| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༦. ཉཱཎརཱསིཚཀྐནིདྡེསོ
6. Ñāṇarāsichakkaniddeso
༡༨༣. ཀཏམཱནི ཙཏུཝཱིསཏི སམཱདྷིཝསེན ཉཱཎཱནི? དཱིགྷཾ ཨསྶཱསཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི, དཱིགྷཾ པསྶཱསཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི…པེ॰… ཝིམོཙཡཾ ཙིཏྟཾ ཨསྶཱསཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི, ཝིམོཙཡཾ ཙིཏྟཾ པསྶཱསཝསེན ཙིཏྟསྶ ཨེཀགྒཏཱ ཨཝིཀྑེཔོ སམཱདྷི། ཨིམཱནི ཙཏུཝཱིསཏི སམཱདྷིཝསེན ཉཱཎཱནི།
183. Katamāni catuvīsati samādhivasena ñāṇāni? Dīghaṃ assāsavasena cittassa ekaggatā avikkhepo samādhi, dīghaṃ passāsavasena cittassa ekaggatā avikkhepo samādhi…pe… vimocayaṃ cittaṃ assāsavasena cittassa ekaggatā avikkhepo samādhi, vimocayaṃ cittaṃ passāsavasena cittassa ekaggatā avikkhepo samādhi. Imāni catuvīsati samādhivasena ñāṇāni.
ཀཏམཱནི དྭེསཏྟཏི ཝིཔསྶནཱཝསེན ཉཱཎཱནི? དཱིགྷཾ ཨསྶཱསཾ ཨནིཙྩཏོ ཨནུཔསྶནཊྛེན ཝིཔསྶནཱ, དུཀྑཏོ ཨནུཔསྶནཊྛེན ཝིཔསྶནཱ, ཨནཏྟཏོ ཨནུཔསྶནཊྛེན ཝིཔསྶནཱ, དཱིགྷཾ པསྶཱསཾ ཨནིཙྩཏོ ཨནུཔསྶནཊྛེན ཝིཔསྶནཱ, དུཀྑཏོ ཨནུཔསྶནཊྛེན ཝིཔསྶནཱ, ཨནཏྟཏོ ཨནུཔསྶནཊྛེན ཝིཔསྶནཱ…པེ॰… ཝིམོཙཡཾ ཙིཏྟཾ ཨསྶཱསཾ, ཝིམོཙཡཾ ཙིཏྟཾ པསྶཱསཾ ཨནིཙྩཏོ ཨནུཔསྶནཊྛེན ཝིཔསྶནཱ, དུཀྑཏོ ཨནུཔསྶནཊྛེན ཝིཔསྶནཱ, ཨནཏྟཏོ ཨནུཔསྶནཊྛེན ཝིཔསྶནཱ། ཨིམཱནི དྭེསཏྟཏི ཝིཔསྶནཱཝསེན ཉཱཎཱནི།
Katamāni dvesattati vipassanāvasena ñāṇāni? Dīghaṃ assāsaṃ aniccato anupassanaṭṭhena vipassanā, dukkhato anupassanaṭṭhena vipassanā, anattato anupassanaṭṭhena vipassanā, dīghaṃ passāsaṃ aniccato anupassanaṭṭhena vipassanā, dukkhato anupassanaṭṭhena vipassanā, anattato anupassanaṭṭhena vipassanā…pe… vimocayaṃ cittaṃ assāsaṃ, vimocayaṃ cittaṃ passāsaṃ aniccato anupassanaṭṭhena vipassanā, dukkhato anupassanaṭṭhena vipassanā, anattato anupassanaṭṭhena vipassanā. Imāni dvesattati vipassanāvasena ñāṇāni.
ཀཏམཱནི ཨཊྛ ནིབྦིདཱཉཱཎཱནི? ཨནིཙྩཱནུཔསྶཱི ཨསྶཱསཾ ཡཐཱབྷཱུཏཾ ཛཱནཱཏི པསྶཏཱིཏི – ནིབྦིདཱཉཱཎཾ, ཨནིཙྩཱནུཔསྶཱི པསྶཱསཾ ཡཐཱབྷཱུཏཾ ཛཱནཱཏི པསྶཏཱིཏི – ནིབྦིདཱཉཱཎཾ…པེ॰… པཊིནིསྶགྒཱནུཔསྶཱི ཨསྶཱསཾ ཡཐཱབྷཱུཏཾ ཛཱནཱཏི པསྶཏཱིཏི – ནིབྦིདཱཉཱཎཾ, པཊིནིསྶགྒཱནུཔསྶཱི པསྶཱསཾ ཡཐཱབྷཱུཏཾ ཛཱནཱཏི པསྶཏཱིཏི – ནིབྦིདཱཉཱཎཾ། ཨིམཱནི ཨཊྛ ནིབྦིདཱཉཱཎཱནི།
Katamāni aṭṭha nibbidāñāṇāni? Aniccānupassī assāsaṃ yathābhūtaṃ jānāti passatīti – nibbidāñāṇaṃ, aniccānupassī passāsaṃ yathābhūtaṃ jānāti passatīti – nibbidāñāṇaṃ…pe… paṭinissaggānupassī assāsaṃ yathābhūtaṃ jānāti passatīti – nibbidāñāṇaṃ, paṭinissaggānupassī passāsaṃ yathābhūtaṃ jānāti passatīti – nibbidāñāṇaṃ. Imāni aṭṭha nibbidāñāṇāni.
