| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၂. ဉာဏကထာဝဏ္ဏနာ
2. Ñāṇakathāvaṇṇanā
၈၆၃-၈၆၅. ဣဒာနိ ဉာဏကထာ နာမ ဟောတိ။ တတ္ထ ဒုဝိဓံ ဉာဏံ – လောကိယဉ္စ လောကုတ္တရဉ္စ။ လောကိယံ သမာပတ္တိဉာဏမ္ပိ ဟောတိ ဒာနာဒိဝသေန ပဝတ္တံ ကမ္မသ္သကတဉာဏမ္ပိ; လောကုတ္တရံ သစ္စပရိစ္ဆေဒကံ မဂ္ဂဉာဏမ္ပိ ဖလဉာဏမ္ပိ။ ဣမံ ပန ဝိဘာဂံ အကတ္ဝာ ‘‘သစ္စပရိစ္ဆေဒကမေဝ ဉာဏံ န ဣတရံ, တသ္မာ နတ္ထိ ပုထုဇ္ဇနသ္သ ဉာဏ’’န္တိ ယေသံ လဒ္ဓိ, သေယ္ယထာပိ ဟေတုဝာဒာနံ, တေ သန္ဓာယ ပုစ္ဆာ သကဝာဒိသ္သ, ပဋိညာ ဣတရသ္သ။ ပညာတိအာဒိ ဉာဏဝေဝစနဒသ္သနတ္ထံ ဝုတ္တံ။ တေနေတံ ဒီပေတိ – ယဒိ တသ္သ ဉာဏံ နတ္ထိ, ပညာဒယောပိ နတ္ထိ။ အထ ပညာဒယော အတ္ထိ, ဉာဏမ္ပိ အတ္ထိ။ ကသ္မာ? ပညာဒီနံ ဉာဏတော အနညတ္တာတိ။ ပဌမံ ဈာနန္တိအာဒိ သမာပတ္တိဉာဏသ္သ ဒသ္သနတ္ထံ ဝုတ္တံ။ ဒာနံ ဒဒေယ္ယာတိအာဒိ ကမ္မသ္သကတဉာဏသ္သ။ ဒုက္ခံ ပရိဇာနာတီတိ လောကုတ္တရမဂ္ဂဉာဏမေဝ ဒီပေတိ, န စ လောကုတ္တရမေဝ ဉာဏန္တိ။
863-865. Idāni ñāṇakathā nāma hoti. Tattha duvidhaṃ ñāṇaṃ – lokiyañca lokuttarañca. Lokiyaṃ samāpattiñāṇampi hoti dānādivasena pavattaṃ kammassakatañāṇampi; lokuttaraṃ saccaparicchedakaṃ maggañāṇampi phalañāṇampi. Imaṃ pana vibhāgaṃ akatvā ‘‘saccaparicchedakameva ñāṇaṃ na itaraṃ, tasmā natthi puthujjanassa ñāṇa’’nti yesaṃ laddhi, seyyathāpi hetuvādānaṃ, te sandhāya pucchā sakavādissa, paṭiññā itarassa. Paññātiādi ñāṇavevacanadassanatthaṃ vuttaṃ. Tenetaṃ dīpeti – yadi tassa ñāṇaṃ natthi, paññādayopi natthi. Atha paññādayo atthi, ñāṇampi atthi. Kasmā? Paññādīnaṃ ñāṇato anaññattāti. Paṭhamaṃ jhānantiādi samāpattiñāṇassa dassanatthaṃ vuttaṃ. Dānaṃ dadeyyātiādi kammassakatañāṇassa. Dukkhaṃ parijānātīti lokuttaramaggañāṇameva dīpeti, na ca lokuttarameva ñāṇanti.
ဉာဏကထာဝဏ္ဏနာ။
Ñāṇakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၉၅) ၂. ဉာဏကထာ • (195) 2. Ñāṇakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၂. ဉာဏကထာဝဏ္ဏနာ • 2. Ñāṇakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၂. ဉာဏကထာဝဏ္ဏနာ • 2. Ñāṇakathāvaṇṇanā
