| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
২০. ৰীসতিমৰগ্গো
20. Vīsatimavaggo
(১৯৫) ২. ঞাণকথা
(195) 2. Ñāṇakathā
৮৬৩. নত্থি পুথুজ্জনস্স ঞাণন্তি? আমন্তা। নত্থি পুথুজ্জনস্স পঞ্ঞা পজাননা ৰিচযো পৰিচযো ধম্মৰিচযো সল্লক্খণা উপলক্খণা পচ্চুপলক্খণাতি? ন হেৰং ৰত্তব্বে…পে॰… ননু অত্থি পুথুজ্জনস্স পঞ্ঞা পজাননা ৰিচযো…পে॰… পচ্চুপলক্খণাতি? আমন্তা। হঞ্চি অত্থি পুথুজ্জনস্স পঞ্ঞা পজাননা ৰিচযো…পে॰… পচ্চুপলক্খণা, নো চ ৰত রে ৰত্তব্বে – ‘‘নত্থি পুথুজ্জনস্স ঞাণ’’ন্তি।
863. Natthi puthujjanassa ñāṇanti? Āmantā. Natthi puthujjanassa paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇāti? Na hevaṃ vattabbe…pe… nanu atthi puthujjanassa paññā pajānanā vicayo…pe… paccupalakkhaṇāti? Āmantā. Hañci atthi puthujjanassa paññā pajānanā vicayo…pe… paccupalakkhaṇā, no ca vata re vattabbe – ‘‘natthi puthujjanassa ñāṇa’’nti.
৮৬৪. নত্থি পুথুজ্জনস্স ঞাণন্তি? আমন্তা। পুথুজ্জনো পঠমং ঝানং সমাপজ্জেয্যাতি? আমন্তা। হঞ্চি পুথুজ্জনো পঠমং ঝানং সমাপজ্জেয্য, নো চ ৰত রে ৰত্তব্বে – ‘‘নত্থি পুথুজ্জনস্স ঞাণ’’ন্তি।
864. Natthi puthujjanassa ñāṇanti? Āmantā. Puthujjano paṭhamaṃ jhānaṃ samāpajjeyyāti? Āmantā. Hañci puthujjano paṭhamaṃ jhānaṃ samāpajjeyya, no ca vata re vattabbe – ‘‘natthi puthujjanassa ñāṇa’’nti.
পুথুজ্জনো দুতিযং ঝানং…পে॰… ততিযং ঝানং…পে॰… চতুত্থং ঝানং…পে॰… আকাসানঞ্চাযতনং সমাপজ্জেয্য, ৰিঞ্ঞাণঞ্চাযতনং আকিঞ্চঞ্ঞাযতনং নেৰসঞ্ঞানাসঞ্ঞাযতনং সমাপজ্জেয্য, পুথুজ্জনো দানং দদেয্য …পে॰… চীৰরং দদেয্য, পিণ্ডপাতং দদেয্য, সেনাসনং দদেয্য, গিলানপচ্চযভেসজ্জপরিক্খারং দদেয্যাতি? আমন্তা। হঞ্চি পুথুজ্জনো গিলানপচ্চযভেসজ্জপরিক্খারং দদেয্য, নো চ ৰত রে ৰত্তব্বে – নত্থি পুথুজ্জনস্স ঞাণ’’ন্তি।
Puthujjano dutiyaṃ jhānaṃ…pe… tatiyaṃ jhānaṃ…pe… catutthaṃ jhānaṃ…pe… ākāsānañcāyatanaṃ samāpajjeyya, viññāṇañcāyatanaṃ ākiñcaññāyatanaṃ nevasaññānāsaññāyatanaṃ samāpajjeyya, puthujjano dānaṃ dadeyya …pe… cīvaraṃ dadeyya, piṇḍapātaṃ dadeyya, senāsanaṃ dadeyya, gilānapaccayabhesajjaparikkhāraṃ dadeyyāti? Āmantā. Hañci puthujjano gilānapaccayabhesajjaparikkhāraṃ dadeyya, no ca vata re vattabbe – natthi puthujjanassa ñāṇa’’nti.
৮৬৫. অত্থি পুথুজ্জনস্স ঞাণন্তি? আমন্তা। পুথুজ্জনো তেন ঞাণেন দুক্খং পরিজানাতি , সমুদযং পজহতি, নিরোধং সচ্ছিকরোতি, মগ্গং ভাৰেতীতি? ন হেৰং ৰত্তব্বে…পে॰…।
865. Atthi puthujjanassa ñāṇanti? Āmantā. Puthujjano tena ñāṇena dukkhaṃ parijānāti , samudayaṃ pajahati, nirodhaṃ sacchikaroti, maggaṃ bhāvetīti? Na hevaṃ vattabbe…pe….
ঞাণকথা নিট্ঠিতা।
Ñāṇakathā niṭṭhitā.
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ২. ঞাণকথাৰণ্ণনা • 2. Ñāṇakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ২. ঞাণকথাৰণ্ণনা • 2. Ñāṇakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ২. ঞাণকথাৰণ্ণনা • 2. Ñāṇakathāvaṇṇanā
