| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. நானாதித்தி²யஸாவகஸுத்தவண்ணனா
10. Nānātitthiyasāvakasuttavaṇṇanā
111. த³ஸமே நானாதித்தி²யஸாவகாதி தே கிர கம்மவாதி³னோ அஹேஸுங், தஸ்மா தா³னாதீ³னி புஞ்ஞானி கத்வா ஸக்³கே³ நிப்³ப³த்தா, தே ‘‘அத்தனோ அத்தனோ ஸத்த²ரி பஸாதே³ன நிப்³ப³த்தம்ஹா’’தி ஸஞ்ஞினோ ஹுத்வா ‘‘க³ச்சா²ம த³ஸப³லஸ்ஸ ஸந்திகே ட²த்வா அம்ஹாகங் ஸத்தா²ரானங் வண்ணங் கதெ²ஸ்ஸாமா’’தி ஆக³ந்த்வா பச்சேககா³தா²ஹி கத²யிங்ஸு. தத்த² சி²ந்தி³தமாரிதேதி சி²ந்தி³தே ச மாரிதே ச. ஹதஜானீஸூதி போத²னே ச த⁴னஜானீஸு ச. புஞ்ஞங் வா பனாதி அத்தனோ புஞ்ஞம்பி ந ஸமனுபஸ்ஸதி, ஸங்கே²பதோ புஞ்ஞாபுஞ்ஞானங் விபாகோ நத்தீ²தி வத³தி. ஸ வே விஸ்ஸாஸமாசிக்கீ²தி ஸோ – ‘‘ஏவங் கதபாபானம்பி கதபுஞ்ஞானம்பி விபாகோ நத்தீ²’’தி வத³ந்தோ ஸத்தானங் விஸ்ஸாஸங் அவஸ்ஸயங் பதிட்ட²ங் ஆசிக்க²தி, தஸ்மா மானநங் வந்த³னங் பூஜனங் அரஹதீதி வத³தி.
111. Dasame nānātitthiyasāvakāti te kira kammavādino ahesuṃ, tasmā dānādīni puññāni katvā sagge nibbattā, te ‘‘attano attano satthari pasādena nibbattamhā’’ti saññino hutvā ‘‘gacchāma dasabalassa santike ṭhatvā amhākaṃ satthārānaṃ vaṇṇaṃ kathessāmā’’ti āgantvā paccekagāthāhi kathayiṃsu. Tattha chinditamāriteti chindite ca mārite ca. Hatajānīsūti pothane ca dhanajānīsu ca. Puññaṃ vā panāti attano puññampi na samanupassati, saṅkhepato puññāpuññānaṃ vipāko natthīti vadati. Sa ve vissāsamācikkhīti so – ‘‘evaṃ katapāpānampi katapuññānampi vipāko natthī’’ti vadanto sattānaṃ vissāsaṃ avassayaṃ patiṭṭhaṃ ācikkhati, tasmā mānanaṃ vandanaṃ pūjanaṃ arahatīti vadati.
தபோஜிகு³ச்சா²யாதி காயகிலமத²தபேன பாபஜிகு³ச்ச²னேன. ஸுஸங்வுதத்தோதி ஸமன்னாக³தோ பிஹிதோ வா. ஜேகு³ச்சீ²தி தபேன பாபஜிகு³ச்ச²கோ. நிபகோதி பண்டி³தோ. சாதுயாமஸுஸங்வுதோதி சாதுயாமேன ஸுஸங்வுதோ. சாதுயாமோ நாம ஸப்³ப³வாரிவாரிதோ ச ஹோதி ஸப்³ப³வாரியுத்தோ ச ஸப்³ப³வாரிது⁴தோ ச ஸப்³ப³வாரிபு²டோ சாதி இமே சத்தாரோ கொட்டா²ஸா. தத்த² ஸப்³ப³வாரிவாரிதோதி வாரிதஸப்³ப³உத³கோ, படிக்கி²த்தஸப்³ப³ஸீதோத³கோதி அத்தோ². ஸோ கிர ஸீதோத³கே ஸத்தஸஞ்ஞீ ஹோதி , தஸ்மா தங் ந வலஞ்ஜேதி. ஸப்³ப³வாரியுத்தோதி ஸப்³பே³ன பாபவாரணேன யுதோ. ஸப்³ப³வாரிது⁴தோதி ஸப்³பே³ன பாபவாரணேன து⁴தபாபோ . ஸப்³ப³வாரிபு²டோதி ஸப்³பே³ன பாபவாரணேன பு²ட்டோ². தி³ட்ட²ங் ஸுதஞ்ச ஆசிக்க²ந்தி தி³ட்ட²ங் ‘‘தி³ட்ட²ங் மே’’தி ஸுதங் ‘‘ஸுதங் மே’’தி ஆசிக்க²ந்தோ, ந நிகு³ஹந்தோ. ந ஹி நூன கிப்³பி³ஸீதி ஏவரூபோ ஸத்தா² கிப்³பி³ஸகாரகோ நாம ந ஹோதி.