ཀཏམཱནི ཨཊྛ ནིབྦིདཱནུལོམེ ཉཱཎཱནི? ཨནིཙྩཱནུཔསྶཱི ཨསྶཱསཾ བྷཡཏུཔཊྛཱནེ པཉྙཱ ནིབྦིདཱནུལོམེ ཉཱཎཾ, ཨནིཙྩཱནུཔསྶཱི པསྶཱསཾ བྷཡཏུཔཊྛཱནེ པཉྙཱ ནིབྦིདཱནུལོམེ ཉཱཎཾ…པེ॰… པཊིནིསྶགྒཱནུཔསྶཱི ཨསྶཱསཾ བྷཡཏུཔཊྛཱནེ པཉྙཱ ནིབྦིདཱནུལོམེ ཉཱཎཾ, པཊིནིསྶགྒཱནུཔསྶཱི པསྶཱསཾ བྷཡཏུཔཊྛཱནེ པཉྙཱ ནིབྦིདཱནུལོམེ ཉཱཎཾ – ཨིམཱནི ཨཊྛ ནིབྦིདཱནུལོམེ ཉཱཎཱནི།
Katamāni aṭṭha nibbidānulome ñāṇāni? Aniccānupassī assāsaṃ bhayatupaṭṭhāne paññā nibbidānulome ñāṇaṃ, aniccānupassī passāsaṃ bhayatupaṭṭhāne paññā nibbidānulome ñāṇaṃ…pe… paṭinissaggānupassī assāsaṃ bhayatupaṭṭhāne paññā nibbidānulome ñāṇaṃ, paṭinissaggānupassī passāsaṃ bhayatupaṭṭhāne paññā nibbidānulome ñāṇaṃ – imāni aṭṭha nibbidānulome ñāṇāni.
ཀཏམཱནི ཨཊྛ ནིབྦིདཱཔཊིཔྤསྶདྡྷིཉཱཎཱནི? ཨནིཙྩཱནུཔསྶཱི ཨསྶཱསཾ པཊིསངྑཱ སནྟིཊྛནཱ པཉྙཱ ནིབྦིདཱཔཊིཔྤསྶདྡྷིཉཱཎཾ, ཨནིཙྩཱནུཔསྶཱི པསྶཱསཾ པཊིསངྑཱ སནྟིཊྛནཱ པཉྙཱ ནིབྦིདཱཔཊིཔྤསྶདྡྷིཉཱཎཾ…པེ॰… པཊིནིསྶགྒཱནུཔསྶཱི ཨསྶཱསཾ པཊིསངྑཱ སནྟིཊྛནཱ པཉྙཱ ནིབྦིདཱཔཊིཔྤསྶདྡྷིཉཱཎཾ, པཊིནིསྶགྒཱནུཔསྶཱི པསྶཱསཾ པཊིསངྑཱ སནྟིཊྛནཱ པཉྙཱ ནིབྦིདཱཔཊིཔྤསྶདྡྷིཉཱཎཾ – ཨིམཱནི ཨཊྛ ནིབྦིདཱཔཊིཔྤསྶདྡྷིཉཱཎཱནི།
Katamāni aṭṭha nibbidāpaṭippassaddhiñāṇāni? Aniccānupassī assāsaṃ paṭisaṅkhā santiṭṭhanā paññā nibbidāpaṭippassaddhiñāṇaṃ, aniccānupassī passāsaṃ paṭisaṅkhā santiṭṭhanā paññā nibbidāpaṭippassaddhiñāṇaṃ…pe… paṭinissaggānupassī assāsaṃ paṭisaṅkhā santiṭṭhanā paññā nibbidāpaṭippassaddhiñāṇaṃ, paṭinissaggānupassī passāsaṃ paṭisaṅkhā santiṭṭhanā paññā nibbidāpaṭippassaddhiñāṇaṃ – imāni aṭṭha nibbidāpaṭippassaddhiñāṇāni.
