| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
6. ஞாணராஸிச²க்கனித்³தே³ஸவண்ணனா
6. Ñāṇarāsichakkaniddesavaṇṇanā
183. இதா³னி ச²ஹி ராஸீஹி உத்³தி³ட்ட²ஞாணேஸு சதுவீஸதிஸமாதி⁴ஞாணனித்³தே³ஸே தாவ காயானுபஸ்ஸனாதீ³னங் திண்ணங் சதுக்கானங் வஸேன த்³வாத³ஸன்னங் வத்தூ²னங் ஏகேகஸ்மிங் அஸ்ஸாஸவஸேன ஏகோ , பஸ்ஸாஸவஸேன ஏகோதி த்³வே த்³வே ஸமாதீ⁴தி த்³வாத³ஸஸு வத்தூ²ஸு சதுவீஸதி ஸமாத⁴யோ ஹொந்தி. ஜா²னக்க²ணே தேஹி ஸம்பயுத்தானி சதுவீஸதிஸமாதி⁴வஸேன ஞாணானி.
183. Idāni chahi rāsīhi uddiṭṭhañāṇesu catuvīsatisamādhiñāṇaniddese tāva kāyānupassanādīnaṃ tiṇṇaṃ catukkānaṃ vasena dvādasannaṃ vatthūnaṃ ekekasmiṃ assāsavasena eko , passāsavasena ekoti dve dve samādhīti dvādasasu vatthūsu catuvīsati samādhayo honti. Jhānakkhaṇe tehi sampayuttāni catuvīsatisamādhivasena ñāṇāni.
த்³வாஸத்ததிவிபஸ்ஸனாஞாணனித்³தே³ஸே தீ³க⁴ங் அஸ்ஸாஸாதி ‘‘தீ³க⁴’’ந்திவுத்தஅஸ்ஸாஸதோ. கிங் வுத்தங் ஹோதி? தீ³க⁴ங் அஸ்ஸாஸஹேது ஜா²னங் படிலபி⁴த்வா ஸமாஹிதேன சித்தேன விபஸ்ஸனாக்க²ணே அனிச்சதோ அனுபஸ்ஸனட்டே²ன விபஸ்ஸனாதி வுத்தங் ஹோதி. ஏஸ நயோ உத்தரத்ராபி. தேஸங்யேவ த்³வாத³ஸன்னங் வத்தூ²னங் ஏகேகஸ்மிங் அஸ்ஸாஸவஸேன திஸ்ஸோ, பஸ்ஸாஸவஸேன திஸ்ஸோதி ச² ச² அனுபஸ்ஸனாதி த்³வாத³ஸஸு வத்தூ²ஸு த்³வாஸத்ததி அனுபஸ்ஸனா ஹொந்தி. தா ஏவ த்³வாஸத்ததி அனுபஸ்ஸனா த்³வாஸத்ததிவிபஸ்ஸனாவஸேன ஞாணானி.
Dvāsattativipassanāñāṇaniddese dīghaṃ assāsāti ‘‘dīgha’’ntivuttaassāsato. Kiṃ vuttaṃ hoti? Dīghaṃ assāsahetu jhānaṃ paṭilabhitvā samāhitena cittena vipassanākkhaṇe aniccato anupassanaṭṭhena vipassanāti vuttaṃ hoti. Esa nayo uttaratrāpi. Tesaṃyeva dvādasannaṃ vatthūnaṃ ekekasmiṃ assāsavasena tisso, passāsavasena tissoti cha cha anupassanāti dvādasasu vatthūsu dvāsattati anupassanā honti. Tā eva dvāsattati anupassanā dvāsattativipassanāvasena ñāṇāni.
