| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
9. නවමවග්‌ගො
9. Navamavaggo
(88) 5. ඤාණං අනාරම්‌මණන්‌තිකථා
(88) 5. Ñāṇaṃ anārammaṇantikathā
557. ඤාණං අනාරම්‌මණන්‌ති? ආමන්‌තා. රූපං නිබ්‌බානං චක්‌ඛායතනං…පෙ.… ඵොට්‌ඨබ්‌බායතනන්‌ති? න හෙවං වත්‌තබ්‌බෙ…පෙ.… ඤාණං අනාරම්‌මණන්‌ති? ආමන්‌තා. පඤ්‌ඤා පඤ්‌ඤින්‌ද්‍රියං පඤ්‌ඤාබලං සම්‌මාදිට්‌ඨි ධම්‌මවිචයසම්‌බොජ්‌ඣඞ්‌ගො අනාරම්‌මණොති? න හෙවං වත්‌තබ්‌බෙ…පෙ.… පඤ්‌ඤා පඤ්‌ඤින්‌ද්‍රියං පඤ්‌ඤාබලං සම්‌මාදිට්‌ඨි ධම්‌මවිචයසම්‌බොජ්‌ඣඞ්‌ගො සාරම්‌මණොති? ආමන්‌තා. ඤාණං සාරම්‌මණන්‌ති? න හෙවං වත්‌තබ්‌බෙ…පෙ.….
557. Ñāṇaṃ anārammaṇanti? Āmantā. Rūpaṃ nibbānaṃ cakkhāyatanaṃ…pe… phoṭṭhabbāyatananti? Na hevaṃ vattabbe…pe… ñāṇaṃ anārammaṇanti? Āmantā. Paññā paññindriyaṃ paññābalaṃ sammādiṭṭhi dhammavicayasambojjhaṅgo anārammaṇoti? Na hevaṃ vattabbe…pe… paññā paññindriyaṃ paññābalaṃ sammādiṭṭhi dhammavicayasambojjhaṅgo sārammaṇoti? Āmantā. Ñāṇaṃ sārammaṇanti? Na hevaṃ vattabbe…pe….
ඤාණං අනාරම්‌මණන්‌ති? ආමන්‌තා. කතමක්‌ඛන්‌ධපරියාපන්‌නන්‌ති? සඞ්‌ඛාරක්‌ඛන්‌ධපරියාපන්‌නන්‌ති. සඞ්‌ඛාරක්‌ඛන්‌ධො අනාරම්‌මණොති? න හෙවං වත්‌තබ්‌බෙ…පෙ.… සඞ්‌ඛාරක්‌ඛන්‌ධො අනාරම්‌මණොති ? ආමන්‌තා. වෙදනාක්‌ඛන්‌ධො සඤ්‌ඤාක්‌ඛන්‌ධො විඤ්‌ඤාණක්‌ඛන්‌ධො අනාරම්‌මණොති? න හෙවං වත්‌තබ්‌බෙ…පෙ.… ඤාණං සඞ්‌ඛාරක්‌ඛන්‌ධපරියාපන්‌නං අනාරම්‌මණන්‌ති? ආමන්‌තා. පඤ්‌ඤා සඞ්‌ඛාරක්‌ඛන්‌ධපරියාපන්‌නා අනාරම්‌මණාති? න හෙවං වත්‌තබ්‌බෙ…පෙ.… පඤ්‌ඤා සඞ්‌ඛාරක්‌ඛන්‌ධපරියාපන්‌නා සාරම්‌මණාති? ආමන්‌තා. ඤාණං සඞ්‌ඛාරක්‌ඛන්‌ධපරියාපන්‌නං සාරම්‌මණන්‌ති? න හෙවං වත්‌තබ්‌බෙ…පෙ.….
Ñāṇaṃ anārammaṇanti? Āmantā. Katamakkhandhapariyāpannanti? Saṅkhārakkhandhapariyāpannanti. Saṅkhārakkhandho anārammaṇoti? Na hevaṃ vattabbe…pe… saṅkhārakkhandho anārammaṇoti ? Āmantā. Vedanākkhandho saññākkhandho viññāṇakkhandho anārammaṇoti? Na hevaṃ vattabbe…pe… ñāṇaṃ saṅkhārakkhandhapariyāpannaṃ anārammaṇanti? Āmantā. Paññā saṅkhārakkhandhapariyāpannā anārammaṇāti? Na hevaṃ vattabbe…pe… paññā saṅkhārakkhandhapariyāpannā sārammaṇāti? Āmantā. Ñāṇaṃ saṅkhārakkhandhapariyāpannaṃ sārammaṇanti? Na hevaṃ vattabbe…pe….
