| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
२. ञाणसञ्ञिकत्थेरअपदानवण्णना
2. Ñāṇasaññikattheraapadānavaṇṇanā
सुवण्णवण्णं सम्बुद्धन्तिआदिकं आयस्मतो ञाणसञ्ञिकत्थेरस्स अपदानं। का उप्पत्ति? अयम्पि पुरिमबुद्धेसु कताधिकारो तत्थ तत्थ भवे विवट्टूपनिस्सयानि पुञ्ञानि उपचिनन्तो सिद्धत्थस्स भगवतो काले कुलगेहे निब्बत्तो वुद्धिमन्वाय सद्धाजातो सद्धम्मस्सवने सादरो सालयो भगवतो धम्मदेसनानुसारेन ञाणं पेसेत्वा घोसपमाणत्ता भगवतो ञाणे पसन्नो पञ्चङ्गअट्ठङ्गनमक्कारवसेन पणामं कत्वा पक्कामि। सो ततो चुतो देवलोकेसु उप्पन्नो तत्थ छ कामावचरे दिब्बसम्पत्तिमनुभवन्तो ततो चवित्वा मनुस्सलोके जातो तत्थग्गभूता चक्कवत्तिसम्पदादयो अनुभवित्वा इमस्मिं बुद्धुप्पादे विभवसम्पन्ने एकस्मिं कुलगेहे निब्बत्तो वुद्धिमन्वाय सत्थरि पसीदित्वा पब्बजितो नचिरस्सेव अरहा अहोसि।
Suvaṇṇavaṇṇaṃsambuddhantiādikaṃ āyasmato ñāṇasaññikattherassa apadānaṃ. Kā uppatti? Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle kulagehe nibbatto vuddhimanvāya saddhājāto saddhammassavane sādaro sālayo bhagavato dhammadesanānusārena ñāṇaṃ pesetvā ghosapamāṇattā bhagavato ñāṇe pasanno pañcaṅgaaṭṭhaṅganamakkāravasena paṇāmaṃ katvā pakkāmi. So tato cuto devalokesu uppanno tattha cha kāmāvacare dibbasampattimanubhavanto tato cavitvā manussaloke jāto tatthaggabhūtā cakkavattisampadādayo anubhavitvā imasmiṃ buddhuppāde vibhavasampanne ekasmiṃ kulagehe nibbatto vuddhimanvāya satthari pasīditvā pabbajito nacirasseva arahā ahosi.
७. सो अपरभागे अत्तनो पुब्बकम्मं सरित्वा सोमनस्सजातो पुब्बचरितापदानं पकासेन्तो सुवण्णवण्णं सम्बुद्धन्तिआदिमाह। तं वुत्तत्थमेव। निसभाजानियं यथाति गवसतसहस्सजेट्ठो निसभो, निसभो च सो आजानियो सेट्ठो उत्तमो चेति निसभाजानियो। यथा निसभाजानियो, तथेव भगवाति अत्थो। लोकविसयसञ्ञातं पञ्ञत्तिवसेन एवं वुत्तं। अनुपमेय्यो हि भगवा। सेसं सब्बत्थ उत्तानत्थमेवाति।
7. So aparabhāge attano pubbakammaṃ saritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Taṃ vuttatthameva. Nisabhājāniyaṃ yathāti gavasatasahassajeṭṭho nisabho, nisabho ca so ājāniyo seṭṭho uttamo ceti nisabhājāniyo. Yathā nisabhājāniyo, tatheva bhagavāti attho. Lokavisayasaññātaṃ paññattivasena evaṃ vuttaṃ. Anupameyyo hi bhagavā. Sesaṃ sabbattha uttānatthamevāti.
ञाणसञ्ञिकत्थेरअपदानवण्णना समत्ता।
Ñāṇasaññikattheraapadānavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / २. ञाणसञ्ञिकत्थेरअपदानं • 2. Ñāṇasaññikattheraapadānaṃ