நிப்³பி³தா³ஞாணனித்³தே³ஸே அனிச்சானுபஸ்ஸீ அஸ்ஸஸந்தி அனிச்சானுபஸ்ஸீ ஹுத்வா அஸ்ஸஸந்தோ, அனிச்சானுபஸ்ஸீ ஹுத்வா வத்தெந்தோதி அத்தோ². ‘‘அஸ்ஸஸ’’ந்தி ச இத³ங் வசனங் ஹேதுஅத்தே² த³ட்ட²ப்³ப³ங். யதா²பூ⁴தங் ஜானாதி பஸ்ஸதீதி நிப்³பி³தா³ஞாணந்தி கலாபஸம்மஸனதோ பட்டா²ய யாவ ப⁴ங்கா³னுபஸ்ஸனா பவத்தவிபஸ்ஸனாஞாணேன ஸங்கா²ரானங் யதா²ஸபா⁴வங் ஜானாதி, சக்கு²னா தி³ட்ட²மிவ ச தேனேவ ஞாணசக்கு²னா பஸ்ஸதி. தஸ்மா நிப்³பி³தா³ஞாணங் நாமாதி அத்தோ², ஸங்கா²ரேஸு நிப்³பி³ந்த³ஞாணங் நாமாதி வுத்தங் ஹோதி. உபரி ப⁴யதூபட்டா²னாதீ³னங் முஞ்சிதுகம்யதாதீ³னஞ்ச ஞாணானங் விஸுங் ஆக³தத்தா இத⁴ யதா²வுத்தானேவ விபஸ்ஸனாஞாணானி நிப்³பி³தா³ஞாணானீதி வேதி³தப்³பா³னி.
Nibbidāñāṇaniddese aniccānupassī assasanti aniccānupassī hutvā assasanto, aniccānupassī hutvā vattentoti attho. ‘‘Assasa’’nti ca idaṃ vacanaṃ hetuatthe daṭṭhabbaṃ. Yathābhūtaṃ jānāti passatīti nibbidāñāṇanti kalāpasammasanato paṭṭhāya yāva bhaṅgānupassanā pavattavipassanāñāṇena saṅkhārānaṃ yathāsabhāvaṃ jānāti, cakkhunā diṭṭhamiva ca teneva ñāṇacakkhunā passati. Tasmā nibbidāñāṇaṃ nāmāti attho, saṅkhāresu nibbindañāṇaṃ nāmāti vuttaṃ hoti. Upari bhayatūpaṭṭhānādīnaṃ muñcitukamyatādīnañca ñāṇānaṃ visuṃ āgatattā idha yathāvuttāneva vipassanāñāṇāni nibbidāñāṇānīti veditabbāni.
நிப்³பி³தா³னுலோமஞாணனித்³தே³ஸே அனிச்சானுபஸ்ஸீ அஸ்ஸஸந்தி அனிச்சானுபஸ்ஸினோ அஸ்ஸஸந்தஸ்ஸ. ஸாமிஅத்தே² பச்சத்தவசனங். ப⁴யதுபட்டா²னே பஞ்ஞாதிவசனேனேவ ப⁴யதுபட்டா²னஆதீ³னவானுபஸ்ஸனானிப்³பி³தா³னுபஸ்ஸனாஞாணானி வுத்தானி ஹொந்தி திண்ணங் ஏகலக்க²ணத்தா. இமானி தீணி ஞாணானி அனந்தரா வுத்தானங் நிப்³பி³தா³ஞாணானங் அனுகூலபா⁴வேன அனுலோமதோ நிப்³பி³தா³னுலோமஞாணானீதி வுத்தானி.
Nibbidānulomañāṇaniddese aniccānupassī assasanti aniccānupassino assasantassa. Sāmiatthe paccattavacanaṃ. Bhayatupaṭṭhāne paññātivacaneneva bhayatupaṭṭhānaādīnavānupassanānibbidānupassanāñāṇāni vuttāni honti tiṇṇaṃ ekalakkhaṇattā. Imāni tīṇi ñāṇāni anantarā vuttānaṃ nibbidāñāṇānaṃ anukūlabhāvena anulomato nibbidānulomañāṇānīti vuttāni.
