| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
៩. នវមវគ្គោ
9. Navamavaggo
(៨៨) ៥. ញាណំ អនារម្មណន្តិកថា
(88) 5. Ñāṇaṃ anārammaṇantikathā
៥៥៧. ញាណំ អនារម្មណន្តិ? អាមន្តា។ រូបំ និព្ពានំ ចក្ខាយតនំ…បេ.… ផោដ្ឋព្ពាយតនន្តិ? ន ហេវំ វត្តព្ពេ…បេ.… ញាណំ អនារម្មណន្តិ? អាមន្តា។ បញ្ញា បញ្ញិន្ទ្រិយំ បញ្ញាពលំ សម្មាទិដ្ឋិ ធម្មវិចយសម្ពោជ្ឈង្គោ អនារម្មណោតិ? ន ហេវំ វត្តព្ពេ…បេ.… បញ្ញា បញ្ញិន្ទ្រិយំ បញ្ញាពលំ សម្មាទិដ្ឋិ ធម្មវិចយសម្ពោជ្ឈង្គោ សារម្មណោតិ? អាមន្តា។ ញាណំ សារម្មណន្តិ? ន ហេវំ វត្តព្ពេ…បេ.…។
557. Ñāṇaṃ anārammaṇanti? Āmantā. Rūpaṃ nibbānaṃ cakkhāyatanaṃ…pe… phoṭṭhabbāyatananti? Na hevaṃ vattabbe…pe… ñāṇaṃ anārammaṇanti? Āmantā. Paññā paññindriyaṃ paññābalaṃ sammādiṭṭhi dhammavicayasambojjhaṅgo anārammaṇoti? Na hevaṃ vattabbe…pe… paññā paññindriyaṃ paññābalaṃ sammādiṭṭhi dhammavicayasambojjhaṅgo sārammaṇoti? Āmantā. Ñāṇaṃ sārammaṇanti? Na hevaṃ vattabbe…pe….
ញាណំ អនារម្មណន្តិ? អាមន្តា។ កតមក្ខន្ធបរិយាបន្នន្តិ? សង្ខារក្ខន្ធបរិយាបន្នន្តិ។ សង្ខារក្ខន្ធោ អនារម្មណោតិ? ន ហេវំ វត្តព្ពេ…បេ.… សង្ខារក្ខន្ធោ អនារម្មណោតិ ? អាមន្តា។ វេទនាក្ខន្ធោ សញ្ញាក្ខន្ធោ វិញ្ញាណក្ខន្ធោ អនារម្មណោតិ? ន ហេវំ វត្តព្ពេ…បេ.… ញាណំ សង្ខារក្ខន្ធបរិយាបន្នំ អនារម្មណន្តិ? អាមន្តា។ បញ្ញា សង្ខារក្ខន្ធបរិយាបន្នា អនារម្មណាតិ? ន ហេវំ វត្តព្ពេ…បេ.… បញ្ញា សង្ខារក្ខន្ធបរិយាបន្នា សារម្មណាតិ? អាមន្តា។ ញាណំ សង្ខារក្ខន្ធបរិយាបន្នំ សារម្មណន្តិ? ន ហេវំ វត្តព្ពេ…បេ.…។
Ñāṇaṃ anārammaṇanti? Āmantā. Katamakkhandhapariyāpannanti? Saṅkhārakkhandhapariyāpannanti. Saṅkhārakkhandho anārammaṇoti? Na hevaṃ vattabbe…pe… saṅkhārakkhandho anārammaṇoti ? Āmantā. Vedanākkhandho saññākkhandho viññāṇakkhandho anārammaṇoti? Na hevaṃ vattabbe…pe… ñāṇaṃ saṅkhārakkhandhapariyāpannaṃ anārammaṇanti? Āmantā. Paññā saṅkhārakkhandhapariyāpannā anārammaṇāti? Na hevaṃ vattabbe…pe… paññā saṅkhārakkhandhapariyāpannā sārammaṇāti? Āmantā. Ñāṇaṃ saṅkhārakkhandhapariyāpannaṃ sārammaṇanti? Na hevaṃ vattabbe…pe….
ញាណំ សង្ខារក្ខន្ធបរិយាបន្នំ អនារម្មណំ, បញ្ញា សង្ខារក្ខន្ធបរិយាបន្នា សារម្មណាតិ? អាមន្តា។ សង្ខារក្ខន្ធោ ឯកទេសោ សារម្មណោ ឯកទេសោ អនារម្មណោតិ? ន ហេវំ វត្តព្ពេ…បេ.… សង្ខារក្ខន្ធោ ឯកទេសោ សារម្មណោ ឯកទេសោ អនារម្មណោតិ? អាមន្តា។ វេទនាក្ខន្ធោ សញ្ញាក្ខន្ធោ វិញ្ញាណក្ខន្ធោ ឯកទេសោ សារម្មណោ ឯកទេសោ អនារម្មណោតិ? ន ហេវំ វត្តព្ពេ…បេ.…។
Ñāṇaṃ saṅkhārakkhandhapariyāpannaṃ anārammaṇaṃ, paññā saṅkhārakkhandhapariyāpannā sārammaṇāti? Āmantā. Saṅkhārakkhandho ekadeso sārammaṇo ekadeso anārammaṇoti? Na hevaṃ vattabbe…pe… saṅkhārakkhandho ekadeso sārammaṇo ekadeso anārammaṇoti? Āmantā. Vedanākkhandho saññākkhandho viññāṇakkhandho ekadeso sārammaṇo ekadeso anārammaṇoti? Na hevaṃ vattabbe…pe….
៥៥៨. ន វត្តព្ពំ – ‘‘ញាណំ អនារម្មណ’’ន្តិ? អាមន្តា។ អរហា ចក្ខុវិញ្ញាណសមង្គី ញាណីតិ វត្តព្ពោតិ? អាមន្តា។ អត្ថិ តស្ស ញាណស្ស អារម្មណន្តិ? ន ហេវំ វត្តព្ពេ…បេ.… តេន ហិ ញាណំ អនារម្មណន្តិ។ អរហា ចក្ខុវិញ្ញាណសមង្គី បញ្ញវាតិ វត្តព្ពោតិ? អាមន្តា។ អត្ថិ តាយ បញ្ញាយ អារម្មណន្តិ? ន ហេវំ វត្តព្ពេ…បេ.…។ តេន ហិ បញ្ញា អនារម្មណាតិ។
558. Na vattabbaṃ – ‘‘ñāṇaṃ anārammaṇa’’nti? Āmantā. Arahā cakkhuviññāṇasamaṅgī ñāṇīti vattabboti? Āmantā. Atthi tassa ñāṇassa ārammaṇanti? Na hevaṃ vattabbe…pe… tena hi ñāṇaṃ anārammaṇanti. Arahā cakkhuviññāṇasamaṅgī paññavāti vattabboti? Āmantā. Atthi tāya paññāya ārammaṇanti? Na hevaṃ vattabbe…pe…. Tena hi paññā anārammaṇāti.
ញាណំ អនារម្មណន្តិកថា និដ្ឋិតា។
Ñāṇaṃ anārammaṇantikathā niṭṭhitā.
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៥. ញាណំ អនារម្មណន្តិកថាវណ្ណនា • 5. Ñāṇaṃ anārammaṇantikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៥. ញាណំអនារម្មណន្តិកថាវណ្ណនា • 5. Ñāṇaṃanārammaṇantikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៥. ញាណំអនារម្មណន្តិកថាវណ្ណនា • 5. Ñāṇaṃanārammaṇantikathāvaṇṇanā