Tapojigucchāyāti kāyakilamathatapena pāpajigucchanena. Susaṃvutattoti samannāgato pihito vā. Jegucchīti tapena pāpajigucchako. Nipakoti paṇḍito. Cātuyāmasusaṃvutoti cātuyāmena susaṃvuto. Cātuyāmo nāma sabbavārivārito ca hoti sabbavāriyutto ca sabbavāridhuto ca sabbavāriphuṭo cāti ime cattāro koṭṭhāsā. Tattha sabbavārivāritoti vāritasabbaudako, paṭikkhittasabbasītodakoti attho. So kira sītodake sattasaññī hoti , tasmā taṃ na valañjeti. Sabbavāriyuttoti sabbena pāpavāraṇena yuto. Sabbavāridhutoti sabbena pāpavāraṇena dhutapāpo . Sabbavāriphuṭoti sabbena pāpavāraṇena phuṭṭho. Diṭṭhaṃ sutañca ācikkhanti diṭṭhaṃ ‘‘diṭṭhaṃ me’’ti sutaṃ ‘‘sutaṃ me’’ti ācikkhanto, na niguhanto. Na hi nūna kibbisīti evarūpo satthā kibbisakārako nāma na hoti.
நானாதித்தி²யேதி ஸோ கிர நானாதித்தி²யானங்யேவ உபட்டா²கோ, தஸ்மா தே ஆரப்³ப⁴ வத³தி. பகுத⁴கோ காதியானோதி பகுதோ⁴ கச்சாயனோ. நிக³ண்டோ²தி நாடபுத்தோ. மக்க²லிபூரணாஸேதி மக்க²லி ச பூரணோ ச. ஸாமஞ்ஞப்பத்தாதி ஸமணத⁴ம்மே கோடிப்பத்தா. ந ஹி நூன தேதி ஸப்புரிஸேஹி ந தூ³ரே, தேயேவ லோகே ஸப்புரிஸாதி வத³தி. பச்சபா⁴ஸீதி ‘‘அயங் ஆகோடகோ இமேஸங் நக்³க³னிஸ்ஸிரிகானங் த³ஸப³லஸ்ஸ ஸந்திகே ட²த்வா வண்ணங் கதே²தீதி தேஸங் அவண்ணங் கதெ²ஸ்ஸாமீ’’தி பதிஅபா⁴ஸீதி.
Nānātitthiyeti so kira nānātitthiyānaṃyeva upaṭṭhāko, tasmā te ārabbha vadati. Pakudhako kātiyānoti pakudho kaccāyano. Nigaṇṭhoti nāṭaputto. Makkhalipūraṇāseti makkhali ca pūraṇo ca. Sāmaññappattāti samaṇadhamme koṭippattā. Na hi nūna teti sappurisehi na dūre, teyeva loke sappurisāti vadati. Paccabhāsīti ‘‘ayaṃ ākoṭako imesaṃ nagganissirikānaṃ dasabalassa santike ṭhatvā vaṇṇaṃ kathetīti tesaṃ avaṇṇaṃ kathessāmī’’ti patiabhāsīti.