நிப்³பி³தா³படிப்பஸ்ஸத்³தி⁴ஞாணனித்³தே³ஸே அனிச்சானுபஸ்ஸீ அஸ்ஸஸந்தி அனந்தரஸதி³ஸமேவ. படிஸங்கா² ஸந்திட்ட²னா பஞ்ஞாதிவசனேனேவ முஞ்சிதுகம்யதாபடிஸங்கா²னுபஸ்ஸனாஸங்கா²ருபெக்கா²ஞாணானி வுத்தானி ஹொந்தி திண்ணங் ஏகலக்க²ணத்தா. ‘‘படிஸங்கா² ஸந்திட்ட²னா’’திவசனேனேவ அனுலோமஞாணமக்³க³ஞாணானிபி க³ஹிதானி ஹொந்தி . ஸங்கா²ருபெக்கா²ஞாணஅனுலோமஞாணானிபி ஹி நிப்³பி³தா³ய ஸிகா²ப்பத்தத்தா நிப்³பி³தா³ஜனநப்³யாபாரப்பஹானேன நிப்³பி³தா³படிப்பஸ்ஸத்³தி⁴ஞாணானி நாம ஹொந்தி. மக்³க³ஞாணங் பன நிப்³பி³தா³படிப்பஸ்ஸத்³த⁴ந்தே உப்பஜ்ஜனதோ நிப்³பி³தா³படிப்பஸ்ஸத்³தி⁴ஞாணங் நாம ஹோதீதி அதிவிய யுஜ்ஜதீதி. நிப்³பி³தா³னுலோமஞாணேஸு விய ஆதி³பூ⁴தங் முஞ்சிதுகம்யதாஞாணங் அக்³க³ஹெத்வா ‘‘படிஸங்கா² ஸந்திட்ட²னா’’தி அந்தே ஞாணத்³வயக்³க³ஹணங் மக்³க³ஞாணஸங்க³ஹணத்த²ங். முஞ்சிதுகம்யதாதி ஹி வுத்தே அனுலோமஞாணங் ஸங்க³ய்ஹதி, ந மக்³க³ஞாணங். மக்³க³ஞாணஞ்ஹி முஞ்சிதுகம்யதா நாம ந ஹோதி, கிச்சஸித்³தி⁴யங் ஸந்திட்ட²னதோ பன ஸந்திட்ட²னா நாம ஹோதி. அட்ட²கதா²யம்பி ச ‘‘பு²ஸனாதி அப்பனா’’தி வுத்தங். இத³ஞ்ச மக்³க³ஞாணங் நிப்³பா³னே அப்பனாதி கத்வா ஸந்திட்ட²னா நாம ஹோதீதி ‘‘ஸந்திட்ட²னா’’திவசனேன மக்³க³ஞாணம்பி ஸங்க³ய்ஹதி. நிப்³பி³தா³னுலோமஞாணானிபி அத்த²தோ நிப்³பி³தா³ஞாணானேவ ஹொந்தீதி தானிபி நிப்³பி³தா³ஞாணேஹி ஸங்க³ஹெத்வா நிப்³பி³தா³படிப்பஸ்ஸத்³தி⁴ஞாணானீதி நிப்³பி³தா³க³ஹணமேவ கதங், ந நிப்³பி³தா³னுலோமக்³க³ஹணங். தீஸுபி சேதேஸு ஞாணட்ட²கனித்³தே³ஸேஸு சதுத்த²ஸ்ஸ த⁴ம்மானுபஸ்ஸனாசதுக்கஸ்ஸ வஸேன வுத்தானங் சதுன்னங் வத்தூ²னங் ஏகேகஸ்மிங் அஸ்ஸாஸவஸேன ஏகங், பஸ்ஸாஸவஸேன ஏகந்தி த்³வே த்³வே ஞாணானீதி சதூஸு வத்தூ²ஸு அட்ட² ஞாணானி ஹொந்தி.
