོ, མཧཱརཱཛ, ཨིམེ དྷམྨཱ ནཱནཱ སནྟཱ ཨེཀཾ ཨཏྠཾ ཨབྷིནིཔྥཱདེནྟི, ཀིལེསེ ཧནནྟཱི’’ཏི།
‘‘Kathaṃ, bhante, ime dhammā nānā santā ekaṃ atthaṃ abhinipphādenti, kilese hananti? Opammaṃ karohī’’ti. ‘‘Yathā, mahārāja, senā nānā santā hatthī ca assā ca rathā ca pattī ca ekaṃ atthaṃ abhinipphādenti, saṅgāme parasenaṃ abhivijinanti. Evameva kho, mahārāja, ime dhammā nānā santā ekaṃ atthaṃ abhinipphādenti, kilese hanantī’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
ནཱནཱདྷམྨཱནཾ ཨེཀཀིཙྩཨབྷིནིཔྥཱདནཔཉྷོ སོལ༹སམོ།
Nānādhammānaṃ ekakiccaabhinipphādanapañho soḷasamo.
མཧཱཝགྒོ པཋམོ།
Mahāvaggo paṭhamo.
ཨིམསྨིཾ ཝགྒེ སོལ༹ས པཉྷཱ།
Imasmiṃ vagge soḷasa pañhā.