தத்த² ஸஹாசரிதேனாதி ஸஹ சரிதமத்தேன. ச²வோ ஸிகா³லோதி லாமகோ காலஸிகா³லோ. கொத்து²கோதி தஸ்ஸேவ வேவசனங். ஸங்கஸ்ஸராசாரோதி ஆஸங்கிதஸமாசாரோ. ந ஸதங் ஸரிக்கோ²தி பண்டி³தானங் ஸப்புரிஸானங் ஸதி³ஸோ ந ஹோதி, கிங் த்வங் காலஸிகா³லஸதி³ஸே தித்தி²யே ஸீஹே கரோஸீதி?
Tattha sahācaritenāti saha caritamattena. Chavo sigāloti lāmako kālasigālo. Kotthukoti tasseva vevacanaṃ. Saṅkassarācāroti āsaṅkitasamācāro. Na sataṃ sarikkhoti paṇḍitānaṃ sappurisānaṃ sadiso na hoti, kiṃ tvaṃ kālasigālasadise titthiye sīhe karosīti?
அன்வாவிஸித்வாதி ‘‘அயங் ஏவரூபானங் ஸத்தா²ரானங் அவண்ணங் கதே²தி, தேனேவ நங் முகே²ன வண்ணங் கதா²பெஸ்ஸாமீ’’தி சிந்தெத்வா தஸ்ஸ ஸரீரே அனுஆவிஸி அதி⁴முச்சி, ஏவங் அன்வாவிஸித்வா. ஆயுத்தாதி தபோஜிகு³ச்ச²னே யுத்தபயுத்தா. பாலயங் பவிவேகியந்தி பவிவேகங் பாலயந்தா. தே கிர ‘‘ந்ஹாபிதபவிவேகங் பாலெஸ்ஸாமா’’தி ஸயங் கேஸே லுஞ்சந்தி. ‘‘சீவரபவிவேகங் பாதெஸ்ஸாமா’’தி நக்³கா³ விசரந்தி. ‘‘பிண்ட³பாதபவிவேகங் பாலெஸ்ஸாமா’’தி ஸுனகா² விய பூ⁴மியங் வா பு⁴ஞ்ஜந்தி ஹத்தே²ஸு வா. ‘‘ஸேனாஸனபவிவேகங் பாலெஸ்ஸாமா’’தி கண்டகஸெய்யாதீ³னி கப்பெந்தி. ரூபே நிவிட்டா²தி தண்ஹாதி³ட்டீ²ஹி ரூபே பதிட்டி²தா. தே³வலோகாபி⁴னந்தி³னோதி தே³வலோகபத்த²னகாமா. மாதியாதி மச்சா, தே வே மச்சா பரலோகத்தா²ய ஸம்மா அனுஸாஸந்தீதி வத³தி.
Anvāvisitvāti ‘‘ayaṃ evarūpānaṃ satthārānaṃ avaṇṇaṃ katheti, teneva naṃ mukhena vaṇṇaṃ kathāpessāmī’’ti cintetvā tassa sarīre anuāvisi adhimucci, evaṃ anvāvisitvā. Āyuttāti tapojigucchane yuttapayuttā. Pālayaṃ pavivekiyanti pavivekaṃ pālayantā. Te kira ‘‘nhāpitapavivekaṃ pālessāmā’’ti sayaṃ kese luñcanti. ‘‘Cīvarapavivekaṃ pātessāmā’’ti naggā vicaranti. ‘‘Piṇḍapātapavivekaṃ pālessāmā’’ti sunakhā viya bhūmiyaṃ vā bhuñjanti hatthesu vā. ‘‘Senāsanapavivekaṃ pālessāmā’’ti kaṇṭakaseyyādīni kappenti. Rūpe niviṭṭhāti taṇhādiṭṭhīhi rūpe patiṭṭhitā. Devalokābhinandinoti devalokapatthanakāmā. Mātiyāti maccā, te ve maccā paralokatthāya sammā anusāsantīti vadati.