Nibbidāpaṭippassaddhiñāṇaniddese aniccānupassī assasanti anantarasadisameva. Paṭisaṅkhā santiṭṭhanā paññātivacaneneva muñcitukamyatāpaṭisaṅkhānupassanāsaṅkhārupekkhāñāṇāni vuttāni honti tiṇṇaṃ ekalakkhaṇattā. ‘‘Paṭisaṅkhā santiṭṭhanā’’tivacaneneva anulomañāṇamaggañāṇānipi gahitāni honti . Saṅkhārupekkhāñāṇaanulomañāṇānipi hi nibbidāya sikhāppattattā nibbidājananabyāpārappahānena nibbidāpaṭippassaddhiñāṇāni nāma honti. Maggañāṇaṃ pana nibbidāpaṭippassaddhante uppajjanato nibbidāpaṭippassaddhiñāṇaṃ nāma hotīti ativiya yujjatīti. Nibbidānulomañāṇesu viya ādibhūtaṃ muñcitukamyatāñāṇaṃ aggahetvā ‘‘paṭisaṅkhā santiṭṭhanā’’ti ante ñāṇadvayaggahaṇaṃ maggañāṇasaṅgahaṇatthaṃ. Muñcitukamyatāti hi vutte anulomañāṇaṃ saṅgayhati, na maggañāṇaṃ. Maggañāṇañhi muñcitukamyatā nāma na hoti, kiccasiddhiyaṃ santiṭṭhanato pana santiṭṭhanā nāma hoti. Aṭṭhakathāyampi ca ‘‘phusanāti appanā’’ti vuttaṃ. Idañca maggañāṇaṃ nibbāne appanāti katvā santiṭṭhanā nāma hotīti ‘‘santiṭṭhanā’’tivacanena maggañāṇampi saṅgayhati. Nibbidānulomañāṇānipi atthato nibbidāñāṇāneva hontīti tānipi nibbidāñāṇehi saṅgahetvā nibbidāpaṭippassaddhiñāṇānīti nibbidāgahaṇameva kataṃ, na nibbidānulomaggahaṇaṃ. Tīsupi cetesu ñāṇaṭṭhakaniddesesu catutthassa dhammānupassanācatukkassa vasena vuttānaṃ catunnaṃ vatthūnaṃ ekekasmiṃ assāsavasena ekaṃ, passāsavasena ekanti dve dve ñāṇānīti catūsu vatthūsu aṭṭha ñāṇāni honti.
விமுத்திஸுக²ஞாணனித்³தே³ஸே பஹீனத்தாதி பஹானங் த³ஸ்ஸெத்வா தஸ்ஸ பஹானஸ்ஸ ஸமுச்சே²த³ப்பஹானத்தங் த³ஸ்ஸெந்தோ ஸமுச்சி²ன்னத்தாதி ஆஹ. விமுத்திஸுகே² ஞாணந்தி ப²லவிமுத்திஸுக²ஸம்பயுத்தஞாணஞ்ச ப²லவிமுத்திஸுகா²ரம்மணபச்சவெக்க²ணஞாணஞ்ச. அனுஸயவத்து²ஸ்ஸ கிலேஸஸ்ஸ பஹானேன பரியுட்டா²னது³ச்சரிதவத்து²ப்பஹானங் ஹோதீதி த³ஸ்ஸனத்த²ங் புன அனுஸயானங் பஹானங் வுத்தங். ஏகவீஸதிப²லஞாணங் ஸந்தா⁴ய பஹீனகிலேஸக³ணனாயபி ஞாணக³ணனா கதா ஹோதி, பச்சவெக்க²ணஞாணஞ்ச ஸந்தா⁴ய பஹீனகிலேஸபச்சவெக்க²ணக³ணனாய ப²லபச்சவெக்க²ணஞாணக³ணனா கதா ஹோதீதி.
Vimuttisukhañāṇaniddese pahīnattāti pahānaṃ dassetvā tassa pahānassa samucchedappahānattaṃ dassento samucchinnattāti āha. Vimuttisukhe ñāṇanti phalavimuttisukhasampayuttañāṇañca phalavimuttisukhārammaṇapaccavekkhaṇañāṇañca. Anusayavatthussa kilesassa pahānena pariyuṭṭhānaduccaritavatthuppahānaṃ hotīti dassanatthaṃ puna anusayānaṃ pahānaṃ vuttaṃ. Ekavīsatiphalañāṇaṃ sandhāya pahīnakilesagaṇanāyapi ñāṇagaṇanā katā hoti, paccavekkhaṇañāṇañca sandhāya pahīnakilesapaccavekkhaṇagaṇanāya phalapaccavekkhaṇañāṇagaṇanā katā hotīti.
ஞாணராஸிச²க்கனித்³தே³ஸவண்ணனா நிட்டி²தா.
Ñāṇarāsichakkaniddesavaṇṇanā niṭṭhitā.
ஸத்³த⁴ம்மப்பகாஸினியா படிஸம்பி⁴தா³மக்³க³ட்ட²கதா²ய
Saddhammappakāsiniyā paṭisambhidāmaggaṭṭhakathāya
ஆனாபானஸ்ஸதிகதா²வண்ணனா நிட்டி²தா.
Ānāpānassatikathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 6. ஞாணராஸிச²க்கனித்³தே³ஸோ • 6. Ñāṇarāsichakkaniddeso