ඤාණං සඞ්‌ඛාරක්‌ඛන්‌ධපරියාපන්‌නං අනාරම්‌මණං, පඤ්‌ඤා සඞ්‌ඛාරක්‌ඛන්‌ධපරියාපන්‌නා සාරම්‌මණාති? ආමන්‌තා. සඞ්‌ඛාරක්‌ඛන්‌ධො එකදෙසො සාරම්‌මණො එකදෙසො අනාරම්‌මණොති? න හෙවං වත්‌තබ්‌බෙ…පෙ.… සඞ්‌ඛාරක්‌ඛන්‌ධො එකදෙසො සාරම්‌මණො එකදෙසො අනාරම්‌මණොති? ආමන්‌තා. වෙදනාක්‌ඛන්‌ධො සඤ්‌ඤාක්‌ඛන්‌ධො විඤ්‌ඤාණක්‌ඛන්‌ධො එකදෙසො සාරම්‌මණො එකදෙසො අනාරම්‌මණොති? න හෙවං වත්‌තබ්‌බෙ…පෙ.….
Ñāṇaṃ saṅkhārakkhandhapariyāpannaṃ anārammaṇaṃ, paññā saṅkhārakkhandhapariyāpannā sārammaṇāti? Āmantā. Saṅkhārakkhandho ekadeso sārammaṇo ekadeso anārammaṇoti? Na hevaṃ vattabbe…pe… saṅkhārakkhandho ekadeso sārammaṇo ekadeso anārammaṇoti? Āmantā. Vedanākkhandho saññākkhandho viññāṇakkhandho ekadeso sārammaṇo ekadeso anārammaṇoti? Na hevaṃ vattabbe…pe….
558. න වත්‌තබ්‌බං – ‘‘ඤාණං අනාරම්‌මණ’’න්‌ති? ආමන්‌තා. අරහා චක්‌ඛුවිඤ්‌ඤාණසමඞ්‌ගී ඤාණීති වත්‌තබ්‌බොති? ආමන්‌තා. අත්‌ථි තස්‌ස ඤාණස්‌ස ආරම්‌මණන්‌ති? න හෙවං වත්‌තබ්‌බෙ…පෙ.… තෙන හි ඤාණං අනාරම්‌මණන්‌ති. අරහා චක්‌ඛුවිඤ්‌ඤාණසමඞ්‌ගී පඤ්‌ඤවාති වත්‌තබ්‌බොති? ආමන්‌තා. අත්‌ථි තාය පඤ්‌ඤාය ආරම්‌මණන්‌ති? න හෙවං වත්‌තබ්‌බෙ…පෙ.…. තෙන හි පඤ්‌ඤා අනාරම්‌මණාති.
558. Na vattabbaṃ – ‘‘ñāṇaṃ anārammaṇa’’nti? Āmantā. Arahā cakkhuviññāṇasamaṅgī ñāṇīti vattabboti? Āmantā. Atthi tassa ñāṇassa ārammaṇanti? Na hevaṃ vattabbe…pe… tena hi ñāṇaṃ anārammaṇanti. Arahā cakkhuviññāṇasamaṅgī paññavāti vattabboti? Āmantā. Atthi tāya paññāya ārammaṇanti? Na hevaṃ vattabbe…pe…. Tena hi paññā anārammaṇāti.
ඤාණං අනාරම්‌මණන්‌තිකථා නිට්‌ඨිතා.
Ñāṇaṃ anārammaṇantikathā niṭṭhitā.
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 5. ඤාණං අනාරම්‌මණන්‌තිකථාවණ්‌ණනා • 5. Ñāṇaṃ anārammaṇantikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 5. ඤාණංඅනාරම්‌මණන්‌තිකථාවණ්‌ණනා • 5. Ñāṇaṃanārammaṇantikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 5. ඤාණංඅනාරම්‌මණන්‌තිකථාවණ්‌ණනා • 5. Ñāṇaṃanārammaṇantikathāvaṇṇanā
