| Library / Tipiṭaka / తిపిటక • Tipiṭaka / పఞ్చపకరణ-అట్ఠకథా • Pañcapakaraṇa-aṭṭhakathā |
౪. ఞాణకథావణ్ణనా
4. Ñāṇakathāvaṇṇanā
౬౧౪-౬౧౫. ఇదాని ఞాణకథా నామ హోతి. తత్థ మగ్గఞాణేన అఞ్ఞాణే విగతేపి పున చక్ఖువిఞ్ఞాణాదివసేన ఞాణవిప్పయుత్తచిత్తే వత్తమానే యస్మా తం మగ్గచిత్తం న పవత్తతి, తస్మా ‘‘న వత్తబ్బం ఞాణీ’’తి యేసం లద్ధి, సేయ్యథాపి మహాసంఘికానం; తే సన్ధాయ పుచ్ఛా సకవాదిస్స, పటిఞ్ఞా ఇతరస్స. అథ నం ‘‘యది అఞ్ఞాణే విగతే ‘ఞాణీ’తి పఞ్ఞత్తి న సియా, రాగాదీసు విగతేసు వీతరాగాదిపఞ్ఞత్తిపి న సియాతి పుగ్గలపఞ్ఞత్తియం అకోవిదోసీ’’తి చోదేతుం రాగే విగతేతిఆదిమాహ. ఇతరో తేసు విగతేసు సరాగాదిభావే యుత్తిం అపస్సన్తో పటిక్ఖిపతి. పరియోసానే యస్మా ఞాణపటిలాభేన సో ఞాణీతి వత్తబ్బతం అరహతి, తస్మా న హేవన్తి పటిక్ఖేపో సకవాదిస్సాతి.
614-615. Idāni ñāṇakathā nāma hoti. Tattha maggañāṇena aññāṇe vigatepi puna cakkhuviññāṇādivasena ñāṇavippayuttacitte vattamāne yasmā taṃ maggacittaṃ na pavattati, tasmā ‘‘na vattabbaṃ ñāṇī’’ti yesaṃ laddhi, seyyathāpi mahāsaṃghikānaṃ; te sandhāya pucchā sakavādissa, paṭiññā itarassa. Atha naṃ ‘‘yadi aññāṇe vigate ‘ñāṇī’ti paññatti na siyā, rāgādīsu vigatesu vītarāgādipaññattipi na siyāti puggalapaññattiyaṃ akovidosī’’ti codetuṃ rāge vigatetiādimāha. Itaro tesu vigatesu sarāgādibhāve yuttiṃ apassanto paṭikkhipati. Pariyosāne yasmā ñāṇapaṭilābhena so ñāṇīti vattabbataṃ arahati, tasmā na hevanti paṭikkhepo sakavādissāti.
ఞాణకథావణ్ణనా.
Ñāṇakathāvaṇṇanā.
Related texts:
తిపిటక (మూల) • Tipiṭaka (Mūla) / అభిధమ్మపిటక • Abhidhammapiṭaka / కథావత్థుపాళి • Kathāvatthupāḷi / (౧౦౯) ౪. ఞాణకథా • (109) 4. Ñāṇakathā
టీకా • Tīkā / అభిధమ్మపిటక (టీకా) • Abhidhammapiṭaka (ṭīkā) / పఞ్చపకరణ-మూలటీకా • Pañcapakaraṇa-mūlaṭīkā / ౪. ఞాణకథావణ్ణనా • 4. Ñāṇakathāvaṇṇanā
టీకా • Tīkā / అభిధమ్మపిటక (టీకా) • Abhidhammapiṭaka (ṭīkā) / పఞ్చపకరణ-అనుటీకా • Pañcapakaraṇa-anuṭīkā / ౪. ఞాణకథావణ్ణనా • 4. Ñāṇakathāvaṇṇanā