இதி விதி³த்வாதி ‘‘அயங் பட²மங் ஏதேஸங் அவண்ணங் கதெ²த்வா இதா³னி வண்ணங் கதே²தி, கோ நு கோ² ஏஸோ’’தி ஆவஜ்ஜெந்தோ ஜானித்வாவ. யே சந்தலிக்க²ஸ்மிங் பபா⁴ஸவண்ணாதி யே அந்தலிக்கே² சந்தோ³பா⁴ஸஸூரியோபா⁴ஸஸஞ்ஜா²ராக³இந்த³த⁴னுதாரகரூபானங் பபா⁴ஸவண்ணா. ஸப்³பே³வ தே தேதி ஸப்³பே³வ தே தயா. நமுசீதி மாரங் ஆலபதி. ஆமிஸங்வ மச்சா²னங் வதா⁴ய கி²த்தாதி யதா² மச்சா²னங் வத⁴த்தா²ய ப³ளிஸலக்³க³ங் ஆமிஸங் கி²பதி, ஏவங் தயா பஸங்ஸமானேன ஏதே ரூபா ஸத்தானங் வதா⁴ய கி²த்தாதி வத³தி.
Itividitvāti ‘‘ayaṃ paṭhamaṃ etesaṃ avaṇṇaṃ kathetvā idāni vaṇṇaṃ katheti, ko nu kho eso’’ti āvajjento jānitvāva. Ye cantalikkhasmiṃ pabhāsavaṇṇāti ye antalikkhe candobhāsasūriyobhāsasañjhārāgaindadhanutārakarūpānaṃ pabhāsavaṇṇā. Sabbeva te teti sabbeva te tayā. Namucīti māraṃ ālapati. Āmisaṃva macchānaṃ vadhāya khittāti yathā macchānaṃ vadhatthāya baḷisalaggaṃ āmisaṃ khipati, evaṃ tayā pasaṃsamānena ete rūpā sattānaṃ vadhāya khittāti vadati.
மாணவகா³மியோதி அயங் கிர தே³வபுத்தோ பு³த்³து⁴பட்டா²கோ. ராஜக³ஹீயானந்தி ராஜக³ஹபப்³ப³தானங். ஸேதோதி கேலாஸோ. அக⁴கா³மினந்தி ஆகாஸகா³மீனங். உத³தி⁴னந்தி உத³கனிதா⁴னானங். இத³ங் வுத்தங் ஹோதி – யதா² ராஜக³ஹீயானங் பப்³ப³தானங் விபுலோ ஸெட்டோ², ஹிமவந்தபப்³ப³தானங் கேலாஸோ, ஆகாஸகா³மீனங் ஆதி³ச்சோ, உத³கனிதா⁴னானங் ஸமுத்³தோ³, நக்க²த்தானங் சந்தோ³, ஏவங் ஸதே³வகஸ்ஸ லோகஸ்ஸ பு³த்³தோ⁴ ஸெட்டோ²தி. த³ஸமங்.
Māṇavagāmiyoti ayaṃ kira devaputto buddhupaṭṭhāko. Rājagahīyānanti rājagahapabbatānaṃ. Setoti kelāso. Aghagāminanti ākāsagāmīnaṃ. Udadhinanti udakanidhānānaṃ. Idaṃ vuttaṃ hoti – yathā rājagahīyānaṃ pabbatānaṃ vipulo seṭṭho, himavantapabbatānaṃ kelāso, ākāsagāmīnaṃ ādicco, udakanidhānānaṃ samuddo, nakkhattānaṃ cando, evaṃ sadevakassa lokassa buddho seṭṭhoti. Dasamaṃ.
நானாதித்தி²யவக்³கோ³ ததியோ.
Nānātitthiyavaggo tatiyo.
இதி ஸாரத்த²ப்பகாஸினியா
Iti sāratthappakāsiniyā
ஸங்யுத்தனிகாய-அட்ட²கதா²ய
Saṃyuttanikāya-aṭṭhakathāya
தே³வபுத்தஸங்யுத்தவண்ணனா நிட்டி²தா.
Devaputtasaṃyuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. நானாதித்தி²யஸாவகஸுத்தங் • 10. Nānātitthiyasāvakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. நானாதித்தி²யஸாவகஸுத்தவண்ணனா • 10. Nānātitthiyasāvakasuttavaṇṇanā
