| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၆. ဉာဏကထာဝဏ္ဏနာ
6. Ñāṇakathāvaṇṇanā
၈၇၆-၈၇၇. ဣဒာနိ ဉာဏကထာ နာမ ဟောတိ။ တတ္ထ ဓမ္မစက္ကပ္ပဝတ္တနေ ဒ္ဝာဒသာကာရဉာဏံ သန္ဓာယ ‘‘ဒ္ဝာဒသဝတ္ထုကံ ဉာဏံ လောကုတ္တရ’’န္တိ ယေသံ လဒ္ဓိ, သေယ္ယထာပိ ပုဗ္ဗသေလိယာနံ, တေ သန္ဓာယ ပုစ္ဆာ သကဝာဒိသ္သ, ပဋိညာ ဣတရသ္သ။ အထ နံ ‘‘သစေ တံ ဒ္ဝာဒသဝတ္ထုကံ, ဒ္ဝာဒသဟိ မဂ္ဂဉာဏေဟိ ဘဝိတဗ္ဗ’’န္တိ စောဒေတုံ ဒ္ဝာဒသာတိအာဒိမာဟ။ ဣတရော မဂ္ဂသ္သ ဧကတ္တံ သန္ဓာယ ပဋိက္ခိပတိ, ဧကေကသ္မိံ သစ္စေ သစ္စဉာဏကိစ္စဉာဏကတဉာဏာနံ ဝသေန ဉာဏနာနတ္တံ သန္ဓာယ ပဋိဇာနာတိ။ ဒ္ဝာဒသ သောတာပတ္တိမဂ္ဂာတိအာဒီသုပိ ဧသေဝ နယော။ နနု ဝုတ္တံ ဘဂဝတာတိ သုတ္တံ သဒ္ဓိံ ပုဗ္ဗဘာဂပရဘာဂေဟိ ဉာဏနာနတ္တံ ဒီပေတိ, န အရိယမဂ္ဂသ္သ ဒ္ဝာဒသ ဉာဏတံ။ တသ္မာ အသာဓကန္တိ။
876-877. Idāni ñāṇakathā nāma hoti. Tattha dhammacakkappavattane dvādasākārañāṇaṃ sandhāya ‘‘dvādasavatthukaṃ ñāṇaṃ lokuttara’’nti yesaṃ laddhi, seyyathāpi pubbaseliyānaṃ, te sandhāya pucchā sakavādissa, paṭiññā itarassa. Atha naṃ ‘‘sace taṃ dvādasavatthukaṃ, dvādasahi maggañāṇehi bhavitabba’’nti codetuṃ dvādasātiādimāha. Itaro maggassa ekattaṃ sandhāya paṭikkhipati, ekekasmiṃ sacce saccañāṇakiccañāṇakatañāṇānaṃ vasena ñāṇanānattaṃ sandhāya paṭijānāti. Dvādasa sotāpattimaggātiādīsupi eseva nayo. Nanu vuttaṃ bhagavatāti suttaṃ saddhiṃ pubbabhāgaparabhāgehi ñāṇanānattaṃ dīpeti, na ariyamaggassa dvādasa ñāṇataṃ. Tasmā asādhakanti.
ဉာဏကထာဝဏ္ဏနာ။
Ñāṇakathāvaṇṇanā.
ဝီသတိမော ဝဂ္ဂော။
Vīsatimo vaggo.
စတုတ္ထပဏ္ဏာသကော သမတ္တော။
Catutthapaṇṇāsako samatto.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၉၉) ၆. ဉာဏကထာ • (199) 6. Ñāṇakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၆. ဉာဏကထာဝဏ္ဏနာ • 6. Ñāṇakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၆. ဉာဏကထာဝဏ္ဏနာ • 6. Ñāṇakathāvaṇṇanā
