| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
8. ஞாணஸஞ்ஞிகத்தே²ரஅபதா³னவண்ணனா
8. Ñāṇasaññikattheraapadānavaṇṇanā
பப்³ப³தே ஹிமவந்தம்ஹீதிஆதி³கங் ஆயஸ்மதோ ஞாணஸஞ்ஞிகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தஸ்மிங் தஸ்மிங் உப்பன்னுப்பன்னே ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴ப்பத்தோ க⁴ராவாஸங் பஹாய தாபஸபப்³ப³ஜ்ஜங் பப்³ப³ஜித்வா ஹிமவந்தஸ்ஸ அவிதூ³ரே பப்³ப³தந்தரே பண்ணஸாலங் காரெத்வா பஞ்சாபி⁴ஞ்ஞாஅட்ட²ஸமாபத்தியோ நிப்³ப³த்தெத்வா வஸந்தோ ஏகதி³வஸங் பரிஸுத்³த⁴ங் பண்ட³ரங் புலினதலங் தி³ஸ்வா ‘‘ஈதி³ஸா பரிஸுத்³தா⁴ பு³த்³தா⁴, ஈதி³ஸங்வ பரிஸுத்³த⁴ங் பு³த்³த⁴ஞாண’’ந்தி பு³த்³த⁴ஞ்ச தஸ்ஸ ஞாணஞ்ச அனுஸ்ஸரி தோ²மேஸி ச.
Pabbate himavantamhītiādikaṃ āyasmato ñāṇasaññikattherassa apadānaṃ. Ayampi purimabuddhesu katādhikāro tasmiṃ tasmiṃ uppannuppanne bhave vivaṭṭūpanissayāni puññāni upacinanto vipassissa bhagavato kāle kulagehe nibbatto vuddhippatto gharāvāsaṃ pahāya tāpasapabbajjaṃ pabbajitvā himavantassa avidūre pabbatantare paṇṇasālaṃ kāretvā pañcābhiññāaṭṭhasamāpattiyo nibbattetvā vasanto ekadivasaṃ parisuddhaṃ paṇḍaraṃ pulinatalaṃ disvā ‘‘īdisā parisuddhā buddhā, īdisaṃva parisuddhaṃ buddhañāṇa’’nti buddhañca tassa ñāṇañca anussari thomesi ca.
84. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ விஞ்ஞுதங் பத்வா ஸாஸனே பப்³ப³ஜித்வா நசிரஸ்ஸேவ அரஹத்தங் பத்தோ புப்³பே³ கதபுஞ்ஞங் அனுஸ்ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ‘‘பப்³ப³தே ஹிமவந்தம்ஹீ’’திஆதி³மாஹ. புலினங் ஸோப⁴னங் தி³ஸ்வாதி பரிபுண்ணகதங் விய புலாகாரேன பரிஸோதி⁴தாகாரேன பவத்தங் டி²தந்தி புலினங், ஸோப⁴னங் வாலுகங் தி³ஸ்வா ஸெட்ட²ங் பு³த்³த⁴ங் அனுஸ்ஸரிந்தி அத்தோ². ஸேஸங் ஸுவிஞ்ஞெய்யமேவாதி.
84. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde ekasmiṃ kulagehe nibbatto viññutaṃ patvā sāsane pabbajitvā nacirasseva arahattaṃ patto pubbe katapuññaṃ anussaritvā somanassajāto pubbacaritāpadānaṃ pakāsento ‘‘pabbate himavantamhī’’tiādimāha. Pulinaṃ sobhanaṃ disvāti paripuṇṇakataṃ viya pulākārena parisodhitākārena pavattaṃ ṭhitanti pulinaṃ, sobhanaṃ vālukaṃ disvā seṭṭhaṃ buddhaṃ anussarinti attho. Sesaṃ suviññeyyamevāti.
ஞாணஸஞ்ஞிகத்தே²ரஅபதா³னவண்ணனா ஸமத்தா.
Ñāṇasaññikattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 8. ஞாணஸஞ்ஞிகத்தே²ரஅபதா³னங் • 8. Ñāṇasaññikattheraapadānaṃ