ཀཏམཱནི ཨེཀཝཱིསཏི ཝིམུཏྟིསུཁེ ཉཱཎཱནི? སོཏཱཔཏྟིམགྒེན སཀྐཱཡདིཊྛིཡཱ པཧཱིནཏྟཱ སམུཙྪིནྣཏྟཱ ཨུཔྤཛྫཏི ཝིམུཏྟིསུཁེ ཉཱཎཾ, ཝིཙིཀིཙྪཱཡ པཧཱིནཏྟཱ སམུཙྪིནྣཏྟཱ ཨུཔྤཛྫཏི ཝིམུཏྟིསུཁེ ཉཱཎཾ, སཱིལབྦཏཔརཱམཱསསྶ…པེ॰… དིཊྛཱནུསཡསྶ, ཝིཙིཀིཙྪཱནུསཡསྶ པཧཱིནཏྟཱ སམུཙྪིནྣཏྟཱ ཨུཔྤཛྫཏི ཝིམུཏྟིསུཁེ ཉཱཎཾ, སཀདཱགཱམིམགྒེན ཨོལཱ༹རིཀསྶ, ཀཱམརཱགསཉྙོཛནསྶ…པེ॰… པཊིགྷསཉྙོཛནསྶ, ཨོལཱ༹རིཀསྶ ཀཱམརཱགཱནུསཡསྶ, པཊིགྷཱནུསཡསྶ པཧཱིནཏྟཱ སམུཙྪིནྣཏྟཱ ཨུཔྤཛྫཏི ཝིམུཏྟིསུཁེ ཉཱཎཾ, ཨནཱགཱམིམགྒེན ཨནུསཧགཏསྶ ཀཱམརཱགསཉྙོཛནསྶ…པེ॰… པཊིགྷསཉྙོཛནསྶ, ཨནུསཧགཏསྶ ཀཱམརཱགཱནུསཡསྶ, པཊིགྷཱནུསཡསྶ པཧཱིནཏྟཱ སམུཙྪིནྣཏྟཱ ཨུཔྤཛྫཏི ཝིམུཏྟིསུཁེ ཉཱཎཾ, ཨརཧཏྟམགྒེན, རཱུཔརཱགསྶ…པེ॰… ཨརཱུཔརཱགསྶ, མཱནསྶ, ཨུདྡྷཙྩསྶ, ཨཝིཛྫཱཡ, མཱནཱནུསཡསྶ, བྷཝརཱགཱནུསཡསྶ, ཨཝིཛྫཱནུསཡསྶ པཧཱིནཏྟཱ སམུཙྪིནྣཏྟཱ ཨུཔྤཛྫཏི ཝིམུཏྟིསུཁེ ཉཱཎཾ། ཨིམཱནི ཨེཀཝཱིསཏི ཝིམུཏྟིསུཁེ ཉཱཎཱནི། སོལ༹སཝཏྠུཀཾ ཨཱནཱཔཱནསྶཏིསམཱདྷིཾ བྷཱཝཡཏོ སམདྷིཀཱནི ཨིམཱནི དྭེ ཉཱཎསཏཱནི ཨུཔྤཛྫནྟི།
Katamāni ekavīsati vimuttisukhe ñāṇāni? Sotāpattimaggena sakkāyadiṭṭhiyā pahīnattā samucchinnattā uppajjati vimuttisukhe ñāṇaṃ, vicikicchāya pahīnattā samucchinnattā uppajjati vimuttisukhe ñāṇaṃ, sīlabbataparāmāsassa…pe… diṭṭhānusayassa, vicikicchānusayassa pahīnattā samucchinnattā uppajjati vimuttisukhe ñāṇaṃ, sakadāgāmimaggena oḷārikassa, kāmarāgasaññojanassa…pe… paṭighasaññojanassa, oḷārikassa kāmarāgānusayassa, paṭighānusayassa pahīnattā samucchinnattā uppajjati vimuttisukhe ñāṇaṃ, anāgāmimaggena anusahagatassa kāmarāgasaññojanassa…pe… paṭighasaññojanassa, anusahagatassa kāmarāgānusayassa, paṭighānusayassa pahīnattā samucchinnattā uppajjati vimuttisukhe ñāṇaṃ, arahattamaggena, rūparāgassa…pe… arūparāgassa, mānassa, uddhaccassa, avijjāya, mānānusayassa, bhavarāgānusayassa, avijjānusayassa pahīnattā samucchinnattā uppajjati vimuttisukhe ñāṇaṃ. Imāni ekavīsati vimuttisukhe ñāṇāni. Soḷasavatthukaṃ ānāpānassatisamādhiṃ bhāvayato samadhikāni imāni dve ñāṇasatāni uppajjanti.
ཉཱཎརཱསིཚཀྐནིདྡེསོ ཚཊྛོ།
Ñāṇarāsichakkaniddeso chaṭṭho.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༦. ཉཱཎརཱསིཚཀྐནིདྡེསཝཎྞནཱ • 6. Ñāṇarāsichakkaniddesavaṇṇanā
