| Library / Tipiṭaka / তিপিটক • Tipiṭaka / অপদানপাল়ি • Apadānapāḷi |
২. ঞাণসঞ্ঞিকত্থেরঅপদানং
2. Ñāṇasaññikattheraapadānaṃ
৭.
7.
‘‘সুৰণ্ণৰণ্ণং সম্বুদ্ধং, নিসভাজানিযং যথা।
‘‘Suvaṇṇavaṇṇaṃ sambuddhaṃ, nisabhājāniyaṃ yathā;
তিধাপভিন্নং মাতঙ্গং, কুঞ্জরংৰ মহেসিনং॥
Tidhāpabhinnaṃ mātaṅgaṃ, kuñjaraṃva mahesinaṃ.
৮.
8.
‘‘ওভাসেন্তং দিসা সব্বা, উল়ুরাজংৰ পূরিতং।
‘‘Obhāsentaṃ disā sabbā, uḷurājaṃva pūritaṃ;
রথিযং পটিপজ্জন্তং, লোকজেট্ঠং অপস্সহং॥
Rathiyaṃ paṭipajjantaṃ, lokajeṭṭhaṃ apassahaṃ.
৯.
9.
‘‘ঞাণে চিত্তং পসাদেত্ৰা, পগ্গহেত্ৰান অঞ্জলিং।
‘‘Ñāṇe cittaṃ pasādetvā, paggahetvāna añjaliṃ;
পসন্নচিত্তো সুমনো, সিদ্ধত্থমভিৰাদযিং॥
Pasannacitto sumano, siddhatthamabhivādayiṃ.
১০.
10.
‘‘চতুন্নৰুতিতো কপ্পে, যং কম্মমকরিং তদা।
‘‘Catunnavutito kappe, yaṃ kammamakariṃ tadā;
দুগ্গতিং নাভিজানামি, ঞাণসঞ্ঞাযিদং ফলং॥
Duggatiṃ nābhijānāmi, ñāṇasaññāyidaṃ phalaṃ.
১১.
11.
‘‘তেসত্ততিম্হিতো কপ্পে, সোল়সাসুং নরুত্তমা।
‘‘Tesattatimhito kappe, soḷasāsuṃ naruttamā;
সত্তরতনসম্পন্না, চক্কৰত্তী মহব্বলা॥
Sattaratanasampannā, cakkavattī mahabbalā.
১২.
12.
‘‘পটিসম্ভিদা চতস্সো…পে॰… কতং বুদ্ধস্স সাসনং’’॥
‘‘Paṭisambhidā catasso…pe… kataṃ buddhassa sāsanaṃ’’.
ইত্থং সুদং আযস্মা ঞাণসঞ্ঞিকো থেরো ইমা গাথাযো অভাসিত্থাতি।
Itthaṃ sudaṃ āyasmā ñāṇasaññiko thero imā gāthāyo abhāsitthāti.
ঞাণসঞ্ঞিকত্থেরস্সাপদানং দুতিযং।
Ñāṇasaññikattherassāpadānaṃ dutiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / অপদান-অট্ঠকথা • Apadāna-aṭṭhakathā / ২. ঞাণসঞ্ঞিকত্থেরঅপদানৰণ্ণনা • 2. Ñāṇasaññikattheraapadānavaṇṇanā
