| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৮. ঞাণসঞ্ঞিকত্থেরঅপদানৰণ্ণনা
8. Ñāṇasaññikattheraapadānavaṇṇanā
পব্বতে হিমৰন্তম্হীতিআদিকং আযস্মতো ঞাণসঞ্ঞিকত্থেরস্স অপদানং। অযম্পি পুরিমবুদ্ধেসু কতাধিকারো তস্মিং তস্মিং উপ্পন্নুপ্পন্নে ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে কুলগেহে নিব্বত্তো ৰুদ্ধিপ্পত্তো ঘরাৰাসং পহায তাপসপব্বজ্জং পব্বজিত্ৰা হিমৰন্তস্স অৰিদূরে পব্বতন্তরে পণ্ণসালং কারেত্ৰা পঞ্চাভিঞ্ঞাঅট্ঠসমাপত্তিযো নিব্বত্তেত্ৰা ৰসন্তো একদিৰসং পরিসুদ্ধং পণ্ডরং পুলিনতলং দিস্ৰা ‘‘ঈদিসা পরিসুদ্ধা বুদ্ধা, ঈদিসংৰ পরিসুদ্ধং বুদ্ধঞাণ’’ন্তি বুদ্ধঞ্চ তস্স ঞাণঞ্চ অনুস্সরি থোমেসি চ।
Pabbate himavantamhītiādikaṃ āyasmato ñāṇasaññikattherassa apadānaṃ. Ayampi purimabuddhesu katādhikāro tasmiṃ tasmiṃ uppannuppanne bhave vivaṭṭūpanissayāni puññāni upacinanto vipassissa bhagavato kāle kulagehe nibbatto vuddhippatto gharāvāsaṃ pahāya tāpasapabbajjaṃ pabbajitvā himavantassa avidūre pabbatantare paṇṇasālaṃ kāretvā pañcābhiññāaṭṭhasamāpattiyo nibbattetvā vasanto ekadivasaṃ parisuddhaṃ paṇḍaraṃ pulinatalaṃ disvā ‘‘īdisā parisuddhā buddhā, īdisaṃva parisuddhaṃ buddhañāṇa’’nti buddhañca tassa ñāṇañca anussari thomesi ca.
৮৪. সো তেন পুঞ্ঞেন দেৰমনুস্সেসু সংসরন্তো উভযসম্পত্তিযো অনুভৰিত্ৰা ইমস্মিং বুদ্ধুপ্পাদে একস্মিং কুলগেহে নিব্বত্তো ৰিঞ্ঞুতং পত্ৰা সাসনে পব্বজিত্ৰা নচিরস্সেৰ অরহত্তং পত্তো পুব্বে কতপুঞ্ঞং অনুস্সরিত্ৰা সোমনস্সজাতো পুব্বচরিতাপদানং পকাসেন্তো ‘‘পব্বতে হিমৰন্তম্হী’’তিআদিমাহ। পুলিনং সোভনং দিস্ৰাতি পরিপুণ্ণকতং ৰিয পুলাকারেন পরিসোধিতাকারেন পৰত্তং ঠিতন্তি পুলিনং, সোভনং ৰালুকং দিস্ৰা সেট্ঠং বুদ্ধং অনুস্সরিন্তি অত্থো। সেসং সুৰিঞ্ঞেয্যমেৰাতি।
84. So tena puññena devamanussesu saṃsaranto ubhayasampattiyo anubhavitvā imasmiṃ buddhuppāde ekasmiṃ kulagehe nibbatto viññutaṃ patvā sāsane pabbajitvā nacirasseva arahattaṃ patto pubbe katapuññaṃ anussaritvā somanassajāto pubbacaritāpadānaṃ pakāsento ‘‘pabbate himavantamhī’’tiādimāha. Pulinaṃ sobhanaṃ disvāti paripuṇṇakataṃ viya pulākārena parisodhitākārena pavattaṃ ṭhitanti pulinaṃ, sobhanaṃ vālukaṃ disvā seṭṭhaṃ buddhaṃ anussarinti attho. Sesaṃ suviññeyyamevāti.
ঞাণসঞ্ঞিকত্থেরঅপদানৰণ্ণনা সমত্তা।
Ñāṇasaññikattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৮. ঞাণসঞ্ঞিকত্থেরঅপদানং • 8. Ñāṇasaññikattheraapadānaṃ
