| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
136. නානාසංවාසකාදීහි පවාරණා
136. Nānāsaṃvāsakādīhi pavāraṇā
230. ඉධ පන, භික්‌ඛවෙ, ආගන්‌තුකා භික්‌ඛූ පස්‌සන්‌ති ආවාසිකෙ භික්‌ඛූ නානාසංවාසකෙ. තෙ සමානසංවාසකදිට්‌ඨිං පටිලභන්‌ති, සමානසංවාසකදිට්‌ඨිං පටිලභිත්‌වා න පුච්‌ඡන්‌ති, අපුච්‌ඡිත්‌වා එකතො පවාරෙන්‌ති. අනාපත්‌ති. තෙ පුච්‌ඡන්‌ති, පුච්‌ඡිත්‌වා නාභිවිතරන්‌ති, අනභිවිතරිත්‌වා එකතො පවාරෙන්‌ති. ආපත්‌ති දුක්‌කටස්‌ස. තෙ පුච්‌ඡන්‌ති, පුච්‌ඡිත්‌වා නාභිවිතරන්‌ති, අනභිවිතරිත්‌වා පාටෙක්‌කං පවාරෙන්‌ති. අනාපත්‌ති.
230. Idha pana, bhikkhave, āgantukā bhikkhū passanti āvāsike bhikkhū nānāsaṃvāsake. Te samānasaṃvāsakadiṭṭhiṃ paṭilabhanti, samānasaṃvāsakadiṭṭhiṃ paṭilabhitvā na pucchanti, apucchitvā ekato pavārenti. Anāpatti. Te pucchanti, pucchitvā nābhivitaranti, anabhivitaritvā ekato pavārenti. Āpatti dukkaṭassa. Te pucchanti, pucchitvā nābhivitaranti, anabhivitaritvā pāṭekkaṃ pavārenti. Anāpatti.
ඉධ පන, භික්‌ඛවෙ, ආගන්‌තුකා භික්‌ඛූ පස්‌සන්‌ති ආවාසිකෙ භික්‌ඛූ සමානසංවාසකෙ. තෙ නානාසංවාසකදිට්‌ඨිං පටිලභන්‌ති, නානාසංවාසකදිට්‌ඨිං පටිලභිත්‌වා න පුච්‌ඡන්‌ති, අපුච්‌ඡිත්‌වා එකතො පවාරෙන්‌ති. ආපත්‌ති දුක්‌කටස්‌ස. තෙ පුච්‌ඡන්‌ති, පුච්‌ඡිත්‌වා අභිවිතරන්‌ති, අභිවිතරිත්‌වා පාටෙක්‌කං පවාරෙන්‌ති. ආපත්‌ති දුක්‌කටස්‌ස. තෙ පුච්‌ඡන්‌ති, පුච්‌ඡිත්‌වා අභිවිතරන්‌ති, අභිවිතරිත්‌වා එකතො පවාරෙන්‌ති. අනාපත්‌ති.
Idha pana, bhikkhave, āgantukā bhikkhū passanti āvāsike bhikkhū samānasaṃvāsake. Te nānāsaṃvāsakadiṭṭhiṃ paṭilabhanti, nānāsaṃvāsakadiṭṭhiṃ paṭilabhitvā na pucchanti, apucchitvā ekato pavārenti. Āpatti dukkaṭassa. Te pucchanti, pucchitvā abhivitaranti, abhivitaritvā pāṭekkaṃ pavārenti. Āpatti dukkaṭassa. Te pucchanti, pucchitvā abhivitaranti, abhivitaritvā ekato pavārenti. Anāpatti.
ඉධ පන, භික්‌ඛවෙ, ආවාසිකා භික්‌ඛූ පස්‌සන්‌ති ආගන්‌තුකෙ භික්‌ඛූ නානාසංවාසකෙ. තෙ සමානසංවාසකදිට්‌ඨිං පටිලභන්‌ති, සමානසංවාසකදිට්‌ඨිං පටිලභිත්‌වා න පුච්‌ඡන්‌ති, අපුච්‌ඡිත්‌වා එකතො පවාරෙන්‌ති. අනාපත්‌ති. තෙ පුච්‌ඡන්‌ති, පුච්‌ඡිත්‌වා නාභිවිතරන්‌ති, අනභිවිතරිත්‌වා එකතො පවාරෙන්‌ති. ආපත්‌ති දුක්‌කටස්‌ස. තෙ පුච්‌ඡන්‌ති, පුච්‌ඡිත්‌වා නාභිවිතරන්‌ති, අනභිවිතරිත්‌වා පාටෙක්‌කං පවාරෙන්‌ති. අනාපත්‌ති.
Idha pana, bhikkhave, āvāsikā bhikkhū passanti āgantuke bhikkhū nānāsaṃvāsake. Te samānasaṃvāsakadiṭṭhiṃ paṭilabhanti, samānasaṃvāsakadiṭṭhiṃ paṭilabhitvā na pucchanti, apucchitvā ekato pavārenti. Anāpatti. Te pucchanti, pucchitvā nābhivitaranti, anabhivitaritvā ekato pavārenti. Āpatti dukkaṭassa. Te pucchanti, pucchitvā nābhivitaranti, anabhivitaritvā pāṭekkaṃ pavārenti. Anāpatti.
ඉධ පන, භික්‌ඛවෙ, ආවාසිකා භික්‌ඛූ පස්‌සන්‌ති ආගන්‌තුකෙ භික්‌ඛූ සමානසංවාසකෙ. තෙ නානාසංවාසකදිට්‌ඨිං පටිලභන්‌ති, නානාසංවාසකදිට්‌ඨිං පටිලභිත්‌වා න පුච්‌ඡන්‌ති, අපුච්‌ඡිත්‌වා එකතො පවාරෙන්‌ති. ආපත්‌ති දුක්‌කටස්‌ස. තෙ පුච්‌ඡන්‌ති, පුච්‌ඡිත්‌වා අභිවිතරන්‌ති, අභිවිතරිත්‌වා පාටෙක්‌කං පවාරෙන්‌ති. ආපත්‌ති දුක්‌කටස්‌ස. තෙ පුච්‌ඡන්‌ති, පුච්‌ඡිත්‌වා අභිවිතරන්‌ති, අභිවිතරිත්‌වා එකතො පවාරෙන්‌ති. අනාපත්‌ති.
Idha pana, bhikkhave, āvāsikā bhikkhū passanti āgantuke bhikkhū samānasaṃvāsake. Te nānāsaṃvāsakadiṭṭhiṃ paṭilabhanti, nānāsaṃvāsakadiṭṭhiṃ paṭilabhitvā na pucchanti, apucchitvā ekato pavārenti. Āpatti dukkaṭassa. Te pucchanti, pucchitvā abhivitaranti, abhivitaritvā pāṭekkaṃ pavārenti. Āpatti dukkaṭassa. Te pucchanti, pucchitvā abhivitaranti, abhivitaritvā ekato pavārenti. Anāpatti.
නානාසංවාසකාදීහි පවාරණා නිට්‌ඨිතා.
Nānāsaṃvāsakādīhi pavāraṇā niṭṭhitā.
