| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
2. ஞாணஸஞ்ஞிகத்தே²ரஅபதா³னவண்ணனா
2. Ñāṇasaññikattheraapadānavaṇṇanā
ஸுவண்ணவண்ணங் ஸம்பு³த்³த⁴ந்திஆதி³கங் ஆயஸ்மதோ ஞாணஸஞ்ஞிகத்தே²ரஸ்ஸ அபதா³னங். கா உப்பத்தி? அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴மன்வாய ஸத்³தா⁴ஜாதோ ஸத்³த⁴ம்மஸ்ஸவனே ஸாத³ரோ ஸாலயோ ப⁴க³வதோ த⁴ம்மதே³ஸனானுஸாரேன ஞாணங் பேஸெத்வா கோ⁴ஸபமாணத்தா ப⁴க³வதோ ஞாணே பஸன்னோ பஞ்சங்க³அட்ட²ங்க³னமக்காரவஸேன பணாமங் கத்வா பக்காமி. ஸோ ததோ சுதோ தே³வலோகேஸு உப்பன்னோ தத்த² ச² காமாவசரே தி³ப்³ப³ஸம்பத்திமனுப⁴வந்தோ ததோ சவித்வா மனுஸ்ஸலோகே ஜாதோ தத்த²க்³க³பூ⁴தா சக்கவத்திஸம்பதா³த³யோ அனுப⁴வித்வா இமஸ்மிங் பு³த்³து⁴ப்பாதே³ விப⁴வஸம்பன்னே ஏகஸ்மிங் குலகே³ஹே நிப்³ப³த்தோ வுத்³தி⁴மன்வாய ஸத்த²ரி பஸீதி³த்வா பப்³ப³ஜிதோ நசிரஸ்ஸேவ அரஹா அஹோஸி.
Suvaṇṇavaṇṇaṃsambuddhantiādikaṃ āyasmato ñāṇasaññikattherassa apadānaṃ. Kā uppatti? Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle kulagehe nibbatto vuddhimanvāya saddhājāto saddhammassavane sādaro sālayo bhagavato dhammadesanānusārena ñāṇaṃ pesetvā ghosapamāṇattā bhagavato ñāṇe pasanno pañcaṅgaaṭṭhaṅganamakkāravasena paṇāmaṃ katvā pakkāmi. So tato cuto devalokesu uppanno tattha cha kāmāvacare dibbasampattimanubhavanto tato cavitvā manussaloke jāto tatthaggabhūtā cakkavattisampadādayo anubhavitvā imasmiṃ buddhuppāde vibhavasampanne ekasmiṃ kulagehe nibbatto vuddhimanvāya satthari pasīditvā pabbajito nacirasseva arahā ahosi.
7. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஸுவண்ணவண்ணங் ஸம்பு³த்³த⁴ந்திஆதி³மாஹ. தங் வுத்தத்த²மேவ. நிஸபா⁴ஜானியங் யதா²தி க³வஸதஸஹஸ்ஸஜெட்டோ² நிஸபோ⁴, நிஸபோ⁴ ச ஸோ ஆஜானியோ ஸெட்டோ² உத்தமோ சேதி நிஸபா⁴ஜானியோ. யதா² நிஸபா⁴ஜானியோ, ததே²வ ப⁴க³வாதி அத்தோ². லோகவிஸயஸஞ்ஞாதங் பஞ்ஞத்திவஸேன ஏவங் வுத்தங். அனுபமெய்யோ ஹி ப⁴க³வா. ஸேஸங் ஸப்³ப³த்த² உத்தானத்த²மேவாதி.
7. So aparabhāge attano pubbakammaṃ saritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Taṃ vuttatthameva. Nisabhājāniyaṃ yathāti gavasatasahassajeṭṭho nisabho, nisabho ca so ājāniyo seṭṭho uttamo ceti nisabhājāniyo. Yathā nisabhājāniyo, tatheva bhagavāti attho. Lokavisayasaññātaṃ paññattivasena evaṃ vuttaṃ. Anupameyyo hi bhagavā. Sesaṃ sabbattha uttānatthamevāti.
ஞாணஸஞ்ஞிகத்தே²ரஅபதா³னவண்ணனா ஸமத்தா.
Ñāṇasaññikattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 2. ஞாணஸஞ்ஞிகத்தே²ரஅபதா³னங் • 2. Ñāṇasaññikattheraapadānaṃ
