| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១១. ឯកាទសមវគ្គោ
11. Ekādasamavaggo
(១១០) ៥. ញាណំ ចិត្តវិប្បយុត្តន្តិកថា
(110) 5. Ñāṇaṃ cittavippayuttantikathā
៦១៦. ញាណំ ចិត្តវិប្បយុត្តន្តិ? អាមន្តា។ រូបំ និព្ពានំ ចក្ខាយតនំ…បេ.… ផោដ្ឋព្ពាយតនន្តិ? ន ហេវំ វត្តព្ពេ…បេ.… ញាណំ ចិត្តវិប្បយុត្តន្តិ? អាមន្តា។ បញ្ញា បញ្ញិន្ទ្រិយំ បញ្ញាពលំ សម្មាទិដ្ឋិ ធម្មវិចយសម្ពោជ្ឈង្គោ ចិត្តវិប្បយុត្តោតិ? ន ហេវំ វត្តព្ពេ…បេ.… បញ្ញា បញ្ញិន្ទ្រិយំ បញ្ញាពលំ សម្មាទិដ្ឋិ ធម្មវិចយសម្ពោជ្ឈង្គោ ចិត្តសម្បយុត្តោតិ? អាមន្តា។ ញាណំ ចិត្តសម្បយុត្តន្តិ? ន ហេវំ វត្តព្ពេ…បេ.…។
616. Ñāṇaṃ cittavippayuttanti? Āmantā. Rūpaṃ nibbānaṃ cakkhāyatanaṃ…pe… phoṭṭhabbāyatananti? Na hevaṃ vattabbe…pe… ñāṇaṃ cittavippayuttanti? Āmantā. Paññā paññindriyaṃ paññābalaṃ sammādiṭṭhi dhammavicayasambojjhaṅgo cittavippayuttoti? Na hevaṃ vattabbe…pe… paññā paññindriyaṃ paññābalaṃ sammādiṭṭhi dhammavicayasambojjhaṅgo cittasampayuttoti? Āmantā. Ñāṇaṃ cittasampayuttanti? Na hevaṃ vattabbe…pe….
ញាណំ ចិត្តវិប្បយុត្តន្តិ? អាមន្តា។ កតមក្ខន្ធបរិយាបន្នន្តិ ? សង្ខារក្ខន្ធបរិយាបន្នន្តិ។ សង្ខារក្ខន្ធោ ចិត្តវិប្បយុត្តោតិ? ន ហេវំ វត្តព្ពេ…បេ.… សង្ខារក្ខន្ធោ ចិត្តវិប្បយុត្តោតិ? អាមន្តា។ វេទនាក្ខន្ធោ សញ្ញាក្ខន្ធោ ចិត្តវិប្បយុត្តោតិ? ន ហេវំ វត្តព្ពេ…បេ.… ញាណំ សង្ខារក្ខន្ធបរិយាបន្នំ ចិត្តវិប្បយុត្តន្តិ? អាមន្តា។ បញ្ញា សង្ខារក្ខន្ធបរិយាបន្នា ចិត្តវិប្បយុត្តាតិ? ន ហេវំ វត្តព្ពេ…បេ.… បញ្ញា សង្ខារក្ខន្ធបរិយាបន្នា ចិត្តសម្បយុត្តាតិ? អាមន្តា។ ញាណំ សង្ខារក្ខន្ធបរិយាបន្នំ ចិត្តសម្បយុត្តន្តិ? ន ហេវំ វត្តព្ពេ…បេ.… ញាណំ សង្ខារក្ខន្ធបរិយាបន្នំ ចិត្តវិប្បយុត្តំ, បញ្ញា សង្ខារក្ខន្ធបរិយាបន្នា ចិត្តសម្បយុត្តាតិ? អាមន្តា។ សង្ខារក្ខន្ធោ ឯកទេសោ ចិត្តសម្បយុត្តោ ឯកទេសោ ចិត្តវិប្បយុត្តោតិ? ន ហេវំ វត្តព្ពេ…បេ.… សង្ខារក្ខន្ធោ ឯកទេសោ ចិត្តសម្បយុត្តោ ឯកទេសោ ចិត្តវិប្បយុត្តោតិ? អាមន្តា។ វេទនាក្ខន្ធោ សញ្ញាក្ខន្ធោ ឯកទេសោ ចិត្តសម្បយុត្តោ ឯកទេសោ ចិត្តវិប្បយុត្តោតិ? ន ហេវំ វត្តព្ពេ…បេ.…។
