| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၁. ဧကာဒသမဝဂ္ဂော
11. Ekādasamavaggo
(၁၁၀) ၅. ဉာဏံ စိတ္တဝိပ္ပယုတ္တန္တိကထာ
(110) 5. Ñāṇaṃ cittavippayuttantikathā
၆၁၆. ဉာဏံ စိတ္တဝိပ္ပယုတ္တန္တိ? အာမန္တာ။ ရူပံ နိဗ္ဗာနံ စက္ခာယတနံ။ပေ.။ ဖောဋ္ဌဗ္ဗာယတနန္တိ? န ဟေဝံ ဝတ္တဗ္ဗေ။ပေ.။ ဉာဏံ စိတ္တဝိပ္ပယုတ္တန္တိ? အာမန္တာ။ ပညာ ပညိန္ဒ္ရိယံ ပညာဗလံ သမ္မာဒိဋ္ဌိ ဓမ္မဝိစယသမ္ဗောဇ္ဈင္ဂော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ.။ ပညာ ပညိန္ဒ္ရိယံ ပညာဗလံ သမ္မာဒိဋ္ဌိ ဓမ္မဝိစယသမ္ဗောဇ္ဈင္ဂော စိတ္တသမ္ပယုတ္တောတိ? အာမန္တာ။ ဉာဏံ စိတ္တသမ္ပယုတ္တန္တိ? န ဟေဝံ ဝတ္တဗ္ဗေ။ပေ.။။
616. Ñāṇaṃ cittavippayuttanti? Āmantā. Rūpaṃ nibbānaṃ cakkhāyatanaṃ…pe… phoṭṭhabbāyatananti? Na hevaṃ vattabbe…pe… ñāṇaṃ cittavippayuttanti? Āmantā. Paññā paññindriyaṃ paññābalaṃ sammādiṭṭhi dhammavicayasambojjhaṅgo cittavippayuttoti? Na hevaṃ vattabbe…pe… paññā paññindriyaṃ paññābalaṃ sammādiṭṭhi dhammavicayasambojjhaṅgo cittasampayuttoti? Āmantā. Ñāṇaṃ cittasampayuttanti? Na hevaṃ vattabbe…pe….
ဉာဏံ စိတ္တဝိပ္ပယုတ္တန္တိ? အာမန္တာ။ ကတမက္ခန္ဓပရိယာပန္နန္တိ ? သင္ခာရက္ခန္ဓပရိယာပန္နန္တိ။ သင္ခာရက္ခန္ဓော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ.။ သင္ခာရက္ခန္ဓော စိတ္တဝိပ္ပယုတ္တောတိ? အာမန္တာ။ ဝေဒနာက္ခန္ဓော သညာက္ခန္ဓော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ.။ ဉာဏံ သင္ခာရက္ခန္ဓပရိယာပန္နံ စိတ္တဝိပ္ပယုတ္တန္တိ? အာမန္တာ။ ပညာ သင္ခာရက္ခန္ဓပရိယာပန္နာ စိတ္တဝိပ္ပယုတ္တာတိ? န ဟေဝံ ဝတ္တဗ္ဗေ။ပေ.။ ပညာ သင္ခာရက္ခန္ဓပရိယာပန္နာ စိတ္တသမ္ပယုတ္တာတိ? အာမန္တာ။ ဉာဏံ သင္ခာရက္ခန္ဓပရိယာပန္နံ စိတ္တသမ္ပယုတ္တန္တိ? န ဟေဝံ ဝတ္တဗ္ဗေ။ပေ.။ ဉာဏံ သင္ခာရက္ခန္ဓပရိယာပန္နံ စိတ္တဝိပ္ပယုတ္တံ, ပညာ သင္ခာရက္ခန္ဓပရိယာပန္နာ စိတ္တသမ္ပယုတ္တာတိ? အာမန္တာ။ သင္ခာရက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ.။ သင္ခာရက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? အာမန္တာ။ ဝေဒနာက္ခန္ဓော သညာက္ခန္ဓော ဧကဒေသော စိတ္တသမ္ပယုတ္တော ဧကဒေသော စိတ္တဝိပ္ပယုတ္တောတိ? န ဟေဝံ ဝတ္တဗ္ဗေ။ပေ.။။
Ñāṇaṃ cittavippayuttanti? Āmantā. Katamakkhandhapariyāpannanti ? Saṅkhārakkhandhapariyāpannanti. Saṅkhārakkhandho cittavippayuttoti? Na hevaṃ vattabbe…pe… saṅkhārakkhandho cittavippayuttoti? Āmantā. Vedanākkhandho saññākkhandho cittavippayuttoti? Na hevaṃ vattabbe…pe… ñāṇaṃ saṅkhārakkhandhapariyāpannaṃ cittavippayuttanti? Āmantā. Paññā saṅkhārakkhandhapariyāpannā cittavippayuttāti? Na hevaṃ vattabbe…pe… paññā saṅkhārakkhandhapariyāpannā cittasampayuttāti? Āmantā. Ñāṇaṃ saṅkhārakkhandhapariyāpannaṃ cittasampayuttanti? Na hevaṃ vattabbe…pe… ñāṇaṃ saṅkhārakkhandhapariyāpannaṃ cittavippayuttaṃ, paññā saṅkhārakkhandhapariyāpannā cittasampayuttāti? Āmantā. Saṅkhārakkhandho ekadeso cittasampayutto ekadeso cittavippayuttoti? Na hevaṃ vattabbe…pe… saṅkhārakkhandho ekadeso cittasampayutto ekadeso cittavippayuttoti? Āmantā. Vedanākkhandho saññākkhandho ekadeso cittasampayutto ekadeso cittavippayuttoti? Na hevaṃ vattabbe…pe….
၆၁၇. န ဝတ္တဗ္ဗံ – ‘‘ဉာဏံ စိတ္တဝိပ္ပယုတ္တ’’န္တိ? အာမန္တာ။ အရဟာ စက္ခုဝိညာဏသမင္ဂီ ‘‘ဉာဏီ’’တိ ဝတ္တဗ္ဗောတိ? အာမန္တာ။ ဉာဏံ တေန စိတ္တေန သမ္ပယုတ္တန္တိ? န ဟေဝံ ဝတ္တဗ္ဗေ။ တေန ဟိ ဉာဏံ စိတ္တဝိပ္ပယုတ္တန္တိ။
617. Na vattabbaṃ – ‘‘ñāṇaṃ cittavippayutta’’nti? Āmantā. Arahā cakkhuviññāṇasamaṅgī ‘‘ñāṇī’’ti vattabboti? Āmantā. Ñāṇaṃ tena cittena sampayuttanti? Na hevaṃ vattabbe. Tena hi ñāṇaṃ cittavippayuttanti.
အရဟာ စက္ခုဝိညာဏသမင္ဂီ ‘‘ပညဝာ’’တိ ဝတ္တဗ္ဗောတိ 1? အာမန္တာ။ ပညာ တေန စိတ္တေန သမ္ပယုတ္တာတိ? န ဟေဝံ ဝတ္တဗ္ဗေ။ တေန ဟိ ပညာ စိတ္တဝိပ္ပယုတ္တာတိ။
Arahā cakkhuviññāṇasamaṅgī ‘‘paññavā’’ti vattabboti 2? Āmantā. Paññā tena cittena sampayuttāti? Na hevaṃ vattabbe. Tena hi paññā cittavippayuttāti.
ဉာဏံ စိတ္တဝိပ္ပယုတ္တန္တိကထာ နိဋ္ဌိတာ။
Ñāṇaṃ cittavippayuttantikathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၅. ဉာဏံ စိတ္တဝိပ္ပယုတ္တန္တိကထာဝဏ္ဏနာ • 5. Ñāṇaṃ cittavippayuttantikathāvaṇṇanā