Ñāṇaṃ cittavippayuttanti? Āmantā. Katamakkhandhapariyāpannanti ? Saṅkhārakkhandhapariyāpannanti. Saṅkhārakkhandho cittavippayuttoti? Na hevaṃ vattabbe…pe… saṅkhārakkhandho cittavippayuttoti? Āmantā. Vedanākkhandho saññākkhandho cittavippayuttoti? Na hevaṃ vattabbe…pe… ñāṇaṃ saṅkhārakkhandhapariyāpannaṃ cittavippayuttanti? Āmantā. Paññā saṅkhārakkhandhapariyāpannā cittavippayuttāti? Na hevaṃ vattabbe…pe… paññā saṅkhārakkhandhapariyāpannā cittasampayuttāti? Āmantā. Ñāṇaṃ saṅkhārakkhandhapariyāpannaṃ cittasampayuttanti? Na hevaṃ vattabbe…pe… ñāṇaṃ saṅkhārakkhandhapariyāpannaṃ cittavippayuttaṃ, paññā saṅkhārakkhandhapariyāpannā cittasampayuttāti? Āmantā. Saṅkhārakkhandho ekadeso cittasampayutto ekadeso cittavippayuttoti? Na hevaṃ vattabbe…pe… saṅkhārakkhandho ekadeso cittasampayutto ekadeso cittavippayuttoti? Āmantā. Vedanākkhandho saññākkhandho ekadeso cittasampayutto ekadeso cittavippayuttoti? Na hevaṃ vattabbe…pe….
៦១៧. ន វត្តព្ពំ – ‘‘ញាណំ ចិត្តវិប្បយុត្ត’’ន្តិ? អាមន្តា។ អរហា ចក្ខុវិញ្ញាណសមង្គី ‘‘ញាណី’’តិ វត្តព្ពោតិ? អាមន្តា។ ញាណំ តេន ចិត្តេន សម្បយុត្តន្តិ? ន ហេវំ វត្តព្ពេ។ តេន ហិ ញាណំ ចិត្តវិប្បយុត្តន្តិ។
617. Na vattabbaṃ – ‘‘ñāṇaṃ cittavippayutta’’nti? Āmantā. Arahā cakkhuviññāṇasamaṅgī ‘‘ñāṇī’’ti vattabboti? Āmantā. Ñāṇaṃ tena cittena sampayuttanti? Na hevaṃ vattabbe. Tena hi ñāṇaṃ cittavippayuttanti.
អរហា ចក្ខុវិញ្ញាណសមង្គី ‘‘បញ្ញវា’’តិ វត្តព្ពោតិ 1? អាមន្តា។ បញ្ញា តេន ចិត្តេន សម្បយុត្តាតិ? ន ហេវំ វត្តព្ពេ។ តេន ហិ បញ្ញា ចិត្តវិប្បយុត្តាតិ។
Arahā cakkhuviññāṇasamaṅgī ‘‘paññavā’’ti vattabboti 2? Āmantā. Paññā tena cittena sampayuttāti? Na hevaṃ vattabbe. Tena hi paññā cittavippayuttāti.
ញាណំ ចិត្តវិប្បយុត្តន្តិកថា និដ្ឋិតា។
Ñāṇaṃ cittavippayuttantikathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៥. ញាណំ ចិត្តវិប្បយុត្តន្តិកថាវណ្ណនា • 5. Ñāṇaṃ cittavippayuttantikathāvaṇṇanā
